Monday . 14 October 2019

INKURU ZIGEZWEHO

  • 4 June » Rubavu: Ibigo mbonezamikurire byazahuye ubuzima bw’abana basigwaga ku mupaka uhuza u Rwanda na DR Kongo – read more
  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

UKO INDANGAMUNTU IRIMO AMOKO YAKUWEHO NYUMA YO KUBA IGIKORESHO MU GUTIKIZA UBUZIMA BW’ABATUTSI

Friday 12 April 2019, by : MUTESI Scovia
    Yasomwe na

By Imfurayabo Pierre Romeo
Amateka y’u Rwanda agaragaza ko mbere y’umwaduko w’abakoloni, icyitwaga Abahutu, Abatutsi n’abatwa byari ibyiciro by’abanyarwanda hagendewe ku butunzi, ku buryo umuntu yashobora kuva muri kimwe akimuka akajya mu kindi.

Nyamara uko iminsi yagiye ishira, Ababiligi mu 1932 babihinduye ubwoko ndetse batangira kubushyira mu byangombwa by’Abanyarwanda bitaga “ibuku” yaje kuvamo indangamuntu y’urupapuro nayo yariyanditsemo amoko, isimbuzwa inshya atarangwamo.

Bayifashishije cyane nk’iturufu yo kwereka abanyarwanda ko hari icyo bataniyeho, mu kubyumvikanisha bifashisha gupima abantu nk’indeshyo, imiterere y’amazuru n’ibindi. Ibi ntaho byari bihuriye n’ukuri kuko hari ubwo wasangaga abantu bavukana ariko ubwoko bwabo atari bumwe.

Iyi ndangamuntu irimo amoko yanifashishijwe cyane muri Jenoside yakorewe abatutsi, aho kuri bariyeri zinyuranye zashingwaga, Interahamwe zayibazaga zishaka abo zica.

Mu kiganiro cyihariye yagiranye na IGIHE dukesha iyi nkuru, Mugesera Antoine wigeze kuba umusenateri ubu akaba umwe mu bagize Uwego rw’Igihugu Ngishwanama rw’inararibonye, yavuze ko asanga iyo mbere hose hatangwa indangamuntu zitagira ubwoko, byari kugabanya ubukana bwa jenoside yakorewe Abatutsi mu 1994.

Yabanje kugaruka ku ikurwaho ry’indangamuntu zirimo amoko, ryahinduye byinshi urebye uko abanyarwanda bahuritse kubera amoko.

Yagize ati “Byavuye i Arusha [mu masezerano y’amahoro], ntabwo abantu bari kuza ngo bongere biyandikishe umwe abe Umuhutu, undi Umutwa, undi Umututsi, undi Umwega, undi Umuzigaba… ntibyari gukunda, baravuze bati mwese muri abanyarwanda.”

Mugesera avuga ko icyo gihe yahawe kuba Umujyanama wa Minisitiri w’Intebe wungirije akaba na Minisitiri w’Ubutegetsi bw’Igihugu, Alexis Kanyarengwe.

Yakomeje ati “Haje icyo gitekerezo cyo kuvuga ngo nimuhindure indangamuntu mushyireho inshya, bati ‘ni wowe ugishinzwe genda ufatanye na bagenzi bawe ukiyobore,’ turakiyobora kirakunda.”

Icyo gihe ngo hari izo basanze zikoze, izindi batumiza impapuro muri Espagne bazikorera mu Rwanda.

Yakomeje ati “Byatumye n’abanyarwanda ugenda ntawe ukureba ngo wowe uri uwahe, uri uwo mu Ruhengeri, ku Gisenyi, wowe uri Umututsi, Umuhutu […] Twagize amahirwe ubungubu aho ushaka hose ugenda ari umunyarwanda nta kibazo.”

Ibyo bitandukanye na kera, aho uretse indangamuntu, n’imodoka yagiraga ikiyiranga hashingiwe kuri perefegitura nyirayo akomokamo, ku buryo aho yagendaga hose yabaga yiranga.

Mugesera avuga ko ivanwaho ry’izi ndangamuntu iyo riza kuba mbere, byari kugabanya ubukana bwa Jenoside kuko abicanyi byabihutiraga kubona abatutsi.

Ati “Cyane, yari kugabanya ubukana bwayo byanze bikunze, kuko cyari ikimenyetso simusiga kigaragaza ubwoko bw’umuntu. Iby’uburebure, ubugufi byose byari ukubeshya, ahubwo agapapuro kanditse niko gakuru kuko ikindi cyose wakwibeshya.”

Antoine Mugesera ubwo yaganiraga n’umunyamakuru w’igihe
Nyuma y’ibihe bya Jenoside u Rwanda rwaciyemo, Mugesera avuga ko hari intambwe imaze guterwa mu bumwe n’ubwiyunge bw’abanyarwanda.

Ati “Wenda abantu si inshuti zo guhoberana buri kanya ariko abanyarwanda babanye neza babanye mu mahoro. Ubumwe n’ubwiyunge ni ukubanza kubana mu mahoro. Wenda si 100% kuko haracyari ingengabitekerezo, haracyari ubukene haracyari urugendo, ni ukuba maso hagira ushaka guhungabanya umutekano w’abanyarwanda, ubumwe n’ubwiyunge bw’abanyarwanda, umuntu akamucyaha akamucubya.”

“Haje ingengabitekerezo mbi abantu ntibabura ababakira, tugomba kuba maso, abantu bagomba kuba maso cyane cyane mwe mukiri bato mugomba kuba maso ntimwandure kuko ni uburozi burandura.”

Mugesera asanzwe ari umwanditsi w’ibitabo bitandukanye, igiheruka ni "Rwanda 1896-1959, la Désintégration d’une Nation”, kigaragaza uko virusi y’irondomoko yinjiye mu banyarwanda ikabageza kuri Jenoside yakorewe Abatutsi.

Ubu akomeje icukumbura ku cyo abanyamakuru b’Abafaransa bandikiraga abaturage b’icyo gihugu mu gihe cya jenoside. Avuga ko yafashe ibinyamakuru bigera kuri 20 byandikwaga muri kiriya gihe akabisoma, agamije kureba ibyanditswe ubwo Jenoside yatangiraga, ku wishe Juvenal Habyarimana, ku ihungishwa ry’abazungu mu 1994, operation Turquoise n’ibindi.

Ati “Ko ingabo z’abafaransa zari mu Rwanda zagize uruhare muri ibi n’ibi, abaturage babo barabimenye cyangwa byari bizwi gusa na Perezida wabo François Mitterrand hamwe na Minisitiri w’Intebe we Alain juppé?”

Avuga ko igitabo gikubiyemo ibi byose ngo yarangije kucyandika, hasigaye utuntu duke gusa two gukosora ubundi akagishyira ku mugaragaro.

Source/igihe.com

feature-top
feature-top

Any message or comments?

Iyandikishe ujye ubona Amakuru

Iyandikishe ujye ubona Amakuru