Mama U rwagasabo

Spain yafunze ikirere cyayo ku ndege z'intambara z'Amerika

Chadadi Habimana — 2026-03-31T08:33:08Z

Minisitiri w'ingabo wa Espagne Margarita Robles yavuze ko icyo gihugu cyafunze ikirere cyacyo ku ndege z'Amerika zirimo kugaba ibitero kuri Iran.

Yagize ati: “Ntituzemera ikoreshwa rya Morón na Rota [ibigo bya gisirikare] ku bikorwa ibyo ari byo byose bijyanye n'intambara muri Irani.”

Yongeyeho ko Espagne “ibi yabisobanuriye neza leta y'Amerika guhera mu ntangiriro”.

Minisitiri w'ububanyi n'amahanga wa Espagne José Manuel Albares yavuze ko intego y'iki cyemezo ari “ukudakora ikintu na kimwe gishobora gutuma ibintu bifata indi ntera muri iyi ntambara”.

Umutegetsi wo mu biro bya perezida w'Amerika – byitwa White House – yabwiye BBC ko ingabo z'Amerika zirimo “kugera cyangwa kurenga ku ntego zazo zose zo muri ‘Operation Epic Fury' [izina Amerika yahaye iyi ntambara kuri Iran, risobanuye ‘uburakari burenze'] ndetse ntizicyeneye ubufasha bwa Espagne cyangwa ubw'undi muntu uwo ari we wese”.

Minisitiri w'intebe wa Spain Pedro Sanches yanze kwivanga mu ntambara ya Iran.

Mbere, Perezida w'Amerika Donald Trump yakangishije gukomanyiriza Espagne burundu mu bucuruzi kubera kwamagana intambara yo muri Irani kwayo.

Kuva intambara itangiye mu mpera ya Gashyantare (2) uyu mwaka, Minisitiri w'intebe wa Espagne Pedro Sánchez yakomeje kuba umwe mu bamagana cyane ibitero by'Amerika na Israel kuri Iran, avuga ko “nta cyo byitayeho” kandi ko “binyuranyije n'amategeko”.

Ivomo: BBC

Gakenke: Bakusanyije Miliyoni zisaga 200 zo kurengera abatishoboye

Chadadi Habimana — 2026-03-31T08:20:54Z

Mu nama mpuzabikorwa ku iterambere ry'Akarere ka Gakenke, yari ifite insanganyamatsiko igira iti "Duhuze Imbaraga, Twubake Umuturage wa Gakenke Ushoboye".

Abafatanyabikorwa bakorera muri aka karere ka Gakenke ,abakorera ahandi bahavuka, abibumbiye mu rugaga rw'abikorera (PSF) bitanze Miliyoni 200 azakemura ibibazo byimibereho byugarije abaturage (Human Security issues)

Abayobozi batandukanye bitabiriye iyi nama.

Umuyobozi w'akarere ka Gakenke Mukandayisenga Vestine yagaragarije abitabiriye iyi nama bimwe mu bibabazo bikibangamiye imibereho myiza y'Abaturage ndetse ashimira byimazeyo abateye intabwe yo gutanga umuganda wabo mu gushyigikira abatishoboye.

Ati”Turacyafite abaturage bafafite aho kuba …Turacyafite ababa mu nzu ariko mubyukuri zimeze nka nyakatsi, Nta munya-Gakenke turimo twubaka hariya ushoboye urara kumusambi, Ubu warara kumusambi koko ugatekereza neza…(…)”

Guverineri w'Intara y'Amajyaruguru Bwana Mugabowagahunde Maurice nawe yasabye ubuyobozi bw'Akarere ka Gakenke gushyigikira abahavuka bakorera ahandi bafite imishinga yagira uruhare mu iterambere n'imibereho myiza y'abaturage, boroherezwa kuyishyira mu bikorwa kugira ngo inazamure abandi baturage.

Guverineri w'Intara y'Amajyaruguru Mugabowagahunde Maurice.

Minisitiri muri Perezidansi akaba n'imboni y'Akarere ka Gakenke, Uwizeye Judith yavuze ko bafashwe ingamba zo gushakira amacumbi abaturage batayafite, ngo kuko badashobora gutekereza iterambere rirambye mu gihe baba baraye badasinziriye.

Ati”Turumva ingamba zaba mu byiciro bibiri, hari icyiciro cy'ihuse cyo kuvuga ngo ni gute abantu bafite amacumbi ameze nabi bafashwa kuyavamo, Kuko iyo bimeze gutyo ntabwo watekekereza iterambere rirambye waraye udasinziriye ,waryamye nabi cyangwa se urimo kunyagirwa izo ningamba zihuse ariko mu ngamba zigihe kirekire tugomba kubaka umuturage uzumva ko inzu ye izasenyuka akayisana.”

