Sunday . 12 July 2020

INKURU ZIGEZWEHO

  • 4 June 2019 » Rubavu: Ibigo mbonezamikurire byazahuye ubuzima bw’abana basigwaga ku mupaka uhuza u Rwanda na DR Kongo – read more
  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

Abadepite bagaragaje icyuho cya miliyari 210 Frw zigenewe imishinga 61 mu ngengo y’imari itaha

Saturday 6 June 2020, by : MUTESI Scovia
    Yasomwe na

By Imfurayabo Pierre

Abadepite bagaragaje ko mu mafaranga yateganyirijwe ingengo y’imari y’umwaka utaha uzatangirana na Nyakanga 2020, harimo icyuho ku buryo hari ibikorwa 61 byateganyijwe bitazabasha gukorwa, basaba ko hashakwa ibisubizo bikwiye.

Kuri uyu wa Gatanu nibwo Komisiyo y’Ingengo y’Imari n’Umutungo by’Igihugu yagejeje ku Nteko Rusange y’umutwe w’abadepite, raporo ku isesenguraga ry’imbanzirizamushinga y’itegeko rigena ingengo y’imari ya leta y’umwaka wa 2020/21.

Perezida w’iyi komisiyo Prof Munyaneza Omar, yabanje kuvuga ko bitewe n‘icyorezo cya #Covid-19 igihe imbanzirizamushinga yagombaga kuba yagejejwe ku Nteko, ni ukuvuga bitarenze itariki ya 30 Mata, n’igihe ibitekerezo byagombaga kuba byagerejwe kuri Guverinoma, ni ukuvuga bitarenze itariki ya 30 Gicurasi, bitubahirijwe.

Yavuze ko abagize Komisiyo basanze mu itegurwa ry’ingengo y’imari haribanzwe ku ngamba zigamije kuzahura ubukungu bwashegeshwe na #Covid19 no ku ngamba z’Igihugu zigamije kwihutisha iterambere (NST1). Mu guteganya, ingengo y’imari igenewe ibikorwa by’iterambere yaragabanyijwe.

Yagize ati “Hari bimwe mu bikorwa nyakubahwa Perezida wa Repubulika yemereye abaturage bitarabonerwa ingengo y’imari. Hari kandi ibikorwa n’imishinga bitabonewe ingengo y’imari mu mwaka wa 2020/ 21, kandi byarateganywaga.”

Muri rusange basanzemo imishinga 61 ikeneye nibura miliyari zirenga 210 Frw, ku buryo nizitaboneka imishinga imwe itazabasha gukorwa. Ni ibintu ariko bishobora kuzarebwaho mu ngengo y’imari ivuguruye.

Ni imishinga irimo n’iyo mu rwego rw’ubuvuzi, ikoranabuhanga n’ibikorwa Perezida Kagame yemereye abaturage. Iyo mishinga irimo kubaka ibitaro bya Ruhengeri n’ikimoteri cya Musanze, kubaka icyanya cy’inganda, inzu z’abatishoboye no gusana ibikorwa byangiritse n’ibiraro.

Bamwe mu badepite bagaragaje ko aya mafaranga atatanzwe mu gihe hari ibikorwa byari bikeneye kongerwamo imbaraga.

Umwe yagize ati “Ujya kwivuza, umuti usabye akaba atariwo baguha, kubera ko baguha uwo uhasanze, ntibaguha umuti ujyanye n’uburwayi bwawe. Ibintu rero bishobora kugira ingaruka ku mitangire ya serivisi ariko noneho bikanagira ingaruka kuri iriya gahunda nziza ya mituweri, ku buryo numva mu bintu byitabwaho, iki kibazo cyagombye kwitabwaho mu maguru mashya.”

Undi yagize ati “Ibintu byose ni ikoranabuhanga none twabuze amafaranga y’umutekano w’ikoranabuhanga. Nagira ngo njye, abantu bakongera bakabirebaho neza ku buryo ariya mafaranga yaboneka kuko tudafite umutekano w’ikoranabuhanga, mbona twaba dukomerewe cyane.”

Depite Munyaneza yavuze ko bagejeje impungenge zabo kuri Minisitiri w’Imari n’Igenamigambi Dr Uzziel Ndagijimana, abizeza ko bizasuzumwa.

Ati “Yagaragarije abagize komisiyo ko hashingiwe ku bushobozi buhari kandi banashingiye ku byuho byumvikana abagize komisiyo bamugaragarije ko bikwiye kwitabwaho, ko hari ibizitabwaho kurusha ibindi mu gihe cyo kunoza umushinga w’itegeko rigena ingengo y’imari ya Leta y’umwaka wa 2021.”

Minisiteri y’Imari n’Igenamigambi yatangaje ko ingengo y’imari u Rwanda ruzakoresha mu mwaka wa 2020/2021 iziyongeraho 7.5 % ikagera kuri miliyari 3245.7 Frw ivuye kuri 3017.1 Frw yakoreshejwe muri uyu mwaka w’ingengo y’imari urimo kurangira.

Iyo ngengo y’imari y’uyu mwaka turi gusoza imaze gukoreshwa ku gipimo cya 83.5% muri rusange.

Mu mwaka tugiye gutangira, amafaranga akomoka imbere mu gihugu habariwemo n’inguzanyo z’imbere mu gihugu ni 60.5 % by’ingengo y’imari yose, inkunga zizaba zingana na 15.2 % mu gihe inguzanyo zizaba ari 24.1 % by’ingengo y’imari.

Muri rusange amafaranga ava imbere mu gihugu wongeyeho inguzanyo z’amahanga igihugu kizishyura afite uruhare rungana na 84.6 % mu ngengo y’imari itaha.

Kubera icyorezo cya Coronavirus, ubukungu ku Isi hose buzagabanuka, ubw’u Rwanda byitezwe ko buzazamuka ku gipimo cya 2% mu mwaka wa 2020 buvuye kuri 9.4 % bwazamutseho umwaka ushize.

Byitezwe ko n’imisoro ikusanywa mu gihugu ishobora kuzagabanukaho nibura miliyari 234 Frw kubera ibyemezo byafashwe mu gukumira Coronavirus birimo gufunga ibikorwa byose, abantu bakaguma mu ngo mu gihe kigera ku mezi abiri.

feature-top
feature-top

Any message or comments?

Iyandikishe ujye ubona Amakuru

Iyandikishe ujye ubona Amakuru