Monday . 14 October 2019

INKURU ZIGEZWEHO

  • 4 June » Rubavu: Ibigo mbonezamikurire byazahuye ubuzima bw’abana basigwaga ku mupaka uhuza u Rwanda na DR Kongo – read more
  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

Nsanzamahoro Denis ’Rwasa’ bamusezeyeho bwanyuma

Monday 9 September 2019, by : Imfurayabo Pierre Romeo
    Yasomwe na

Umuhango wo gusezera nyakwigendera wabereye mu rugo aho yari atuye ku Kicukiro ahari hateraniye abo mu muryango we n’inshuti bahujwe n’imirimo itandukanye yagiye akora haba mu itangazamakuru, sinema n’ubundi bushabitsi.

Witabiriwe n’abayobozi batandukanye barimo Umunyambanga wa Leta muri Minisiteri y’Ububanyi n’Amahanga, Olivier Nduhungirehe, Umuyobozi w’Itorero ry’Igihugu, Bamporiki Edouard, na Jacques Nzabonimpa ushinzwe umuco muri RALC.
Umurambo we ukigezwa mu rugo havuzwe amasengesho yo kumusabira hanigishwa ijambo ry’Imana rikomeza abasigaye.

Uwigishije yavuze ko Nsanzamahoro Denis yari umuntu ukijijwe kandi wubaha Imana n’ubwo benshi batabikekaga bitewe n’umwuga we wo gukina filime.
Ati "Twigeze guhurira ku muryango wa Zion Temple ndatungurwa ndamubaza nti ‘ese n’aha ujya uhagera cyangwa uje gukina amafilime? Arambwira ati ‘ndasenga kandi nubaha Imana’.”

Ababanye na Nsazamahoro Denis kuva mu bwana bwe ku ishuri rya APE Rugunga kugera abaye icyamamare kubera sinema bahawe umwanya bavuga ibyo bari bamuziho byose.

Umuyobozi w’itorero ry’Igihugu Bamporiki Edouard na Amb. Olivier Nduhungirehe bitabiriye umuhango wo guherekeza Rwasa

Abenshi bahurije ku kuba yari umugabo ukunda abantu, agasabana akagira amashyengo kandi akaba umujyanama utayobya haba mu bo aruta n’abamurutaga.
Mugisha James uyobora Federasiyo y’abakinnyi ba filime mu Rwanda banakinanye muri filime yitwa “Ay’Urukundo”, yavuze ko Rwasa yitabye Imana mu gihe bari mu mushinga wo gukina filime ye yari yarise Pilato.

Iyi filime abakinnyi ba filime biyemeje ko bazayikora, mu rwego rwo gusigasira umurage we no kumuha icyubahiro.

Mugisha yavuze ko bahombye umuntu w’intwari benshi bafatiyeho urugero ndetse agatuma batangira gukina filime.

Ati “Yari ageze ku rwego rwo mpuzamahanga, iyo mu Rwanda bazaga kuhakinira filime yabaga afite umwanya we, ntabwo yari akiri ku rwego rwo kwitabira ijonjora [casting].

Mugisha James yavuze ko nta gushidikanya, Nsanzamahoro yagize iherezo ryiza kuko mu minsi ye ya nyuma yari yarahindutse n’isura y’umurambo we yabigaragazaga.

Ati “Nagize amahirwe yo gutunganya umurambo we, ikikwereka umuntu upfanye amahoro isura ye isubira nko mu myaka 18 na Denis niko amaze.”
Uncle Austin wavuze mu izina ry’abahanzi bafashijwe na Nsanzamahoro Denis yavuze ko bamenyanye bwa mbere bahujwe n’akazi kuri Radio Flash FM, amubera nk’umuvandimwe.

Uncle Austin wavuganye agahinda kenshi ku buryo yageze hagati agaturika akarira, yavuze ko Nsazamahoro yari umuntu wita ku muziki wa benshi ku buryo afite n’indirimbo ebyiri yakoze zigakundwa ari we umuhaye ibitekerezo.

Icyashenguye umutima w’uyu mugabo ni uburyo umunsi yitabye Imana, we n’indi nshuti ye bari bapanze kujya kumusura mu bitaro bamushyiriye igifenesi ku bw’amahirwe make bakira inkuru mbi ko yashizemo umwuka.

David Bayingana yavuze mu izina ry’abanyamakuru bakoranye na nyakwigendera yavuze ko mu minsi ye ya nyuma yamusabye kumushakira filime nyinshi n’indirimbo kugira ngo bimumare irungu mu burwayi bwe.

Baherukaga kuvugana ku wa Gatandatu ubwo yari ajyanye n’ikipe y’Igihugu Amavubi yari agiye gukina na Sychelles. Ibyishimo by’intsinzi bari batahanye byarangiriye muri Hoteli ubwo yamenyaga inkuru y’inshamugongo ko inshuti ye yitabye Imana.

Bayingana yavuze ko ‘Nsanzamahoro yabaye umwarimu wa benshi atarize uburezi, aba umujyana wa benshi ntaho yabyize, yakinnye filime ariko ntiyigeze akana mu buzima bw’abantu, sinzi niba yari afite miliyari kuri konti ariko yari ayifite mu nshuti ze’.

Abo biganye muri APE Rugunga bavuze ko yari umuntu ukunda gusabana cyane ndetse wabakoreye igikorwa cy’ubutwari akongera kubahuza nyuma y’igihe kinini bamwe baratatanye ku mpamvu zitandukanye zirimo na Jenoside yakorewe Abatutsi mu 1994.

Uwavugiye abo biganye yavuze ko bitari byoroshye ko bongera kwiyumvanamo ariko Nsanzamahoro yatumye bishoboka ndetse n’abagifite ingingimira zo kugaruka mu Rwanda yari yarabasabye kuzataha batashye ubukwe bwe yateganyaga.
Nsazamahoro Denis yitabye Imana afite imyaka 43, yari atararushinga ariko asize abana. Mu mirimo yakoze harimo gushushanya, kuvanga imiziki [DJ], kuyobora ibirori, aba umunyamakuru, akina anakora filime.

Iza yamenyekanyeho cyane harimo “Rwasa” yamwitiriwe, “Ay’Urukundo”, “100 Days”, “Some Times In April”, “Sakabaka” n’izindi. Muri Kamena yari yakinnye muri filime ishingiye ku gitabo Le petit Pays cya Gaël Faye.
Inkuru dukesha inyarwanda

feature-top
feature-top

Any message or comments?

Iyandikishe ujye ubona Amakuru

Iyandikishe ujye ubona Amakuru