Tuesday . 21 May 2019

INKURU ZIGEZWEHO

  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

Nyagatare:Abagore bamwe basigaye baboneza urubyaro rwihishwa

Thursday 25 April 2019, by : MUTESI Scovia
    Yasomwe na

By Scovia Mutesi
Abagore bamwe bavuganye n’ikinyamakuru Mamaurwagasabo, bavuga ko basigaye baboneza urubyaro rwihishwa ngo bitewe ni uko abagabo babo batabibemerera, bavuga kandi ko batabemerera kuboneza urubyaro bitewe ni uko ngo imiti bakoresha ibangiriza ubuzima.

Abo bagore kandi bavuga ko abagabo babo batabemerera bitewe ni uko ngo niyo byatwite batabafasha kujya kwipimisha kwa muganga, ingaruka abo bagore bahura na zo ngo ni uko ugasanga hari n’abagore babyarira mu rugo.

Umwe muri abo bagore witwa Mukamana utuye mu Murenge wa Gatunda yagize ati “iyo dushatse kuboneza urubyiruko, umugabo aranga ngo iyo miti itera ibibazo mu mibiri yacu, ugasanga abagabo batabishaka, kandi iyo twiyibye tukabikora rwihishwa ntacyo bidutwara’’.

Yakomeje agira ati ‘‘nkajye mfite abana 7 kandi tuba mu cyiciro cya 2 cy’ubudehe, nabonye ntabivamo mbikora atabizi, ubu maze imyaka 4 ntabyara ariko mbasha kujya mu b’imina nk’abandi bagore, mu gihe nabaga ntwite ntabonaga uko jyayo, kuko nta mbaraga zo gukora ngo mbone amafaranga yo gutanga, tukaba dusaba ko abagabo bangira abagore babo kuboneza urubyaro bari bakwiye kubihanirwa”.

Mu gihe abo bagabo bakomeje kuba inzitizi ku abagore babo mu kuboneza urubyaro, Leta y’u Rwanda yatangije ubukangurambaga bugamije guhindura imyumvire bise “BAHO NEZA” ku mibereho myiza y’umuryango, ubwo bukangurambaga bwatangiriye mu Karere ka Nyagatare mu Murenge wa Karama, aho abaturage bashishikarijwe kuboneza urubyaro no kurangwa n’isuku, bahabwa ibinini by’inzoka ku bana bafite umwaka umwe kugeza ku myaka 15, bahabwa kandi n’ifu ya Ongera ku bana bafite kuva ku mezi 6 kugeza ku myaka 5.

Bizimungu François umujyanama w’ubuzima mu Kigo Nderabuzima cya Rukomo, avugana n’ikinyamakuru ‘‘Mamaurwagasabo’’, avuga ko abagabo banga gufasha abagore babo mu kuboneza urubyaro no kwipimisha mu gihe batwite ko bagomba kwisubiraho bakareka iyo myitwarire mibi.

Yagize ati “usanga abagabo badafasha abagore babo mu kujya kuboneza urubyaro, ugasanga n’abagore babigendeyeno buhoro, kuko umugore aza kuboneza urubyaro ari uko yabyumvikanyeho n’umugabo, iyo haje uwihishe umugabo we nawe turamufasha ariko ntibikwiye, umugabo akwiye gufasha umugore we kuboneza urubyaro, akamufasha no gupimisha inda bari kumwe, kugira ngo bagirwe inama yo kuboneza urubyaro ariko abagabo batabyubahiriza bakwiye gufatirwa ibihano”.

Mushabe David Claudian Umuyobozi w’Akarere ka Nyagatare na we yagiriye inama abo bagabo, avuga ko ababikora ko bakwiriye kwisubiraho yagize ati “kuba hari abagabo badafasha abagore babo kuboneza urubyaro, si by’abagore gusa, abagabo na bo babigire ishingano zabo, naho kuba abagabo basabirwa ibihano, ntabwo twabaha ibihano bidateganwa n’itegeko ariko tuzakomeza kwigisha”.


Dr Gashumba Diane Minisitiri w’Ubuzima ubwo ya tangizaga ubukangurambaga muri Nyagatare

Dr Gashumba Diane Minisitiri w’Ubuzima yabwiye abari bitabiriye ubwo bukangurambaga ko kubyara abo badashoboye kurera, ko bifatwa nk’icyaha bakoreye umwana babyaye, yagize ati “natwe turi aha, twaboneje urubyaro abo dushoboye kurera, kugira ngo tubabonere ibyo bakeneye, babyeyi tubyare abazaba ba dokiteri, abajenerare, abubatsi bakomeye, kuko twabashije kubigisha bakagira ubwenge, kuko batagwingiye ariko iyo tubyaye abo tudashoboye kurera baziba kubera inzara kandi bazaba baragwingiye, ibyo tubyirinde’’.

Minisitiri w’Ubuzima yabwiye abagabo ko bakwiriye gufasha abagore babo kuboneza urubyaro, n’abagabo na bo yabasabye kwitabira kuboneza urubyaro, kugira ngo imibereho y’Abanyarwanda ibeho neza, avuga ko ari ni yo mpamvu babegereza amavuriro y’ibanze, aho batazajya bagenda ingendo ndende bashaka ubuvuzi.

Ikigo cy’ibarurishamibare mu Rwanda (NISR) kigaragaza ko ubu mu Rwanda rutuwe n’abaturage bagera ku ibihumbi 12,089,721, bivuze ko nta gikozwe bagera muri miliyoni 39 mu 2050.

Minisiteri y’ubuzima (Minisante), yerekana ko umubare w’abana bavuka buri mwaka ukomeje kwiyongera, kuko ibarura rya kane ry’abaturage ryo mu 2012, ryerekana ko abagore bo mu Rwanda babyara abana barenga ibihumbi 300 ku mwaka, naho impuzandengo y’abana ku mugore umwe ikaba abana 4.2.

Iyi Minisiteri ivuga kugira ngo umuvuduko w’ubwiyongere bw’abaturage bugabanuke, ko impuzandengo y’abana ku mugore 1 ibe abana 2.3, abashakanye bakwiye gukoresha uburyo burambye bwo kuboneza urubyaro.

Icyo cyegeranyo cyerekana ko ubwiyongere bw’abaturage bwagiye buzamuka uko imyaka ishira indi ikaza kandi ubuso bw’igihugu bwo butiyongera.

feature-top
feature-top

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

Iyandikishe ujye ubona Amakuru

Iyandikishe ujye ubona Amakuru