Uwizeye Judith , Minisitiri muri Perezidansi akaba n'imboni y'Akarere ka Gakenke.

Kugeza ubu ingo 196 nizo zidafite aho gukinga umusaya, Ingo 988 ntabwo zujuje ibisabwa ni mu gihe ingo 4784 zikirara kumisambi (nta matera zifite).

Jean Claude Ndayambaje

Perezida Kagame :Iterambere ry'amadini n'amatorero n'Igihugu gitera imbere

Chadadi Habimana — 2026-03-26T12:08:07Z

Perezida wa Repubulika, Paul Kagame yagaragaje ko inshingano z'ubuyobozi ari ugutera inkunga abaturage mu bikorwa by'iterambere.

Perezida Kagame yavuze ko abayisilamu bagize amateka y'umwihariko ariko bakaza kugira andi bahuriyeho n'abandi baturage, kuri ubu icyakozwe kikaba ari impinduka kandi zari zikwiye gukorwa.

Ni bimwe mu byo yagarutseho kuri uyu wa Gatatu tariki 25 Werurwe 2026, ubwo yari mu gikorwa cyamuhuje n'Abayisilamu bo mu Rwanda mu rwego rwo kwizihiza Umunsi Mukuru wa Eid Al-Fitr iherutse kuba tariki 20 Werurwe 2026.

Perezida Kagame yasabye abaislam gukoresha amahirwe bahawe n'igihugu.

Perezida Kagame yavuze ko ubuyobozi bwiteguye gutera inkunga ibikorwa by'iterambere Abayisiramu bateganya kubaka nk'uko byagaragajwe na Mufti w'u Rwanda, agaragaza ko inshingano zabo nk'inzego z'ubuyobozi ari ugutera inkunga abaturage.

Yagize ati: “Iyo ibintu byifuzwa kugerwaho bishyizwe hanze bigaragara nk'ibyo Abayisilamu bavuze ni inzira barimo kandi bigenda mu nzira yo kwiteza imbere nk'Abayisilamu. Ubundi twebwe inzego ziyobora Igihugu cyacu icyo tuba dushinzwe ni ukubatera inkunga uko dushoboye. Iyo nkunga rero irahari izaboneka uko ishobotse.”

Yakomeje agira ati: “Muzangaye gutinda ariko ntabwo bizahera, hanyuma indi nkunga irimo uburyo bwafasha kugira ibyo bwubaka ibyo rwose ntabwo uyu mwaka uzashira bidakemutse, ntabwo nzagaruka hano mubinyishyuza ahubwo tuzagaruka ari jye ubibishyuza. Abayilamu iyo bateye imbere n'Igihugu kiba giteye imbere.”

Perezida Kagame yasabye Abayisilamu kujya bashaka uko bakemura ibibazo mu buryo bw'ubwumvikane kuko nta muryango utagira ibibazo. Ati: “Naho ubundi nta muryango utabamo utuntu n'utundi two kutumvikana n'ibindi ariko no mu Muryango wanyu w'Abayisilamu mujye mumenya uko mwicara mukadukemura hanyuma mukagira amahoro mugatanga amahoro no ku bandi. Ibyo kandi ni ko bikenewe no mu yandi madini.”

Perezida Kagame kandi yavuze ko ibikorwa by'impinduka ubuyobozi bwakoze byagejeje ku bumwe bw'Abanyarwanda no kudaheza byari ngombwa, kandi umusaruro wabyo uragaragara ariko kandi buri wese akwiye kugira uruhare mu kubibungabunga.

Perezida Kagame yakemuye ibibazo by'Abayisilamu
Perezida wa Repubulika, Paul Kagame, yakiriye anakemura ibibazo Abayisilamu bo mu Rwanda bamugejejeho birimo abagowe n'imibereho kubera amikoro make, ikibazo cy'uko ‘Adhan' [kumenyesha Abayisilamu ko isaha yo gusenga igeze] yakuweho, anabizeza inkunga ndetse anagaruka ku byo yabasezeranyije mbere byatinze kubageraho.

Mu batanze ibibazo harimo Umuyisilamukazi wamugejejeho ikibazo cy'uko ‘Adhan' [kumenyesha Abayisilamu ko isaha yo gusenga igeze], yakuweho.
Umukuru w'Igihugu yamusubije ko ibyo byoroshye kubisuzuma, abishinga Minisitiri w'Ubutegetsi bw'Igihugu kubikurikirana.

