Friday . 30 October 2020

INKURU ZIGEZWEHO

  • 4 June 2019 » Rubavu: Ibigo mbonezamikurire byazahuye ubuzima bw’abana basigwaga ku mupaka uhuza u Rwanda na DR Kongo – read more
  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

Umuryango Save Generations werekanye uko COVID-19 ishobora gutuma hari abakobwa badasubira ku ishuri

Thursday 15 October 2020, by : MUTESI Scovia
    Yasomwe na

Umuryango utari uwa leta Save Generations Organisation, uharanira iterambere ry’umwana, urubyiruko n’umugore, werekanye ibintu bitandukanye urubyiruko by’umwihariko rw’abakobwa banyuzemo kuva abanyeshuri bose basubira mu ngo hagamijwe kwirinda gukwirakwiza icyorezo cya Coronavirusi (COVID-19), bikaba byaratumye hari abatewe inda z’imburagihe n’abagiye mu yindi mirimo bishobora gutuma batazasubira ku ishuri nyuma y’amezi asaga arindwi bari iwabo.

byatangajwe mu nama y’ubuvugizi yabereye mu karere ka Gasabo tariki ya 15 ukwakira 2020, yahuje abayobozi mu nzego z’ibanze, urwero rw’igihugu rushinzwe iyubahirizwa ry’uburinganire bw’abagabo n’abagore GMO, abo mu nama y’igihugu y’abagore n’abo mu nama nkuru y’abana, abahgarariye ibigo by’amashuri, ababyeyi babirereramo na bamwe mu banyeshuri b’abakobwa n’abahungu bahagarariye abandi. ubuvugizi nkubu bwatangirijwe mu karere ka Kamonyi yariki ya 7 ukwakira 2020.

uyu muryango uri mu buvugizi nyuma y’ubushakashatsi wakoreye mu karere ka Kamonyi na Gasabo ku bana b’abakobwa n’abahungu biga, ababyeyi, abayobozi mu nzego z’ibanze n’abandi hagamijwe kumenya ingaruka icyorezo cya COVID-19 cyagize ku bana b’abakobwa kuva bagera mu ngo amashuri asubitswe hakaba hashize amezi arenga arindwi bari mu buzima butandukanye.

Umushakashatsi akaba n’inzobere mu by’ubuzima Dr. Anicet Nzabonimpa ubwo yamurikaga ibyavuye muri ubu bushakashatsi bwa Save Generations Organization, yagaragaje ko muri rusange COVID-19 yagize ingaruka ku rubyiruko rw’u Rwanda rugera kuri 3 626 444 muri bo 814 085 b’abakobwa ni bo bari hanze y’ishuri muri ibi bihe.

Mu babajijwe mu bushakashatsi 36 bemeje ko hari ubukene mu miryango, 24 bo bakora imirimo ivunanye, 7 bemeje ko abana bataye gahunda mu mutwe bamwe banakoresha ibiyobyabwenge naho 10 bashyingiwe bakiri bato mu gihe 54 batwaye inda.

Umuyobozi Mukuru w’Umuryango Save Generations, Nyinawumuntu Yvette, yavuze ko aho bakoze ubushakashatsi abana bababwiye byinshi byiganjemo iby’abana b’abakobwa batwaye inda n’indi mirimo bagiyemo idakwiye.

Ati “Cyane cyane mu bigendanye n’abana mu gutwara inda twibanze cyane muri Gasabo, twaganirije ibyiciro by’abana, ababyeyi abarezi ndetse n’ubuyobozi bw’inzego z’ibanze.

Abana ubwabo batubwiye ko bazi bagenzi babo batwaye inda z’imburagihe, hari abana nanone batubwiye ko bazo bagenzi babo bagiye mu mirimo yo mu rugo i Kigali nk’abo muri Kamonyi; nk’abo muri Gasabo batubwiye ko abahungu bazi bagenzi babo batangiye akazi mu nganda. Muri kamonyi nanone batubwiye ko ho abahungu bacukura mu birombe by’amabuye ndetse hari n’abana batubwiye ko bafite abaturanyi batwise bagakuramo inda mu buryo butemewe, bakagira ibibazo.”

