Friday . 19 July 2019

INKURU ZIGEZWEHO

  • 4 June » Rubavu: Ibigo mbonezamikurire byazahuye ubuzima bw’abana basigwaga ku mupaka uhuza u Rwanda na DR Kongo – read more
  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

Perezida Kagame:Abayobozi bakwiye kugira ipfunwe ryo kuzereka Imana abarwayi ba Bwaki

Monday 14 January 2019, by : MUTESI Scovia
    Yasomwe na

Perezida Kagame yavuze ko bidakwiye ko umuyobozi abaho neza mu gihe abo areberera bafite ibibazo, ashimangira ko biteye isoni kumubona ashyiriye Imana abaturage yamuhaye kuyobora barwaye bwaki.

Yabigarutseho kuri iki Cyumweru, tariki ya 13 Mutarama 2019, mu masengesho yo gusengera igihugu azwi nka National Prayer Breakfast yabereye muri Kigali Convention Centre.

Perezida Kagame yavuze ko kuyobora abantu bameze nabi wowe umeze neza, biteye isoni.

Yagize ati “Njye rwose mpora mfite impungenge ku kuzashorera abantu barwaye bwaki, bashonje, bameze nabi nkavuga nti ‘Mana ng’aba abantu bawe wanshinze’. Ntabwo umutima wanjye ujyanye na byo. Numva bidakwiye. Kugira ngo utazashorera abantu bameze batyo, ikintu cya mbere ni uko buri muyobozi bikwiye kumutera isoni. Mugomba kugira isoni. Iyo wemera indangagaciro ukazibura bikwiriye kugutera isoni.”

Yakomeje avuga ko iterambere rirambye rikwiye gushingira ku ndangagaciro y’imikorere hagati y’abayobozi n’abayoborwa.
Ati “Kugira ngo bishoboke hagomba kubaho imikorere n’imibanire hagati hagati y’abayobozi n’abo bayobora. Abayoborwa na bo bagomba gushyiraho akabo, bakumva ko usibye abayobozi badushinzwe ngo tutamera gutya natwe dukwiye kumva ko hari icyo dukora.”

Perezida Kagame yavuze ko bidashoboka ko umuntu yinjizwamo ibintu adashaka, ahubwo kuva mu nzego z’ibanze buri wese akwiye kumva ko ari inshingano ze guhindura ubuzima bwe.
Rev Rutayisire Antoine wo mu Itorero ry’Abangilikani mu Rwanda yatanze inyigisho yagarutse ku “Mbaraga zo gukorera hamwe mu buyobozi buzana impinduka.’’

Yagize ati “Zaba imbaraga z’igihugu, zaba iz’umuryango, zaba iz’itsinda iryo ari ryo ryose usanga zubakira ku guhuriza hamwe no kuganisha hamwe. Bibiliya ivuga neza mu Itangiriro mu gice cya 11, ubwo abantu bubakaga umunara w’i Babeli, ngo Imana yaramanutse yitegereza ibyo bari kubaka ivuga ijambo rikomeye cyane, ngo aba bantu ni ubwoko bumwe, bafite n’ururimi rumwe , icyo bazagerageza gukora cyose ntikizabananira bagishatse. Ntabwo uwo munara Imana yawuteje umutingito, ntabwo yawukubitishije inkuba kugira ngo usenyuke yatabatatanirije indimi umurimo urahagarara.”

Yabajije abapasiteri n’abashumba bahuje umwuga icyo bazabwira Imana mu gihe bazayishyikiriza abakirisitu bayoboye ariko babayeho nabi.

Ati “Umuntu wicaranye n’abo ayobora, akabona bicaye mu mwanda, bigaragura mu nzara, akabona barwaye imvunja agakomeza kureberera ntaba ari mu buyobozi buzana impinduka.’’
Yavuze ko ubuyobozi buzana impinduka bugomba gukorera hamwe, burangwa no kugira gahunda no gukurikirana ubudacogora inshingano zabwo.
Aya masengesho ngarukamwaka yabaye ku nshuro ya 23 ategurwa n’Umuryango Rwanda Leaders Fellowship.

Kuba umukuru w’Igihugu avuga bwaki nuko hakigaragara abana bafite imirire mibi.
Imirire mibi mu Rwanda iri kuri 38% ku abana bari munsi y’imyaka itanu, nkuko bigaragazwa n’ubushakashatsi bwa 2015 bwakozwe na Ikigo kibarurishamibare na Minisiteri y’ubuzima hamwe ICF International
Intara y’Uburengerazuba niyo ifite abana bari munsi y’imyaka itanu bafite imirire mibi, aho 42% by’abana bari muri iyintara, Nyaruguru nayo iri muturere tw’Intara ya majyepfo dufite imirire mibi iri heju.

Uko uturere duhagaze twiyi ntara y’Uburengerazuba mu mirire mibi hamwe natumwe mu turere tw’intara ya mumajyepfo tuza imbere aritwo Nyaruguru,Nyamagabe
uko igishushanyo kibyerekana


Rutsiro iri kuri 57%
Nyamagabe iri kuri 42%
Nyabihu iri kuri 39%
Nyaruguru 37%
Rusizi 36%
Karongi 35%
Nyamasheke 35%
iyi nimibare y’abana bari munsi yimyaka itanu.

Amasengesho yitabiriwe n’abanyamadini batandukanye, abayobozi muri Guverinoma, abikorera ku giti cyabo, abagize sosiyete sivile n’abahagarariye ibihugu n’imiryango mpuzamahanga mu Rwanda.

feature-top
feature-top

Any message or comments?

Iyandikishe ujye ubona Amakuru

Iyandikishe ujye ubona Amakuru