Tuesday . 21 May 2019

INKURU ZIGEZWEHO

  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

ABAGORE BAFUNGIYE MURI GEREZA YA NGOMA BIZIHIJE UMUNSI MPUZAMAHANGA W’ABAGORE (AMAFOTO)

Saturday 9 March 2019, by : MUTESI Scovia
    Yasomwe na

Abagore bafungiye muri gereza ya Ngoma bizihije umunsi mpuzamahanga w’abagore, bagaragaza ko kudasurwa n’imiryango yabo bitera bamwe ihungabana no kwiheba.
Ubwo hizihizwaga umunsi mpuzamahanga w’abagore ku isi hose, gereza ya Ngoma ntiyasigaye inyuma, abagororwa b’igitsina gore bafungiye muri iyi gereza bizihije uyu munsi waranzwe n’imbyino ndetse n’imyiyereko y’imyenda ikoze mu bipapuro no mu birere.

Umunsi mpuzamahanga w’abagore muri uyu mwaka ufite insanganyamatsiko igira iti “Dufatanye urunana twubake umuryango utekanye”.

Ubwo bizihizaga uyu munsi abagororwa bagera kuri 55 bigiye muri gereza imyuga irimo ubudozi n’abandi 13 bize gusoma no kwandika, bagaragaje ibyo bagezeho.

Mukandekezi Vestine ugororerwa muri iyi gereza avuga ko muri iyi gereza yahungukiye ubumenyi butandukanye burimo kwiga kudoda, gusoma no kwandika n’ibindi byinshi akaba avuga ko bizamufasha kwiteza imbere mu gihe azaba arangije igifungo yakatiwe.

Uzerinyana Fortune w’imyaka 20 wafungiwe gucuruza ibiyobyabwenge, avuga ko muri gereza amaze kuhungukira byinshi birimo no kumenya gusoma no kwandika.

Ati “Muri gereza uko abantu bahakeka ntabwo ariko hameze, habamo ibintu byinshi bifasha abagororwa ku buryo babasha kuhungukira ubumenyi butandukanye. Nkanjye naje hano ntazi gusoma no kwandika ariko kuri ubu maze kubimenya neza cyane ku buryo mbasha kwisomera igitabo nkakirangiza”.

Hari abafite ihungabana no kwiheba baterwa no kudasurwa n’imiryango yabo

Muhumuza Happy usanzwe akuriye abagororwa bo muri iyi gereza, avuga ko ikibazo cyo kudasurwa kiri mu bituma haboneka ihungabana rinini ngo kuko nk’umunsi wo gusura mu bagororwa 1075 bafungiye muri iyi gereza hasurwamo nka 80 gusa ngo abandi ugasanga imiryango isa n’iyabibagiwe cyangwa ifite ipfunwe ryo kuza kubasura nyamara yiyibagije ko ari abantu nk’abandi.

Mukandekezi Vestine we avuga ko kudasurwa n’imiryango yabo bituma bamwe biheba abandi bagahura n’ihungabana.

Ati “Hari nk’abamara umwaka cyangwa ibiri batagerwaho n’imiryango yabo kandi ihari, turasaba leta ko yadukorera ubuvugizi imiryango yacu ikajya idusura kuko nubwo turi hano turi kwiga ku buryo abasohoka baba barisubiyeho.”

Umuyobozi wa Gereza ya Ngoma SSP Ndwanyi Marie Grace, avuga ko ikigereranyo bakoreye muri iyi gereza basanze abasurwa ari 15% agasaba abanyarwanda kudafata abagororwa nk’ibicibwa.

Ati “Ikigereranyo dufite uyu munsi cy’abasurwa ni 15% bivuze ngo abandi ntibasurwa, turasaba abanyarwanda kudafata abagororwa nk’ibicibwa ngo babatererane. Kuba afunze aba ari kugororwa igihe kiba kizagera agasubira mu rugo agafatanya n’abandi mu kubaka umuryango nyarwanda.”

Umuyobozi Mukuru wungirije w’urwego rw’Igihugu rushinzwe imfungwa n’abagororwa (RCS) Charles Musitu, avuga ko bagiye kongera imbaraga mu bukangurambaga ku miryango ifite ababo bafunzwe kuko ngo imyinshi yadohotse mu kubasura.

Iyi gereza ya Ngoma ifungiyemo abagororwa b’abagore 1075 barimo 13 batwite, abafunganywe n’abana bataruzuza imyaka itatu ni 98. Mu byaha abayifungiyemo harimo; icya Jenoside, gucuruza ibiyobyabwenge ndetse n’icyaha cyo gukuramo inda.


Uhereye iburyo ni umuyobozi wa Foundation Dide Mukansoro Odette, Umuyobozi Mukuru wungirije wa RCS Charles Musitu ndetse n’umuyobozi wa gereza ya Ngoma Ndwanyi Marie Grace


Abagorirwa bahize abandi mu gusoma no kwandika ndetse no mu kudoda bahembwe
Inkuru y’igihe

feature-top
feature-top

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

Iyandikishe ujye ubona Amakuru

Iyandikishe ujye ubona Amakuru