Ati “Mutinya ababakangura mu gitondo ni iki? Ubundi ariya masaha niyo yo gukanguka n'ubundi.”

Perezida Kagame kandi yakiriye ikibazo cy'umusaza w'imyaka mirongo inani ufite ubumuga wamubwiye ko yabuze umwitaho, akaba ari we wenyine kandi ashonje.
Uyu musaza yasubijwe na Perezida Kagame ko ibibazo bye byose byumvikanye kandi byose biraza gukemuka.

Ati “Mubumve bose uko baje kandi ibi bibazo byabo hari uburyo bwo kubikemura.”
Mu bandi batanze icyifuzo ni umukobwa wasabiye imbabazi musaza we umaze imyaka irindwi afungiye mu Igorero rya Nyarugenge ahazwi nka Mageragere kubera gukoresha ibiyobyabwenge.

Umukuru w'Igihugu yamusubije ko abo mu butabera bazabisuzuma.
Perezida Kagame yavuze ko kandi hari bimwe mu byasezeranyijwe Abayisilamu mu bihe byashize bitigeze bishyirwa mu bikorwa, birimo n'ibyavuzwe mu 2011, nko kubafasha kubona ikibanza cyo kubakaho inyubako zitandukanye.

Yavuze ko ibi abifata nk'umwenda agomba kwishyura, anizeza ko bizakemurwa mu gihe cya vuba.

Ati “Ibyo biraza gukemuka, ntabwo nzagaruka hano mubinyishyuza, ahubwo tuzagaruka hano ari njye ubibishyuza icyo mwabikoresheje.”

Mufti w'u Rwanda, Sheikh Sindayigaya Mussa yashimiye Perezida Kagame kuba Abayisilamu batagihezwa mu gihugu cyabo nkuko byahoze mu myaka yahise aho bitwaga Abaswayire bakabuzwa no kwiga.

Yagize ati: “Ibyo dushima ni byinshi cyane ariko ku isonga, Nyakubahwa Perezida, turabashimira agaciro mwaduhaye ubu ntabwo tukitwa Abaswayire dufatwa nk'abandi Banyarwanda bafite agaciro, turabashimira ku mwanya wanyu muduha bigaragaza agaciro muduha ku mwanya mwiza nk'uyu w'ubusabane.”

Mufti w'u Rwanda Sheikh Sindayigaya yakomeje ashimira imiyoborere myiza igaragarira mu bwisanzure idini ya Isilamu yagiye ihabwa bitandukanye n'ibihe bya mbere ya Jenoside yakorewe Abatutsi mu 1994 aho nta kintu na kimwe bari bemerewe gukora ku mugaragaro.

Ati: “Turashima ubwisanzure dufite mu kwamamaza ubutumwa bwa Isilamu no kugaragaza ukwemera kwacu nta nkomyi. Turabashimira byimazeyo ko mwadukuye mu bwigunge muduha ikiruhuko rusange ku minsi mikuru ya kiyisilamu yombi umunsi wa Eidil-Fitri ari na wo mwaje kwifatanya na twe kwizihiza ndetse n'umunsi mukuru w'igitambo.”

Mufti Sheikh Sindayigaya Mussa yakomeje agaragaza ko bimwe mu by'abayisilamu bishimira harimo no kuba nta hezwa na rito bagikorerwa haba mu mashuri, mu nzego nkuru n'Iz'ibanze mu Rwanda, guhabwa serivisi nziza nko kuba barashakiwe indege ifasha abayisilamu kujya gukora umutambagiro mutagatifu nta handi baciye ari na byo bibafasha guhora bashishikajwe no kwiteza imbere.

Yakomeje agaragaza ko bafite ibikorwa by'itarambere nk'Umuryango w'Abayisilamu mu Rwanda muri gahunda yo kubaka u Rwanda bifuza nk'Abanyarwanda. Avuga ko Umuryango w'Abayisilamu mu Rwanda urimo gukora imishinga itandukanye iganisha ku iterambere harimo “Islamic Cultural Hub”, uzaba urimo kubaka umusigiti wo ku rwego rw'Igihugu, kubaka ikicaro gikuru cya Islamu n'ibindi. Iki igikorwa cyateguwe ku nsangamatsiko igira iti: “Uruhare rw'Abayislamu mu kubaka u Rwanda twifuza.”

