Monday . 14 October 2019

INKURU ZIGEZWEHO

  • 4 June » Rubavu: Ibigo mbonezamikurire byazahuye ubuzima bw’abana basigwaga ku mupaka uhuza u Rwanda na DR Kongo – read more
  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

Amategeko ajyanye n’imicungire y’abakozi ba Leta ashobora kongera kuvugururwa

Wednesday 25 September 2019, by : Imfurayabo Pierre Romeo
    Yasomwe na

Minisitiri w’Abakozi ba Leta n’Umurimo Rwanyindo Kayirangwa Fanfan kuri uyu wa Gatatu tariki 25 Nzeri 2019, yagejeje ku badepite bagize Komisiyo y’Imibereho y’Abaturage umushinga w’Itegeko rishyiraho sitati rusange igenga abakozi ba Leta.

Mu Isobanurampamvu, Minisitiri w’Abakozi ba Leta n’Umurimo yavuze ko Ubutegetsi bwa Leta bugira uruhare rukomeye mu gushyira mu bikorwa gahunda za Leta zerekeye iterambere n’imikorere myiza yabwo kandi iboneye, hagamijwe guteza imbere imibereho myiza n’ubukungu bw’Igihugu.

Rwanyindo akavuga ko ari muri urwo rwego hifujwe ko amategeko ariho ajyanye n’imicungire y’abakozi ba Leta yavugururwa kugira ngo ubutegetsi bwa Leta buhabwe ubushobozi buzabufasha kugera ku ntego za Gahunda ya Guverinoma y’imyaka 7 (NST1: yatangiye mu 2017 ikazagera mu 2024), guhuza amategeko yerekeye imicungire y’abakozi ba Leta na NST1, no kugira ngo hakemurwe ibibazo bimwe na bimwe byagiye bigaragara mu ishyirwa mu bikorwa ry’Itegeko n°86/2013 ryo ku wa 11/09/2013 rishyiraho sitati rusange igenga abakozi ba Leta.

Muri iyo nama yari iyobowe na Perezidante wa Komisiyo y’Imibereho y’Abaturage mu Nteko Ishinga Amategeko Umutwe w’Abadepite Muhongayire Christine, Minisitiri Rwanyindo Fanfan yagize ati “Impinduka z’ingenzi ku Itegeko n°86/2013 ryo ku wa 11/09/2013 rishyiraho sitati rusange igenga abakozi ba Leta zikubiye muri uyu mushinga w’itegeko, harimo abakozi ba Leta bakora ku buryo buhoraho. Icyakora mu rwego rwo kuziba icyuho cyagiye kigaragazwa hamwe na hamwe, hateganyijwe ko iri tegeko ryakurikizwa kandi ku banyapolitiki ku bidateganyijwe mu mategeko abagenga no ku bandi bakozi ba Leta ku bidateganyijwe na sitati zihariye zibagenga, keretse iyo amahame ateganywa n’iri tegeko adashobora gukurikizwa”.

Minisitiri w’Abakozi ba Leta n’umurimo mu bisobanuro bye yagarutse kuri sitati zihariye ku byiciro bimwe by’abakozi bitewe n’ibikenewe byihariye. Rwanyindo ati “Itegeko ririho rishyiraho sitati rusange igenga abakozi ba Leta ryemera ko hashobora gushyirwaho sitati zihariye ku byiciro bimwe by’abakozi ba Leta bitewe n’ibikenewe byihariye cyangwa imiterere y’akazi kabo.

Icyakora, itegeko ntiriteganya ibigenderwaho mu gushyiraho izo sitati zihariye. Ibi byatumye hajyaho sitati nyinshi zisubiramo ibiteganywa na sitati rusange igenga abakozi ba Leta kandi zigashyiraho uburyo bwo kugena iby’inyongera bigenerwa abakozi bamwe ba Leta, ibi bikazana amahame atandukanye mu micungire y’abakozi ba Leta.”

