Friday . 14 August 2020

INKURU ZIGEZWEHO

  • 4 June 2019 » Rubavu: Ibigo mbonezamikurire byazahuye ubuzima bw’abana basigwaga ku mupaka uhuza u Rwanda na DR Kongo – read more
  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

Ruhango: Abangavu bishimira icyumba cy’umukobwa bahawe na GIKURIRO cyabafasha mw’ isuku igihe cy’imihango

Monday 2 March 2020, by : MUTESI Scovia
    Yasomwe na

Abanyeshuri b’abakobwa by’umwihariko abangavu bageze mu gihe cyo kujya mu mihango, bo ku rwunge rw’amashuri rwa Nyarugenge ruherereye mu murenge wa Kinazi ho mu karere ka Ruhango batangaje ko bishimira icyumba cy’umukobwa cyaje gikuraho imbogamizi bahuraga nazo zirimo gusiba ishuri mu gihe hagiraga ujya mu mihango ari ku ishuri, ubu bakaba batagisiba amasomo.

Bamwe mu bangavu bageze mu gihe cyo gukoresha icyo cyumba cy’umukobwa ku rwunge rw’amashuri rwa G.S Nyarugenge, bavuga ukuntu mbere batarabona icyumba cy’umukobwa, mu 2019, hari abasibaga ishuri kubera kujya mu mihango badafite aho bisukurira kandi ikigo akarere karagihaye ibikoresho.

Dushime Fideline, w’imyaka 13 yiga mu mwaka wa gatandatu amashuri abanza kuri icyo kigo, yagize ati “Iyo umukobwa yagiye mu mihango ajya kureba duwayene (doyenne) w’abanyeshuri cyangwa umwalimu ushinzwe icyumba cy’umukobwa akamufungurira, akajya kwitunganya, wenda niba mu nda hari kumurya cyangwa umutwe akaba aruhutseho akanya gato ubundi agasubira mu masomo.”
Mugenzi we Irakoze Noella, w’imyaka 15 nawe wiga mu mwaka wa gatandatu B, avuga uko uwatungurwaga n’imihango yabigenzaga.

Ati “Iyo umukobwa wagiye mu mihango amaze kugera muri iki cyumba, bamuha amazi bakamwereka uko bakaraba igihe ari ubwa mbere agiye mu mihango, bakamuha impapuro za Cotex (impapuro z’isuku ku mukobwa), bakamuha akenda kimbere yambarana bakamuha n’amavuta akisiga.

Mbere kino cyumba kitaraza, hariya hirya mu nzu turiramo twari dufite ibikoresho ariko nta bwongero; waragendaga bakaguha ibikoresho bikaba ngombwa ko wataha mu rugo cyangwa se byaba bitararengerana ukajye nko ku bwiherero ukambara izo cotex uagsubira mu ishuri.”

Umunyeshuri uhagarariye abandi Mutoni Marie Gorethi, yiga mu mashuro makuru muri ii kigo mu ishami ry’Indimi n’ubuvanganzo; yashimangiye ko icyo cyumba cyabafashije cyane mu gutuma nta mukobwa wagiye ucikiriza amasomo ye ngo atahe kubera kubura uko aniza isuku mu gihe k’imihango.

Ati “Iki cyumba kitaraza ibikoresho twifashishaga byabaga biri mu nzu turiramo; aho hantu rero hateraga isoni abanyeshuri benshi kuko ni ku karubanda, uhise wese bahita bamubona, n’uwinjiragamo atari igihe cyo kurya bahitaga bamenya icyabaye, bati runaka agiye muri Ferectoire (aho barira), buriya yagiye mu mihango, yagera no mu ishuri bakamuserereza.

Ubwo uwo munsi ntiyigaga neza, uwo kandi ni uwabaga yabashije gutinyuka ariko hari n’abandi bavugaga bati reka reka, nge muri Fere abantu bose birirwe bantaranga ngo nagiye mu mihango? Agahitamo kwitahira, kandi niba atashye saa sita kuko harimo n’abataha kure n’uwabaga ataha hafi ntiyari guhita agaruka, yaragendaga agahita yiryamira akagaruka umunsi ukurikiyeho; ayo masomo yose urumav koo atongeraga kuyiga.”

Ibivugwa n’aba bangavu bishimangirwa n’umwalimukazi ushinzwe iki cyumba, Mutuyimana Francoise, nawe uvuga ko bitari byorohereye abakobwa mu gihe yagiye mu mihango atiteguye ariko ubu mu minota itageze kuri 15 umukobwa usabwa koga aba yongeye gusubira mu ishuri.

Ati “Nubwo twabaga dufite ibyo bikoresho mbere, hari imbogamizi kuko ntabwo abana babashaga kuba bakaraba; umwana yagiraga ikibazo yaba wenda yananduje imyenda ye ntabe yabona uko akaraba ngo asubire mu ishuri neza. Ariko tumaze kubona iki cyumba Gikuriro Program yaduhaye, byagize impinduka nyinshi kandi nziza, abana barakigana ari benshi kuko umwana niba agize ikibazo araza agakaraba, dufite ubwogero, kirimo ibikoresho byose kuko niba yiyanduje afata indi jipo akambara, akisiga. Ashobora noneho no kuba aribwa mu nda nabwo araryama akaruhuka.”

Aba banyeshuri bavuga ko nubwo ibikoresho bihari bihagije byo kwifashisha mu gihe bagiye mu mihango bari ku ishuri cyangwa igihe bakeneye guhindura ibikoresho by’isuku yabo, bavuga ko hakiri imbogamizi y’uko uvuye mu rugo iwabo nta bushobozi bwo kumugurira ibitambaro bigezweho by’isuku (Cotex) bigatuma akoresho udutambaro tw’imyenda akagera ku ishuri twamwanduje, akiga umutima utari hamwe.

Nsanzimana Jean Bosco, umuyobozi w’ikigo, avuga ko iyo mboamizi yumvikana ku bana baturuka mu miryango ikennye, ariko mu nama itaha y’ababyeyi n’ikigo bazabiganiraho bakareba icyakorwa ngo umwana ugiye mu mihango abone ibikoresho bimuhagije haba mu rugo no ku ishuri.

Urwunge rw’amashuri rwa Nyarugenge ni kimwe mu bigo 8 Gahunda ya Gikuriro mu karere ka Ruhango yafashije ikabiha icyumba cy’umukobwa cyo kunoza isuku mu gihe k’imihango, bigatuma umukobwa kurikira amasomo amasaha amwe na musaza we.

feature-top
feature-top

Any message or comments?

Iyandikishe ujye ubona Amakuru

Iyandikishe ujye ubona Amakuru