Ku wa 25 Kamena 2024, ni bwo Perezida Kagame yemereye Abayisilamu kuzifatanya na bo mu gikorwa bateganyaga cyo gutegura kwizihiza imyaka 30 bamaze bemerewe kwizihiza umunsi Mukuru wa Eid Fitri. Perezida Kagame yabigarutseho mu ijambo yavugiye mu Karere ka Nyarugenge, ubwo yari mu bikorwa byo kwiyamamaza ku mwanya w'Umukuru w'Igihugu mu 2024, akemera ubutumire bwa Mufti w'u Rwanda.

Icyo gihe, Umuyobozi w'Ishyaka PDI Sheikh Mussa Fazil Harerimana, wavuze nk'uwari ahagarariye amashyaka yari yahisemo kwifatanya na FPR-Inkotanyi bashyigikira umukandida wayo yavuze ko hari ubutumwa bwa Mufti w'u Rwanda afite.

Yagize ati: “Nyakubwa Perezida wa Repubulika mu mwaka 1995 mu kwezi kwa Gatanu ahahoze hitwa kwa Ghaddafi (Kadafi) mwaje mu birori byari byateguwe n'Abayisilamu byanatangijwe n'ikigisho cya Qur'an, nyuma mufata ijambo mutanga impanuro zitandukanye mugera aho muvuga ngo ariko kuki nta minsi mikuru y'Abayisilamu yizihizwa Abanyarwanda bose bakifatanya namwe, Eid Al Fitr itangira kwizihizwa mu Rwanda gutyo.”

Yongeyeho ati: “Mu kanya nyakubahwa Mufti w'u Rwanda tubiganiraho yambwiraga ngo ariko ubu nta buryo twabyishimira mu myaka 30, mu mwaka utaha tugatumira na Nyakubahwa Perezida wa Repubulika tukabyizihiza, njye nsubiyemo ibyo Mufti yavugaga, igisubizo ntabwo cyari icyanjye gusa ni ikiganiro twagiranye.”

Mu ijambo rye, Perezida Paul Kagame yasubije ko atajya yanga ubutumire cyane cyane iyo ari ukwishimira ibyagezweho. Ati: “Hari bwa butumire numvise Mussa Fazil yangejejeho, ntabwo njya nanga ubutumire njyewe. Cyane cyane iyo ari ubutumire bw'ibyiza, bwo kwizihiza ibyiza bimaze kugerwaho, kungezaho ubutumire bwangezeho nanjye igisubizo ndakibahaye.”

Muri byinshi Abayisilamu bavuga ko bahawe n'ubuyobozi bwiza burangajwe imbere na Nyakubahwa Perezida Kagame, harimo iminsi mikuru yabo uko ari ibiri bizihiza kabiri mu mwaka (Eid) itangirwa ibiruhuko ndetse n'itsinda riririmba mu karasisi kabereye ijisho rizwi nka ‘Umoja Band' bivugwa ko ryagarutse mu kwezi kwa Gicurasi mu 1995, mu birori Abayisilamu na bwo batumiyemo Kagame Paul wari Visi Perezida icyo gihe.

Abayisilamu bahuye na Perezida Kagame nyuma y'iminsi 5 gusa habaye ilayidi izwi nka Eidil Fitri kuko yabaye tariki 20 Werurwe 2026, yizihirizwa ku rwego rw'Igihugu kuri Kigali Pele Stadium iherereye i Nyamirambo.

AMAFOTO

Abayisilamu bo mu Rwanda bitabiriye ku bwinshi ubusabane na Perezida Kagame.

Ishimwe Honore

VIBE yahanze imirimo igera ku bihumbi 43,000 ku rubyiruko rwo mu Rwanda

Chadadi Habimana — 2026-03-26T08:27:16Z

Umushinga wa Vibe ugamije gushyigikira imishinga y'ubuhinzi n'ubworozi y'urubyiruko, ibi bikorwa kubufatanye n'ibigo bya Leta nka RSB na RICA n'ibigo bya MasterCard foundation,Trade Mark Africa.

Gaju Yvonne ni umwe mu rubyiruko rwahawe inyigisho zijyanye na VIBE akorera i Kayonza avuga ko ubu yatangiye gukirigita ifaranga.

Ati”Twarahuguwe natwe tujya gukoresha ubumemyi twahawe na VIBE ubu rero abantu bazajya banywa amata yujuje ubuziranenge kubera ko aba yasuzumwe yizewe 100%.”

Gaju Yvonne umwe mu bahuguwe na VIBE.

Veterineri Benitha Niyogisubizo ukorera ku ibagiro ry'inyama mu karere ka Burera nawe ashimangira ko ahugurwa ya VIBE afite icyo yabamariye by'umwihariko mu kunoza gahunda y'ubuziranenge bw'ibiribwa.

Benitha ni veterineri wahuguwe na VIBE.

