Tuesday . 13 April 2021

INKURU ZIGEZWEHO

  • 4 June 2019 » Rubavu: Ibigo mbonezamikurire byazahuye ubuzima bw’abana basigwaga ku mupaka uhuza u Rwanda na DR Kongo – read more
  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

Ingengabitekerezo no gupfobya Jenoside tubona bigenda bigabanuka-Dr. Bizimana

Monday 5 April 2021, by : MUTESI Scovia
    Yasomwe na

Mu gihe u Rwanda n’Isi yose bagiye kwinjira mu Kwibuka ku nshuro ya 27 Jenoside yakorewe Abatutsi, Komisiyo y’Igihugu yo kurwanya Jenoside CNLG yatangaje ko ibona iby’ingengabitekerezo ya Jenoside no kuyipfobya n’ihakana ryayo bigenda bigabanuka ku mpamvu zizwi zirimo n’amategeko
asobanutse abihana.

Byatangajwe n’Umunyamabanga Nshingwabikirwa wa CNLG, Dr. Bizimana Jean Damascene asobanura uko gahunda yo kwibuka ku nshuro ya 27 ihagaze ahanini bijyanye n’ingamba zo kurwanya ikwirakwira rya COVID-19 yibasiye isi n’u Rwanda rurimo.

Dr. Bizimana yagize ati "Icyaha k’ingengabitekerezo ya Jenoside muri rusange, n’ipfobya n’ihakana rya Jenoside yakorewe Abatutsi tubona kigenda kigabanuka.

Aho tubibonera ni mu mibare ijyanye n’abakurikiranyweho icyo cyaha buri mwaka, ndetse n’umubare w’abo icyo cyaha gihama kabagihanirwa."

Yakomeje avuga ko impamvu bigabanuka ari uko mu Rwanda hari amategeko asobanutse ryaba itegeko ry’icyaha k’ingengabitekerezo ya Jenoside n’ibifitanye isano nayo bisobanura neza icyo ingengabitekerezo ya Jenoside ari cyo, gupfobya no guhakana Jenoside yakorewe Abatusti ku buryo abantu bamaze kubimenya, bazi no kubyirinda n’aho batagomba kurenga.

Yongeyeho ko no mu gitabo cy’amategeko ahana ibihano bigaragara, biza ku myaka itanu kugeza kuri 15 kandi n’abantu bamaze kubimenya no kubyirinda.

Mu bindi Dr. Bizimana yavuze byagabanyije ibyo byaha ni uko guverinoma y’u Rwanda yashyizeho ingamba zituma Abanyarwanda bagira imiyoborere myiza gusa avuga ko hari abagifite ibisigisigi byayo.

Ati "Haba mu gihugu no mu mahanga, hari abakomeza gupfobya Jenoside yakorewe Abatutsi. ipfobya ahanini rikorerwa ku mbuga nkoranyambaga bakabikongeza ahanini n’abari mu Rwanda kandi n’ubutumwa dutanga ni uko abari kuri izo mbuga bakwiye kumenya icyo itegeko riteganya."

Ku bijyanye na gahunda y’icyunamo, Umunyamabanga Nshingwabikorwa wa CNLG Dr.Jean Damascene Bizimana yatangaje ko amabwiriza yo kwirinda COVID-19 nta kizahinduka azakomeza kubahirizwa uko ameze.

Yakomeje agira ati "Icya Mbere ku itariki ya 7 Mata hazaba igikorwa cyo gutangiza icyunamo kizabera ku Rwibutso rwa Kigali ku Gisozi, gikurikiranywe kuri za radio na Television u rwego rw’igihugu, abaturage aho bari hose bashobore kugikurikirana.

Ubwo bisobnuye ko mu turere, mu mirenge nta bikorwa byo gutangiza icyunamo bizahabera, bazakurikira ibirimo bibera i Kigali mu masaha ya saa tatu n’igice saa yine."

Icyo gikorwa kizaba ari ugushyira indabo ahashyinguye Abatutsi bishwe muri Jenoside baruhukiye ku Rwibutso rwa Gisozi, hakurikireho gucana urumuri rw’ikizere nk’uko bisanzww bikorwa mu bindi bihe byabanje.

Ahari impinduka


Dr. Bizimana yavuze ko ugereranyije n’umwaka ushize ubwo igihugu cyose cyari muri Guma mu Rugo yuzuye kuber COVID-19, uyu mwaka bwo igikorwa kizabera ku Gisozi nikimara gutangizwa hari ibindi biganiro bitehanyijwe uzabera muri Kigali Arena hahurire abahagarariye ibyiciro bitandukanye by’Abanyarwanda.

Ati"Birimo abayobozi bakuru, abahagarariye ibihugu byabo mu Rwanda, abahagarariye inzego z’ibanze, iz’abikorera, abanyamadini, abarokotse Jenoside, kirangwe n’ibiganiro, ubuhamya, indirimbo kirangwe n’ubutumwa nyamukuru bw’umunsi bugenewe Abanyarwanda, inshuti z’u Rwanda n’abanyamahanga bose."

Indi mpinduka CNLG yavuze ni ikijyanye n’urugendo rw’amaguru rwajyaga rukorwa, haba i Kigali cyangwa mu turere kimwe n’umugoroba w’ikiriyo.

Dr. Bizimana ati "Ibyo bikorwa byombi ntabihari, ikizaba ni icyo cyo ku manywa kizahuza abahagarariye ibyiciro bitandukanye by’Abanyarwanda."

Mu cyumweru k’icyunamo ndetse no mu minsi 100 yo kwibuka hari ibiganiro biteganyijwe ariko nabyo bizajya bitangwa binyuze mu buryo bw’ikoranabuhanga no mu bitangazamakuru, cyane cyane ibigenewe urubyiruko.

Ku itariki ya 13 Mata hazaba ari ugusoza icyunamo ku rwego rw’igihugu, CNLG ikavuga ko nabwo nta gikorwa kihariye ahubwo hazaba ikiganiro n’abanyapolitiki batandukanye, gishingire ku mateka ya politiki n’imiyoborere nacyo kinyuzwe kuri za radio na television.

Ku mpinduka yihariye ni mu turere twagiye tubonekamo imibiri y’Abatutsi bazize Jenoside, gushyingura bizakorwa nabwo hubahirizwa amabwiriza yo kwirinda COVID-19, hakagenda umubare uzwi.

Abashaka kujya gushyira indabo ku nzubutsi nabo bazajya babikora hubahirijwe amabwiriza yo COVID-19 ndetse abantu basabwe kubanza kwipimisha kandi birinde kugenda ari benshi.

Ibiganiro nabyo byajyaga bibera mu bigo bizajya bikorwa hifashishijwe ikoranabuhanga nk’uko muri ibi bihe inama ziri kuba.

feature-top
feature-top

Any message or comments?

Iyandikishe ujye ubona Amakuru

Iyandikishe ujye ubona Amakuru