Tuesday . 21 May 2019

INKURU ZIGEZWEHO

  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

MGR SMARAGDE MBONYINTEGE YAGIZE ICYO AVUGA KU BUTINGANYI NO GUSAMBANYA ABANA MURI KILIZIYA GATOLIKA

Thursday 21 February 2019, by : MUTESI Scovia
    Yasomwe na

Ubutinganyi mu bihayimana, gufata ku ngufu no gushuka abana bakabasambanya, ni bimwe mu bikorwa by’urukozasoni bikomeje gusiga icyasha Kiliziya Gatolika, bidasize Abasenyeri n’abapadiri benshi bagahagarikwa ku mpamvu zirimo kubikora no kubireberera.

Umwaka wa 2018 waranzwe no gusaba imbabazi kwa Papa Francis no kwegura kw’abapadiri n’abasenyeri kubera ibyaha by’ubusambanyi. Urugero ni aho Abasenyeri bose bo muri Chili beguriye rimwe kuko nta cyo bakoze ku bapadiri bashinjwe ibyaha byo gusambanya abana.

Hari kandi Raporo y’Umushinjacyaha wa Leta ya Pennsylvanie muri Leta Zunze Ubumwe za Amerika, ikubiyemo ibikorwa by’urukozasoni by’abapadiri barenga 300 basambanyije abana barenga 1000. Havugwa kandi n’ibindi byaha byo gusambanya ababikira.
Musenyeri Smaragde Mbonyintege, yasobanuye ko ikibazo cy’ubutinganyi no gufata abana biterwa no gutakaza imyemerere ya Gikiristu ukajya mu mikorere y’Isi, igenda ikura yitaza Imana, ikimika ibikorwa by’iterambere ariko binyuranyije n’Ubukristu n’imyitwarire ya kimuntu.

Avuga ko ku rwego rwa Kiliziya Gatolika ku Isi, iki kibazo gihari ariko ari ikibazo cya sosiyete muri rusange atari ikibazo cya Kiliziya. Yongeraho ko atari ‘icyo gukura abantu umutima cyangwa ngo gipfobywe aho cyagaragaye’.

Ati “Sosiyete turimo irimo gukora iki kuri abo babikora, niba ababikora ku Isi harimo abantu 7% bo muri Kiliziya Gatolika, abandi 93% ko batabavuga bari hehe?”.
Akomeza agira ati “Ntabwo tuyobewe ko muri sosiyete turimo bimaze gukabya, noneho n’aba bapadiri bacu bavukira muri iyo sosiyete, ababigwamo ni abana b’iyo sosiyete bwite, twagombye kukireba mu rwego rw’Isi aho kukireba mu gace ka Kiliziya Gatolika”.
Kiliziya Gatolika ifata ubutinganyi nk’ikibazo gikomeye ari yo mpamvu yagihagurukiye ugikoze ikamuhana yihanukiriye.

Ubutinganyi no gufata abana muri Kiliziya mu Rwanda
Musenyeri Mbonyintege avuga ko ntawahakana 100% ko muri Kiliziya Gatolika mu Rwanda, ikibazo cy’ubutinganyi kitahaba, ariko ngo ntikiri mu bibazo by’ibanze biyikomereye.

Ati “Iyo dukoze amaperereza kugeza ubu muri Kiliziya mu Rwanda, ikibazo twabonye ni icy’umuntu umwe kandi na cyo hahise hafatwa ibyemezo bikomeye bimuhagarika binamubwira guhagarika umurimo wa Gisaserdoti. Hashize nk’imyaka itatu iki kibazo kirangiye kandi nyuma yacyo ntakindi turumva cyangwa twari twabona”.
Avuga ko imbaraga mbere na mbere zikwiye gushyirwa mu miryango kuko ari ho bikorerwa, by’umwihariko mu Rwanda hakarebwa niba ntabaturuka hanze yarwo baje kwigisha ingeso y’ubutinganyi, baba bahari bagakumirwa.

Ati “Hano iwacu mu Rwanda, aho guhanga Kiliziya amaso ngo ibintu byacitse ahubwo nibarebe kuko hari n’abantu baza bavuye hanze baje kubyigisha mu Rwanda, abo ntibari mu rwego rwa kiliziya nta naho bahuriye na yo”.

Asaba ababyeyi gutuza bakarera abana babo bagendeye ku muco Nyarwanda ukungahaye mu kunoza imikurire y’abana myiza, aho gutangira kubakangurira ibijyanye n’imibonano mpuzabitsina bakiri bato kuko ari naho hakomoka ingeso mbi.
Nta tandukaniro ry’uwihayimana n’umukristu w’umutinganyi
Musenyeri Mbonyintege asanga Uwihayimana n’umukristu usanzwe bagiye mu bikorwa by’ubutinganyi, ubusambanyi no gufata abana, ari bamwe kandi Kiliziya ibahana kimwe cyane cyane ko bamburwa inshingano zayo.

Msr Mbonyintege Smradge
Ati “Ntabwo mbatandukanya bose ni abagizi ba nabi, bakwiye guhanwa kimwe”.
Kuki ubutinganyi ari agahomamunwa muri Kiliziya?

Iyo muri Kiliziya Gatolika hagaragaye ikibazo cy’ubutinganyi no gufata abana biba agahomamunwa. Musenyeri Mbonyintege abihuza n’imbaraga ishyira mu kubuhana yihanukiriye, noneho ababukwirakwiza bakabyuririraho ngo bayice intege bayereke ko yananiwe bityo imanike amaboko.

Ati “Ababikora barashaka ko bakirwa bakemerwa muri sosiyete nk’abandi, niyo mpamvu ubona bikunda gusakuza cyane iyo bigeze ku bapadiri. Barashaka kuvuga ngo dore na Kiliziya yabirwanyije byayiguye nabi bityo nibatureke”.

Kurwanya ubutinganyi no gusambanya abana muri Kiliziya Gatolika, bikubiye mu ibaruwa ya Papa Paul VI yo mu 1968, yitwa Humanae Vitae, itarakiriwe neza n’ababikora kuko ngo irwanya uburenganzira bw’abantu, ikabuza ukwidagadura.
Musenyeri Mbonyintege avuga ko kuba hari uwihayimana umwe waguye mu gikorwa cy’ubutinganyi bidakwiye gufatwa nka byacitse, dore ko na we akurikiranwa agahanwa by’intangarugero.

Ati “Nonese niba uje muri Kiliziya irimo abapadiri 100 ugasangamo umwe cyangwa babiri baguye mu kibazo cy’ubutinganyi no gufata abana, ubwo ibintu byacitse?. Ariko babiri nibafatwe bahanwe kandi by’intangarugero. Tureke gukura abantu umutima kandi ntitunapfobye icyaha aho cyagaragaye”.

Uhamijwe ubutinganyi n’ibindi byaha byo gusambanya abana, iyo ari umuntu wari ufite inshingano arazamburwa. Niba yari umuntu wayoboraga abandi abikurwaho, agashishikarizwa gusaba imbabazi, guca bugufi kuko Kiliziya ikibona gukora ibi byaha nk’uburwayi n’imbaraga nke zidakwiye gutuma ubifite ajya imbere y’abandi ngo abayobore.

Src/IGIHE

feature-top
feature-top

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

Iyandikishe ujye ubona Amakuru

Iyandikishe ujye ubona Amakuru