Ati”Nageze hano mpindura byinshi kubera ko narimfite ubumenyi , bakoreshaga uburyo bwa gakondo mu kubaga ariko ubu ntibikibaho kubera ko tugeze mu isi yo gukora inintu byose mu ikoranabuhanga, ndetse ndahembwa nkiteza imbere.”

William Niyitanga umukozi w'Ikigo cya TradeMark Africa aravuga ko intego y'iyi gahunda ari uguhanga imirimo ku rubyiruko.

Ati”Vibe nkuko izina ryayo ribivuga igambiriye guhanga imirimo ku rubyiruko by'umwihariko abakobwa, abafite ubumuga ndetse n'impunzi, Intego Vibe ifite nuguhanga imirimo ibihumbi 43,000 ku rubyiruko ikgira byibuze 7% by'abafite ubumuga, ariko 70% iyo mirimo ikaba ari iy'abakobwa.

William Niyitanga, umukozi w'ikigo cya Trade Mark Africa.

Akomeza avuga ko iyi porogarame ifite imyaka 5 yatangiye muri 2023 izarangira mu mwaka wa 2028 ikaba ishyirwa mu bikorwa na Trade Mark Africa , International Trade center, kubufatanye na MastercardFiudnation ariko ugashyirwa mu bikorwa na Guverinoma y'u Rwanda biciye muri RSB, RIC ndetse na NAEB.

Jean Claude Ndayambaje

Gushyiraho amabwiriza y'amadini si ukuyahutaza- Perezida Kagame

Chadadi Habimana — 2026-03-26T08:10:47Z

Perezida Paul Kagame yavuze ko gushyiraho umurongo ugenga imikorere y'amadini n'amatorero mu Rwanda bitagamije kuyahutaza, ahubwo ari uburyo bwo kuyafasha gukora neza inshingano zayo no kwirinda ko yaba inzira yo gushuka no kwambura abaturage.

Yibukije ko mu mwaka wa 2025, Urwego rw'Igihugu rw'Imiyoborere (RGB) rwashyizeho amabwiriza mashya agenga imiryango ishingiye ku myemerere, arimo asaba ko ushaka gushinga idini cyangwa itorero agomba kuba afite inyubako yabugenewe yo gusengeramo, ndetse akanakusanya nibura imikono 1000 y'abaturage bo mu gace azakoreramo, n'ibindi bisabwa bitandukanye.

Perezida Kagame yasobanuye ko amadini akwiye kubaka umuryango ukomeye.

Perezida Kagame yabigarutseho ku wa 25 Werurwe 2026, mu nama yahuje abayisilamu mu Rwanda yabereye muri BK Arena, aho yasobanuye ko izo ngamba zigamije gushyiraho imikorere itunganye mu madini n'amatorero.

Yagaragaje ko nubwo amadini asanzwe afite inshingano zizwi, ari ngombwa ko imikorere yayo inozwa kugira ngo asohoze neza izo nshingano. Yashimangiye ko mbere na mbere ayo madini ubwayo akwiye kubanza gukora ibyo ashinzwe mu buryo bukwiye.

Yakomeje avuga ko Leta yashyizeho uburyo bwo gukurikirana imikorere y'amadini n'amatorero hagamijwe kuyanoza no gukumira abantu bayiyitirira bagamije inyungu zabo bwite, bakambura abaturage.

Yasobanuye ko ibyo bitareba idini rimwe gusa, ahubwo byagaragaye mu madini n'amatorero atandukanye, aho usanga bamwe bihisha inyuma y'iyobokamana bagashyiraho ibikorwa bibazanira inyungu bwite.

Perezida Kagame yagereranyije iyo myitwarire no gushyiraho bariyeri zitemewe zigamije kwaka abaturage amafaranga cyangwa imitungo, agaragaza ko bidakwiye na gato kuba bikorwa mu izina ry'idini.

Yongeyeho ko gushyira ibintu ku murongo bigamije gushyiraho amahame agomba kugenga imikorere y'amadini n'amatorero, kugira ngo asohoze neza inshingano zayo zo gufasha abaturage, aho kubahombya cyangwa kubagiraho ingaruka mbi.

Yavuze ko amategeko n'amabwiriza yashyizweho agamije kurengera abayoboke no gukumira abashaka gukoresha amadini nk'ubucuruzi bwo kwikungahaza, ashimangira ko ibikorwa nk'ibyo bidakwiye kwihanganirwa.

Perezida Kagame yanenze abakwirakwiza amakuru avuga ko u Rwanda rutoteza amadini, avuga ko ari bake kandi bafite inyungu zabo, asobanura ko intego ya Leta ari ugushyira ibintu ku murongo no kurinda uburenganzira bwa buri wese.

