Tuesday . 21 May 2019

INKURU ZIGEZWEHO

  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

BARAMUTWITSE KUGEZA APFUYE NYUMA YO KUREGA DIREGITERI W’IGIKIGO KO YAGERAGEJE KUMUFATA KU NGUFU

Friday 19 April 2019, by : MUTESI Scovia
    Yasomwe na

By Imfurayabo Pierre Romeo
Atewe akanyabugabo n’ umuryango we , Umukobwa wo mu gihugu cya Bangladesh Nusrat Jahan Rafi yagiye kuri polisi avuga ko yahohotewe birangira yishwe urwagashinyaguro.
Mu gihugu cya Bangladesh abakobwa baho ntabwo bajya bavuga ihohoterwa rishingiye ku gitsina bakorerwa mu rwego rwo kwirinda kuba iciro ry’ imigani aho batuye.

Nusrat Jahan Rafi wari ufite imyaka 19 yiga mu ishuri rya Abayisilamu, tariki 27 Werurwe , yabwiye polisi ko umuyobozi w’ ishuri rye yamuhamagaye mu biro akamukorakora mu buryo budakwiriye kugeza uyu mukobwa bimurenze ariruka. Umunsi byabereyeho niwo munsi uyu mukobwa yahise ajya kubibwira polisi, aherekejwe n’ umuryango we.

Abandi bakobwa benshi bigabye imibahanda bamagana ihohoterwa ribakorerwa niyiyica rubozo ryakorewe Nusrat
Ibyo Nusrat yakoze ntibisanzwe muri iki gihugu kuko abandi bakobwa bahuye n’ ikibazo nk’ icye baryumaho.

Nusrat ubwo yatekererezaga polisi ikibazo yahuye nacyo , umupolisi yahise amufata amashusho na telefone , uwo mupolisi yumvikana muri iyo video abwira umukobwa ngo ‘Nta kidasanzwe kura intoki mu maso’. Uyu mukobwa yavugaga yakinze ikiganza mu maso kubera gufatwa amashusho kuko ari kurega uwamuhohoteye.

Ikirego kimaze gutangwa diregiteri yatawe muri yombi, abasore babiri b’ abanyeshuri bategura imyigaragamyo yo gufunguza diregiteri ndetse bamwe bajya kuri uyu mukobwa kumusaba ko asababira imbabazi diregiteri.

Musaza wa Nusrat arimo aririra mushiki we
Nusrat ibintu byamubanye bibi, abaturage batangira kumukoba. Umuryango we utangira kuvuga ko utizeye umutekano w’ umukobwa wabo.

Tariki 6 Mata, Nusrat yagiye ku ishuri gukora ikizami cya nyuma. Musaza we Mahmudul Hasan Noman aramuherekeza, ati “ Namujyanye ku ishuri babanza kwanga ko yinjira mu ishuri. Iyo musubiza mu rugo ibi ntabwo biba byarabaye”.

Nursat yavuze ko umunyeshurikazi mugenzi we yamujyanye ku gisenge avuga ko hari umunyeshurikazi mugenzi wabo uri gukubitirwayo, yagerayo akahasanga abanyeshurikazi bane cyangwa batanu bakamusaba ko afunguza diregiteri. Abyanze bahita bamutwika bakoresheje kerosene.

Banaj Kumar Majumder , Umuyobozi w’ urwego rw’ iperereza avuga ko abicanyi bashakaga ko ibyabaye biza kugaragara nko kwiyahura ariko ngo abamutwitse bahise bava aho bamutwikiye barahunga atabarwa agitera akuka asobanura uko byagenze.
Abamutabaye bamujyanye ku bitaro biri hafi y’ ishuro ryabo, abaganga basanga umubiri we wahiye ku kigero cya 80%, bamuha transfert ngo age kuvurirwa ku bitaro bikuru, ariko abaganga babona bashobora kumushyira muri ambulance bakamugeza ku bitaro bikuru yapfuye. BBC ikomeza ivuga ko abaganga bakoresheje telefone ya musaza we bamubaza uko byagenze.

Ibihumbi by’ abantu bitabiriye umuhango wo gushyingura Nursat
Mu majwi yafashwe mbere gato y’ uko apfa yavuze ko bamwe mu bakobwa bamutwitse ari abo ku ishuri yigagaho rya Madrassa, anavuga imyirondoro yabo.

Tariki 10 Mata inkuru y’ urupfu rwa Nursat niyo yavuzwe cyane mu binyamakuru, umuhango wo kumushyingura witabiriwe n’ ibihumbi by’ abantu.
Lopa Hossain we yaranditse ati "Nifuje umukobwa ubuzima bwanjye bwose, ariko ngize ubwoba. Kubyarira umukobwa muri iki gihugu bivuze gupfa no gukira”.

Abaharanira uburenganzira bwa muntu muri Bangladesh bavuga ko mu mwaka 2018, abafashwe ku ngufu ari 940. Gusa abashakashatsi bavuga ko barenza aba.

Umuryango wa Nursat mu gahinda ko kubura umwana wabo
Salma Ali, umuryamategeko wahoze ari Umuyobozi w’ umuryango w’ abagore b’ abanyamategeko ‘Women Lawyers’ Association’ yagize ati “Iyo umugore agiye gutanga ikirego cy’ ihohoterwa akorerwa irindi hohoterwa bitewe n’ uko polisi iba idashaka guperereza kuri icyo kirego. Umugore agera aho agacika intege, abakora ibyaha bakabikomeza ”.

Abantu baribaza impamvu ikirego cya Nursat cyahawe agaciro ari uko yishwe. Ese urupfu rwe ruzahindura ibintu muri Bangladesh?

Muri 2009, muri Bangladesh bashyizeho iteka risaba ibigo by’ amashuri gushyiriraho abanyeshuri uburyo bwo kwijujutira ihohoterwa, iri teka ibigo bike nibyo byaryubahirije.

Professor Kaberi Gayen wo muri Kaminuza ya Dhaka ati “Byaduhungabanyije, ibintu nk’ ibi biribagirana ntabwo nizeye ko hari impinduka bizatanga. Reka dutegereze turebe ko ubutabera buzatangwa”.

Nusrat Jahan Rafi yazize ngo yareze diregiteri
Uyu mugore Kaberi avuga ko hakenewe impinduka mu mitekerereze, no mu gushyira mu bikorwa amategeko n’ amabwiriza. Kuva mu bwana abana bakigishwa ibijyanywe n’ ihohoterwa rishingiye ku gitsina. Ngo bagomba kwigishwa ikiza n’ ikibi iyo bigeze ku ihohoterwa rishingiye ku gitsina.

Inkuru ya BBC

feature-top
feature-top

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

Iyandikishe ujye ubona Amakuru

Iyandikishe ujye ubona Amakuru