Wednesday . 17 July 2019

INKURU ZIGEZWEHO

  • 4 June » Rubavu: Ibigo mbonezamikurire byazahuye ubuzima bw’abana basigwaga ku mupaka uhuza u Rwanda na DR Kongo – read more
  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

Alain Muku yasobanuye iby’umusaza ushinja Clarisse Karasira kumukoresha mu mashusho y’indirimbo atabimubwiye

Thursday 27 June 2019, by : MUTESI Scovia
    Yasomwe na

By Imfurayabo Pierre Romeo

Alain Mukuralinda uhagarariye inyungu z’umuhanzikazi Clarisse Karasira, yanyomoje umusaza witwa Ntashamaje Claver uri gushinja uyu mukobwa kumukoresha mu mashusho y’indirimbo ye “Ntizagushuke”, atabamusabye uburenganzira.

Indirimbo Ntizagushuke ya Clarisse yasohotse mu mpera z’umwaka ushize. Irimo impanuro umubyeyi aha umwana we amubwira ko adakwiye kuzahindurwa n’iby’Isi akitwara nabi.

Amashusho yayo amwe yafatiwe ku Giticyinyoni mu Mujyi wa Kigali mu rugo rw’umusaza witwa Ntashamaje Claver, unagaragaramo.

Kuri uyu wa Gatatu hasohotse amashusho arimo uyu umusaza avuga ko ubwo yafatwaga atari yasobanuriwe ko azashyirwa muri iyi ndirimbo yakunzwe cyane.

Ati “Ntabwo yambwiye ko ari indirimbo, ahubwo yambwiye ko ari amafoto agiye gufatira hano gusa. Amafoto yarayafashe arajyana, niyo yahinduyemo indirimbo irasohoka. Ni nayo mpamvu ntiyumvisha ukuntu buri wese ambaza ngo ndi umuhanzi kandi ntarigeze mba umuhanzi.”

Byumvikana ko uyu musaza yagaragaye muri aya mashusho yabanje kubyumvikana na Clarisse Karasira, ariko igisa n’ikibazo afite ngo nuko yamwemereye kuzasubirayo akamushimira ariko ntiyabikora ari nayo mpamvu mu gihe atabikoze aziyambaza inzira y’amategeko.

Ati “Niba ashaka kungeraho nangereho, agire icyo abivugaho, niba ari ntacyo ni urukiko byanze bikunze, kuko mfite uburenganzira bwo kubaza impamvu kuba yarambwiye ngo azagaruka kunsura ntanagaruke.”

Hari aho uyu musaza avuga ko iyo Clarisse Karasira aba yaramuhaye amafaranga niyo yaba make atari kwirirwa agira icyo amukurikiranaho.

Alain Muku, Umujyanama wa Clarisse Karasira yabwiye IGIHE dukesha iyi nkuru ko ibivugwa n’uyu musaza nta shingiro bifite kuko hari ibihamya by’uko bafashe amashusho bizwi neza ko azakoreshwa mu ndirimbo.

Ati “Kugirango umuhanzi abashe gufata amashusho y’indirimbo aho bayafatira haba hari umuzindaro iyo ndirimbo iri gucurangwamo, umuhanzi aba aririmba aranguruye ijwi kandi abikora inshuro nyinshi zishoboka kuko asubiramo uko bafashe amashusho atandukanye ku buryo ntawayoberwa ibiri gukorwa. Haba hari ibikoresho byinshi bitandukanye biri gukoreshwa kandi uburyo bikoreshwa mu gufata amashusho y’indirimbo ntibushobora kwitiranywa no gufotora amafoto.”

Yongeyeho ko ibikoresho byose byakoreshejwe mu mashusho y’iyi ndirimbo ari Ntashamaje Claver, wabitanze ku bwende bwe, ndetse mu mashusho agaragara azamura amaboko asezera umwana byerekana neza ko yari azi igikorwa arimo.

Nta mafaranga cyangwa ikindi gihembo yumvikanye na Clarisse Karasira uretse ko yamusabye kumwicira inyota kandi ngo yarabikoze.

Kuri Alain Muku uyu musaza ngo arashaka indonke kandi ntacyo bateze kumuha mu gihe ubutabera butarabyemeza.

Ati “Nasubize amerwe mu isaho kuko Karasira ntabwo azamugeraho, kuko niba koko yaramuhemukiye, amategeko azamurenganura.”

Umwe mu bagize uruhare mu ifatwa ry’amashusho yabwiye IGIHE dukesha iyi nkuru ko bari bapanze gukoresha umukobwa ukina nk’umugore uhanura umwana we, bikarangira umusaza yisabiye ko nawe yajyamo agakina nk’umugabo.

“Ntizagushuke” ni indirimbo ya gatatu ya Clarisse Karasira, niyo ndirimbo ye yatumye abantu bamukunda cyane kubera amagambo arimo n’injyana yayo. Ikaba imaze kurebwa inshuro zirenga miliyoni imwe kuri YouTube.

Src/Igihe

feature-top
feature-top

Any message or comments?

Iyandikishe ujye ubona Amakuru

Iyandikishe ujye ubona Amakuru