Yashimangiye ko nta muntu ubuzwa amahoro cyangwa ubwisanzure mu myemerere ye, ahubwo ko ibikorwa byose bigamije kubahiriza amategeko no gutuma amadini akora mu mucyo.

Amafoto

Chadadi Habimana

Umushinga w'Itegeko rigena umushahara fatizo wabaye agateranzamba.

Chadadi Habimana — 2026-03-26T07:10:02Z

Umushahara mfatizo mu Rwanda usa nk'ikibazo cyabaye agatereranzamba bitewe nuko impaka zisa nizabaye nyinshi kuri iyi ngingo ibi bituma hirya no hino mu gihugu abaturage bakomeza kugaragaza ko bahembwa intica ntikize ibikomeje kubagiraho ingaruka ku mibereho yabo ya buri munsi nyamara Urwanda muri gahunda yo kwihutisha iterambere ikiciro cya 2 rufite intego yo kuzamura ibyo umuturage yinjiza ku mwaka. Aba ni bamwe mu baturage bo mu ntara y'amajyepfo bagaragaza iki kibazo.

Abakora mu nganda bavuga ko bahembwa intica ntikize.

Kalisa Emmanuel umuturage wo mu karere ka Huye yagize ati”Iyo urebye amafaranga duhembwa ntabwo ujyanye n'ibiciro ku isoko iyo ukuyemo ibintu byibanze nkenerwa ku kwezi usanga bitavamo urumva no gusagura byo ntibikunda”.
Hakizimana Evariste wo mu karere ka Gisagara we yongeyeho ati” Twitwa ko turakora ariko ugasanga nubundi dufite inzara nkubu nge ndakora ngiye kumara imyaka 30 ariko uwo nkorera nzi ko ibyo nkora ko bimubyarira umusaruro uri hejuru cyane ariko nge nsa nushaje nabi bitewe no guhembwa nabi”.

Abakora imirimo y'ingufu ni bamwe mu bakora imirimo itanditse.

Aba baturage bagaragaza ko aho ibiciro bigeze ku isoko iyo babihuje n'ibintu by'ibanze nkenerwa mu buzima bwa buri munsi bidahura nyamara abo bakorera bagakomeza kucyira cyane ibyo nibyo bakabiheraho basaba ko leta n'abandi babifite mu nshingano bakwihutisha ishirwamubikorwa ry'umushahara fatizo kuko byaba umuti kuri iki kibazo.
Ati”Hakwiye kujyaho umushahara mfatizo kuko kenshi umukire aguha ayo ashaka we agakomeza agakira naho wowe ugasubira inyuma”.

Hon Senateri Alexis Mugisha hari icyo avuga ko ibyo bagomba gukora babikoze ahasigaye ni guverinoma ishyira mu bikorwa umushinga bayishyikirije.
Ati”Iki kibazo cy'umushahara mfatizo twakivuzeho kenshi kandi aho ubuvugizi twagombaga kubugeza twarabuhagejeje ariko ikigaragara nuko hakiri inzitizi zituma umwanzuro udafatwa kubera ko bijyana n'ubushobozi bw'igihugu n'ubushobozi bw'ubuzima”.

Muri 2018 nibwo hasohotse itegeko rigenga umurimo rivugurura iryari risanzweho ryo 1974 aho Umushahara mfatizo wari amafaranga 100 Frw ku munsi kuri buri wese ukorera abandi.
Iri ryasohotse 2018 ryari ryitezweho ko hashyirwaho umushahara mfatizo ku bakozi ariko kugeza ubu ntakirahinduka, iri tegeko ryaje mu gihe hari hashize imyaka myinshi sendika z'abakozi zigaragaza ko umushahara ari ikibazo kikibangamiye kandi bigira ingaruka ku mibereho y'abakozi ndetse n'ubukungu bw'igihugu muri rusange.

Moise Munyaneza

Kurya inyama z'inkoko zapimwe bikurinda indwara, Dr Simbarikure

Chadadi Habimana — 2026-03-24T09:51:44Z

Abaturarwanda barashishikarizwa kujya barya inyama z'inkoko zapimwe mu rwego rwo kwirinda indwara zishobora gukomoka ku matungo.

Ibi byagarutsweho na Dr Gaspard Simbarikure, Umukozi wa RICA ushinzwe Kugenzura Isuku n'Ubuziranenge n'Akato k'Ibikomoka ku Matungo.

Dr. Gaspard Simbarikure, Umukozi wa RICA.

