Thursday . 21 March 2019

INKURU ZIGEZWEHO

  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more
  • 17 July 2018 » How immigrants helped France win the World Cup – read more
  • 23 April 2018 » Pascal Nyamurinda wayoboraga Umujyi wa Kigali yeguye ku mirimo ye – read more
  • 23 April 2018 » Minisitiri Musoni James Yakuwe Muri Guverinoma – read more

KOMPANYI Z’INDEGE ZAHAGARITSE INGENDO ZA BOEING 737 MAX 8 NYUMA Y’IMPANUKA Y’INDEGE YA ETHIOPIAN AIRLINES

Monday 11 March 2019, by : MUTESI Scovia
    Yasomwe na

Kompanyi nyinshi z’indege zahagaritse ingendo z’indege zo mu bwoko bwa Boeing 737 Max 8 nyuma yaho indege yo muri ubu bwoko ya kompanyi Ethiopian Airlines yo muri Ethiopia ikoreye impanuka.

Indege ya kompanyi Ethiopian Airlines yavaga mu murwa mukuru Addis-Abeba wa Ethiopia yerekeza mu murwa mukuru Nairobi wa Kenya, yakoze impanuka ku cyumweru hashize iminota micye ihagurutse, abantu 157 bose bari bayirimo bahagisa ubuzima.

Urwego rw’Ubushinwa rugenzura ingendo z’indege rwategetse kompanyi z’indege zo muri iki gihugu guhagarika ingendo z’indege zo mu bwoko bwa Boeing 737 Max 8. Kompanyi za Ethiopian Airlines na Cayman Airways na zo zahagaritse ingendo z’indege zo muri ubu bwoko.

Kompanyi z’indege zo mu Bushinwa zategetswe guhagarika ingendo z’izo ndege zose zo mu bwoko bwa Boeing 737 Max 8 mbere ya saa kumi n’ebyiri z’umugoroba ku isaha yo mu Bushinwa.
Iyo mpanuka yo ku cyumweru yabaye impanuka ya kabiri y’indege yo muri ubu bwoko bwa Boeing 737 Max 8 ibaye mu mezi atanu ashize.

Nubwo impuguke ziburira ko hakiri kare cyane ku kumenya icyateye iyo mpanuka y’indege ya kompanyi Ethiopian Airlines, ibaye nyuma y’indi mpanuka y’indege yo muri ubu bwoko ya kompanyi Lion Air yabaye mu kwezi kwa cumi k’umwaka ushize wa 2018.

Iyo ndege yataye ubutumburuke imaze igihe gito ihagurutse, ihitana abantu 189 bari bayirimo.

Itangazo ry’urwego rw’Ubushinwa rugenzura ingendo z’indege za gisivile rigira riti: "Bitewe n’impanuka ebyiri zose zakozwe n’indege nshya zo mu bwoko bwa Boeing 737 Max 8 kandi zikaba mu gihe indege zari zigihaguruka, hari ukuntu zifitanye isano".

Kompanyi nyinshi zo gutwara abantu mu ndege zo mu Bushinwa ziragirwaho ingaruka n’iki cyemezo, harimo nka kompanyi Air China, China Eastern Airlines na China Southern Airlines.

Indege zirenga 90 zo mu bwoko bwa Boeing 787 Max 8 zirakoreshwa mu Bushinwa. Indege zo muri ubu bwoko urebye nta gihe zimaze ziguruka, zikaba zaratangiye gukoreshwa mu ngendo zo gutwara abantu mu ndege mu mwaka wa 2017.

Ubuyobozi bwa kompanyi ikora indege ya Boeing bwavuze ko "bubajwe cyane" n’iyo mpanuka ndetse buvuga ko bwohereje itsinda ryayo mu gufasha mu bijyanye na tekinike mu iperereza ku cyateye iyo mpanuka.

Ni iperereza riyobowe n’abategetsi ba Ethiopia bafatanyije n’amatsinda y’impuguke ziturutse muri kompanyi ikora indege ya Boeing ndetse n’urwego rw’igihugu rwa Leta Zunze Ubumwe z’Amerika rukora iperereza ku mpanuka z’ubwikorezi za gisivile.

Kuri uyu wa mbere, kompanyi y’indege ya Ethiopian Airlines yavuze ko yabaye ihagaritse indege zayo zo muri ubu bwoko nk’ingamba yo gukumira. Mbere yaho, iyi kompanyi yari yavuze ko igiye gukomeza gukoresha izi ndege.

Ni izihe kompanyi z’indege zindi zikoresha Boeing 737 Max 8?

Mu mateka y’iyi kompanyi Boeing ikora indege, indege zo muri ubu bwoko ni zo za mbere ziguzwe mu buryo bwihuse cyane yari ikoze, aho buri mwaka izirenga 4500 zitumizwa na kompanyi z’indege 100 zitandukanye.

Nkuko bigaragara ku rubuga rwa interineti rwa Boeing, kompanyi 16 z’indege zimaze kugura indege zo mu bwoko bwa 737 Max 8.

Zirimo SilkAir, SpiceJet, TUI Group, Aerolineas Argentinas, Air Italy na Flydubai.

Umuvugizi wa kompanyi Flydubai yabwiye ibiro ntaramakuru Reuters ko iri "gukurikiranira hafi" ibiri kuba.

Kompanyi nyinshi zo muri Amerika ya ruguru zikoresha indege zo muri ubu bwoko, zavuze ko ziri gukurikiranira hafi iperereza ku cyateye iyo mpanuka.

Kompanyi Southwest Airlines ifite indege 31 zo muri ubu bwoko, mu gihe American Airlines na Air Canada buri imwe ifite indege 24 zo muri ubu bwoko.

feature-top
feature-top

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

Iyandikishe ujye ubona Amakuru

Iyandikishe ujye ubona Amakuru