Yakomeje agira ati “Hari n’abatubwiye ngo mu rugo iwabo bafite ubukene bwinshi ngo ku buryo badafite ikizere ko bazasubira ku ishuri bijyanye nuko ababyeyi babo bababwira ko batazabona ibikoresho kugira ngo babashe kujya mu ishuri.”

Uyu muyobozi yakomeje avuga ko mu babyeyi babajije hari abagizweho ingaruka na COVID-19 bibagabanyiriza amikoro mu miryango.

Ati “Ngo guhungabanya ubukungu bw’umuryango byatumye ababyeyi bamwe na bamwe barimo kubona amashuri natangira bamwe batazohereza abana ku ishuri; bakibaza ngo ese impuzankano tuzazikurahe, ibikoresho by’ishuri bizava he, ko bizasaba ako abana barira ku ishuri ni amafaranga angahe tuzatanga kugira ngo abana barire ku ishuri.”

Ku ruhande rwa Minisiteri y’uburezi, umukozi wayo ushinzwe ubuzima mu mashuri, Tuyishimire Froduard, yavuze koizo mbogamizi zose abashakashatsi babonye nabo bazumva kandi bari baziteguye, gusa ngo hari byinshi bigiye gutanagrizwa ababyeyi n’abana muri rusange bizatuma abana basubira ku ishuri kandi bakiga batekanye.

Ati “Dusanzwe tuzi ko hari ibihari byatewe na zimwe mu ngaruka z’icyorezo cya COVID-19, ndetse hari na gahunda minisiteri n’abandi bafatanyabikorwa bayo bateguye kugira ngo bisubize ibyo bibazo. Harimo nka gahunda ya Garuka ku Ishuri dufite iri gushyirwa mu bikorwa ariko izashyirwamo imbaraga nyinshi guhera ku itariki ya 19 Ukwakira 2020 ikaba ari gahunda yo gukangurira abanyeshuri gusibira ku ishuri “Back to School”.

Uyu mukozi yasobanuye ko mu bikorwa by’iyo gahunda harimo n’ibireba abana bafite ibibazo by’umwihariko byo kubafasha kugaruka ku ishuri.

Ati “Muri abo bana rero bafite ibibazo by’umwihariko harimo n’abakobwa batwaye inda zitateguwe, harimo abo tuzakurikirana. Ubu minisiteri y’uburezi iri kwegeranya imibare y’abahuye n’icyo kibazo mu turere twose, hari ayo izabona mbere, hari n’ayazagaragara abanyeshuri bamaze gutangira ariko buri kibazo gifite uburyo kizakemuka muri ubu bukangurambaga no muri gahunda za leta zisanzweho.”

Ku ruhande rw’abayobozi b’ibigo by’amashuri, hari abemera ko kugeza ubu bamaze kumenya ko hari abakobwa bamaze gushaka abagabo bamaze n’abatwite mu buryo budateganyijwe.

Nkurunziza Jean Bosco ni umuyobozi w’ikigo cya G.S Kabuga Catholique, yagize ati “Hari amakuru ngenda mfata mu bandi bana bambwira ko abanyeshuri bamwe batwite hari ndetse n’abashatse abagabo ku buryo butateguwe kubera ingaruka za COVID-19. Ni ikibazo gikomeye kuko na na mbere ya COVID-19 havagamo nk’umwe agatwara inda akabanza akabyara, abenshi nta bushobozi babaga bafite tugakora ubuvugizi akaba yagaruka ku ishuri.

Ubu bishoboka ko baba na benshi, murumva ko nihatabaho ubukangurambaga n’ubufatanye bw’inzego zose ntabwo abo bana bagaruka.”

Ku ruhande rw’urubyiruko hari abagaragaje ko mbere yo gushaka abanyeshuri bahuye n’icyo kibazo ngo basubire ku ishuri bakwiye kubanza kuganirizwa, umwana akumva uruhare rwe ariko akanagirwa inama zimurinda kuzahungabana mu gihe azaba ari kumwe n’abandi kandi hari inagruka COVID-19 imusigiye mu masomo ye.
MUTUNGIREHE SAMUEL

feature-top
feature-top

Any message or comments?

Iyandikishe ujye ubona Amakuru

Iyandikishe ujye ubona Amakuru