Ati”Hari igihe umuntu ajya mu kabari, muri Bar runaka akavuga ngo nshaka kurya inkoko mubaze aka kanya aho ziba zitujuje ubuziranenge,ariko icyo twabwira abanyarwanda bakwiye kujya bashishoza bakamenya aho zabagiwe kugira ngo bizere ko bariye inyama zujuje ubuziranege.”

Uyu muyobozi yakomeje avuga ko 70% by'indwara z'amatungo zishobora gufata abantu mu gihe bariye inyama zitapimwe.

Ibagiro rya Kijyambere ribagirwamo inkoko muri Burera.

Ati”Abarya izo nyama kenshi zitapimwe bafite ibyo byago by'uko bakwandura za ndwara amatungo arwara ariko iyo abantu bariye inyama zagenzuwe bibarinda kwandura indwara zirimo igituntu, na tenia.”

Jean Marie Vianney Ndabarinze ufite ibagiro ry'inkoko mu karere ka Burera avuga ko yabagaga inkoko mu buryo butari bwiza ndetse bikaba bitujuje ubuziranenge Kuri ubu, yubatse ibagiro ry'inkoko rigezweho rifite ubushobozi bwo kubaga izigera kuri 700 ku munsi zituruka ku borozi barenga 700 bo mu Turere twa Burera na Musanze.

Ati”Kera twabagiraga mu ntoki hirya no hino, tukagemura inkoko mu buryo butari bwiza ariko ubu rwose dufite ibagiro ryiza tubaga inkoko 700 ku munsi ,inkoko ibanza gusuzumwa umuntu akayirya yujuje ubuziranenge.”

Jane Nyamvumba umukozi w'Ikigo Cy'Igihugu gitsura ubuziranenge (RSB) arasaba abaturarwanda kujya barya inyama zujuje ubuziranenge.”

Jane Nyamvumba umukozi w'Ikigo cy'Igihugu gitsura ubuziranenge (RSB).

Ati”Hari ababagira ahantu hafite umwanda, hari abibagira ku giti cyabo ndetse n'abashaka kwishyiriraho amaraboratwari (laboratory) atujuje ubuziranenge ibyo byose birahari, Kandi hari ibigo bishinzwe gutanga ibyangombwa turasaba ko batugana bakajya bahabwa ibyangombwa kuko amabwiriza arahari ,ibisabwa birahari igihe cyose bagana ikigo gitsura ubuziranenge (RSB)twabakira.”

Mu bukangurambaga bwiswe Vibe (Value Added Initiative to Boost Employment )burimo gukorwa n'ikigo cy'Igihugu gitsura ubuziranenge bafatanyije n'abandi bafatanyabikorwa baributsa abaturarwanda kujya bagira amakenga ku nyama barya birinda kurya inyama zitujuje ubuziranenge.

AMAFOTO

Jean Claude Ndayambaje

Sudan: Imirwano yabaye kuri Eid yahitanye abasaga 64

Chadadi Habimana — 2026-03-23T07:59:42Z

Ingabo za Sudani zahakanye ko ari zo zagabye igitero cyishe abantu ku bitaro bikomeye ku wa gatanu nijoro mu mujyi wo mu burengerazuba bw'igihugu ugenzurwa n'abarwanyi b'umutwe witwara gisirikare uhanganye nazo Rapid Support Forces (RSF) kuva muri Mata 2023.

ibisasu byaguye ku nzu zicumbitsemo abasivili

Umuyobozi wa OMS, Tedros Adhanom Ghebreyesus, yavuze ko abantu 64, barimo abana 13, abaforomo babiri n'umuganga umwe, bapfiriye muri icyo gitero cyagabwe ku bitari binigishirizwamo bya el-Daein, naho abandi 89 barakomereka.

Yanditse ku rubuga nkoranyambaga rwa X ati: “Amaraso yamaze kumeneka bihagije,” anasaba impande zihanganye guhagarika intambara imaze imyaka hafi itatu itangiye.

Ingabo za RSF na SAF bakomeje guhanganira kugenzura Sudan.

RSF yavuze ko indege nto y'intambara itajyamo umupilote (drone) y'ingabo za leta yarashe kuri ibyo bitaro byo mu mujyi wa el-Daein, umurwa mukuru wa Leta ya East Darfur, kuri uwo munsi Abayisilamu bizihizagaho umunsi mukuru wa Eid.

Sudani yinjiye mu ntambara y'abenegihugu muri Mata (4) mu 2023, ubwo habaga ubushyamirane bukomeye bwo kurwanira ubutegetsi hagati y'ingabo za leta na RSF, impande zari zarigeze kuba ari abafatanyabikorwa nyuma yo gufata ubutegetsi binyuze muri coup d'Etat mu 2021.