Minisitiri Rwanyindo yakomeje amenyesha ko kubera iyo mpamvu, ngo hateganyijwe Iteka rya Perezida rigena ibigenderwaho mu gushyiraho sitati yihariye. Hateganyijwe kandi ko ngo sitati yihariye izajya isuzumwa n’Inama y’Abaminisitiri iyishyikirijwe na Minisitiri ufite abakozi ba Leta mu nshingano, amaze gusuzuma ishingiro ryayo.

MIFOTRA yagarutse no ku bakozi bakorera ku masezerano, no ku muntu ufite ubumenyi bw’imbonekarimwe yinjira mu bakozi ba Leta nk’umukozi ukorera ku masezerano, ariko kugeza ubu ngo nta buryo buriho bushobora gukoreshwa kugira ngo umuntu ufite ubumenyi nk’ubwo yinjizwe mu bakozi ba Leta nk’umukozi uhoraho, ngo keretse ku myanya idapiganirwa.

Minisiteri y’Abakozi ba Leta n’umurimo irifuza kandi ko imyaka yo kwemererwa kuba umukozi wa Leta yahinduka, aho kuba 18 y’amavuko ngo ikaba 16 y’amavuko ariko binjizamo interuro ko “ashobora guhabwa akazi mu butegetsi bwa Leta, bitangiwe uruhushya rwanditse na Minisitiri”. Aha ariko ngo hakazirikanwa Iteka rya Minisitiri rigena imirimo ibujijwe ku mukozi wa Leta ufite kuva ku myaka cumi n’itandatu (16).

Hanavuzwe kandi no ku ngingo zindi harimo ijyanye no gushyira umukozi ukorera ku masezerano mu bakozi ba Leta bahoraho, ku kiruhuko kirekire cy’uburwayi, guhinduranya umwanya, kwimurwa k’umukozi wa Leta mu kigo Leta ifitemo imigabane, guhindura umwanya w’umurimo mu Butegetsi bwa Leta no ku myaka ya pansiyo.

Abadepite bagize Komisiyo y’Imibereho y’Abaturage mu Nteko Ishinga Amategeko y’u Rwanda nyuma yo kumva ibisobanuro byimbitse bya Minisitiri Rwanyindo Kayirangwa Fanfan wa Minisiteri y’Abakozi ba Leta n’Umurimo n’abakozi bari hamwe, batanze ibitekerezo kuri uwo mushinga w’Itegeko rishyiraho sitati rusange igenga abakozi ba Leta, bagaruka cyane ku myaka ya pansiyo bakagaragaza ko imyaka 65 ari myinshi bagendeye ku bisabwa n’Abanyarwanda batari bake babagezaho ibitekerezo.

Intumwa za rubanda zisanga imyaka yo mu kiruhuko z’icyabukuru yaba nibura 55 y’amavuko kugira ngo umuntu abe yahabwa amafaranga y’ubwiteganyirize bw’izabukuru agifite imbaraga zo kuyakoresha ibyamugirira akamaro, atarasaza cyane.

Abadepite kandi bagaragaje impungenge ku mukozi umara igihe kinini akora mu mwanya by’agateganyo kandi bigaragara ko ashoboye inshingano yahawe, ndetse banasaba kureba no ku mezi umukozi muri Leta amara ageragezwa.

Guhera kuri uyu wa Kane tariki 26 Nzeri 2019, Komisiyo y’Imibereho y’Abaturage irakomezanya na MIFOTRA basesengura ingingo ku yindi mu zo Minisitiri Rwanyindo Fanfan yatanzeho ibisobanuro bifuza ko zivugururwa hagamijwe imicungire myiza y’abakozi ba Leta mu Rwanda.

Inkuru dukesha Imvahonshya

feature-top
feature-top

Any message or comments?

Iyandikishe ujye ubona Amakuru

Iyandikishe ujye ubona Amakuru