Friday . 19 April 2019

INKURU ZIGEZWEHO

  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more
  • 17 July 2018 » How immigrants helped France win the World Cup – read more
  • 23 April 2018 » Pascal Nyamurinda wayoboraga Umujyi wa Kigali yeguye ku mirimo ye – read more
  • 23 April 2018 » Minisitiri Musoni James Yakuwe Muri Guverinoma – read more

Rwamagana: bamwe mu baturage bamenye ibibi byo kurarana n’amatungo

Wednesday 20 March 2019, by : MUTESI Scovia
    Yasomwe na

By Jean Claude HABIMANA
Abaturage basaga gato 800 b’akarere ka Rwamagana bararanaga n’amatungo bemeza ko nyuma yo gusobanurirwa ibibi byo kurarana n’amatungo byabaga byiganjemo umwanda ukurura imbaragasa, kurwara inda n’amavunja bafashe umwanzuro wo kuraza amatungo yabo hanze mu biraro.

Gishari ni umwe mu mirenge igize akarere ka Rwamagana, igaragaza ko mu mwaka wa 2017-2018 wari ufite abaturage bagera kuri 895 bararanaga n’amatungo yabo yiganzemo ihene, intama, inkwavu, inkoko n’inka.

Alivera Nyiramagare w’imyaka 70 y’amavuko utuye mu mudugudu wa Nyagakombe, Akagali ka Ruhunda, Umurenge wa Gishari Akarere ka Rwamagana, avuga ko yigeze kurwaza amavunja umuryango we wose biturutse ku mwanda waturukaga ku matungo yarazaga mu nzu none ngo ubu aho afatiye umwanzuro wo kuraza amatungo hanze nta mvunja zikigaragara iwe.

Ati “Narwajije amavunja ku buryo hano iwanjye byabaga bigoranye kubona umuntu utarwaye amavunja. Imbaragasa zo zari nk’inshishi aha ngaha. Ubusanzwe aya mavunja yaterwaga no kutagira inzu ifite sima mu nzu noneho hakiyongeraho no kurarana n’amatungo mu nzu. Njye mbere nararanaga n’ihene zanjye ariko ubu sinshobora kurarana nayo kirazira.”

Umurenge wa Gishari ugizwe n’utugari turindwi, ukaba warafashe iya mbere mu gukusanya amakuru y’abaturage bose bararanaga n’amatungo, ku bufatanye n’abanyamadini, abagera kuri 895 bashishikarizwa kuraza amatungo yabo hanze, ubirenzeho agacibwa amande.

Uko abaturage batuye utugari two mu Murenge wa Gishari babanaga n’amatungo 2017-2018

Mukambonyi Doroth w’imyaka 50 avuga ko ashimishwa no kuba atakirarana n’amatungo kandi ko kurwara imvunja byahindutse amateka.
Ati “Nkuko ubibona inka yanjye nyiraza muri iki kiraro kirazira kuyiraza mu nzu. Hano dufite inzego zishinzwe umutekano zirara irondo kuburyo nta muturage utaka ngo bamwibiye itungo, ubwo se naba ndarana n’amatungo nshaka iki. Byari bibabaje kubona urugo rwose umugabo n’abana bose barwaye amavunja, ariko aho ubuyobozi butwigishije kurandura umwanda mu mazu yacu duca amatungo aho turara, ubu amavunja yabaye amateka.”

Ildephonse Bimenyimana, ushinzwe irangamimerere mu Murenge wa Gishari avuga ko kwegera abaturage bakabereka ingaruka mbi zo kurarana n’amatungo byatanze umusaruro.

Ati “Ntibyari byoroshye kubona abaturage bagera kuri 895 bararanaga n’amatungo bose bahinduka ubu amatungo akaba arara hanze. Twifashishije kujya tumanuka hasi ku mudugudu tukabarura ingo zirarana n’amatungo noneho aba ari nazo turushaho kwigisha ibibi byo kurarana n’amatungo. Benshi mu baturage baratwumvise ku buryo abatari bafite ibiraro bagurishaga amatungo bafite cyangwa se bakayaragiza kuri bagenzi babo bafite ibiraro.”

Umutoni Jeanne umuyobozi w’akarere ka Rwamagana wungirije ushinzwe imibereho myiza avuga ko biciye mu mugoroba w’ababyeyi bakangurira abaturage kugira isuku baca ukubira kurarana n’amatungo mu ngo zabo, ahubwo bakayubakira ibiraro hanze bigezwe.

Ati “Usibye kuba twaresheje umuhigo wo kuba tutakigira abaturage bararana n’amatungo, ubu tumanuka hasi tukegera abaturage tukabashishikariza kwita ku isuku y’ibiryamirwa, ibyo bambara, ibyo bariraho ndetse n’ibyo barya.”
Akarere ka Rwamagana kagizwe n’Imirenge 14, Utugali 82 n’Imidugudu 474, Ingo 74175 kakaba gatuwe n’abaturage bangana 313,461.

feature-top
feature-top

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

Iyandikishe ujye ubona Amakuru

Iyandikishe ujye ubona Amakuru