UN ivuga ko abantu basaga miliyoni 12 aribo bakuwe mu byabo niyi ntambara.

Kuva icyo gihe, abantu barenga 150,000 bamaze gupfa muri iyo ntambara, naho abagera kuri miliyoni hafi 12 bavuye mu byabo, bangana hafi na kimwe cya gatatu cy'abaturage b'icyo gihugu.

Umuryango w'Abibumbye wavuze ko ayo ariyo yo makuba ya mbere akomeye cyane ku isi acyeneye ubutabazi bwihutirwa.

Chadadi Habimana

OTAN: Ntitwahamya ko Iran ifite Missiles zarasa mu bulayi

Chadadi Habimana — 2026-03-23T07:50:39Z

Umunyamabanga mukuru w'umuryango wo gutabarana w'Uburayi n'Amerika (OTAN/NATO) avuga ko uwo muryango urimo “gusuzuma” ibyavuzwe na Israel ko ubu Irani ifite ibisasu bya misile bishobora kurasa bikageza mu mirwa mikuru y'ibihugu by'i Burayi ku ntera ya kilometero 4000.

Ku wa gatandatu, ingabo za Israel (IDF) zavuze ko Irani ubu ifite misile zishobora kugeza i “London, Paris cyangwa Berlin”.

Igisirikari cya Israel cyatangaje ko Iran ishobora kurasa mu burayi.

Umunyamabanga mukuru wa OTAN, Mark Rutte, mu kiganiro Face the Nation cy'igitangazamakuru CBS cyo muri Amerika, ku cyumweru, yavuze ko OTAN “ntishobora kubyemeza kuri ubu” – ariko yongeraho ko igihe byaba byemejwe ko ari ukuri byaba ari “gihamya yindi ko ibyo perezida [w'Amerika] arimo gukora (...) ari ingenzi cyane”.

Yagize ati: “Ibyo tuzi neza ni uko [Irani] bari hafi cyane yo kugira ubwo bushobozi”, ariko yongeraho ko “niba ibi ari ko bimeze ku kigo cya gisirikare cy'Ubwongereza, Diego Garcia, turacyarimo kubisuzuma.”

Ariko niba ari ukuri, “bivuze ko baba bafite ubwo bushobozi. Niba atari ukuri, turabizi ko bari hafi cyane yo kugira ubwo bushobozi”.

Ivomo:BBC

Trump arasaba ibihugu kumufasha kurinda inzira ya Strait of Hormuz

Chadadi Habimana — 2026-03-16T08:58:34Z

Perezida wa Leta Zunze Ubumwe za Amerika, Donald Trump, yasabye ibihugu bitandukanye gufasha kurinda inzira y'ingenzi y'amato ya peteroli izwi nka Strait of Hormuz mu gihe amakimbirane akomeje hagati ya Iran, Israel ndetse na USA. Iyi nzira kandi inyuramo hafi 20% by'amavuta n'ingufu bikoreshwa ku isi, bigatuma iba ingenzi cyane mu bucuruzi mpuzamahanga.

Trump yavuze ko Amerika yamaze kuvugana n'ibihugu birindwi hagamijwe gushyiraho ubufatanye bwo kurinda amato no kongera gufungura iyi nzira y'amazi, imaze guhungabanywa n'intambara yatangiye nyuma y'ibitero Amerika na Israel bagabye kuri Iran mu mpera za Gashyantare.

Umuhora wa Hormouz unyuramo ibikomoka kuri Peteroli bingana na 20%

Ariko ibihugu bikomeye bifatanya na Amerika birimo Japan na Australia byatangaje ko nta gahunda bifite yo kohereza amato y'intambara kurinda amato anyura muri ako gace.

Minisitiri w'Intebe wa Japan Sanae Takaichi, yavuze ko igihugu cye kigomba kubahiriza itegeko nshinga rikumira kohereza ingabo mu ntambara zo hanze, nubwo Japan ibona hafi 95% by'amavuta yayo mu Burasirazuba bwo Hagati.

Trump yanahamagariye ibindi bihugu birimo China, France, South Korea na United Kingdom gufasha kurinda iyi nzira y'ingenzi.

Hagati aho, amasoko y'ubukungu ku isi akomeje kwitonda mu gihe ibiciro by'amavuta bikomeje kurenga amadolari 104 kuri buri ngunguru. Iran yo yavuze ko yiteguye kwirwanaho igihe cyose bizaba ngombwa.

Ghislaine Kamikazi