Mama U rwagasabo

Rubavu: Abazahembwa muri Rubavu Music Awards and Talent Detection bamaze gutoranywa

Valens Nzabonimana — 2026-05-25T17:00:53Z

Kuwa Gatandatu tariki 23 Gicurasi 2026, mu Murenge wa Rugerero, amarushanwa Rubavu Music Awards and Talent Detection yarageze ku cyiciro cya nyuma ku rwego rw'Akarere ka Rubavu, mu gutoranya abanyempano bazahembwa.

Aya marushanwa yabaye ku nshuro ya kabiri

Aya marushanwa afite intego yo gufasha urubyiruko guteza impano zabo imbere, bityo zibe zabafasha kugera ku musaruro, aho mu bayategura bazengurutse mu mirenge yose y'Akarere ka Rubavu, bashaka abanyempamo ngo bahatane muri aya marushanwa.

Umuyobozi w'Ikigo cya Vision Jeunesse Nouvelle, Frère Vital Ringuyeneza, mu gikorwa cyo gutoranya izi mpano ku rwego rw'Akarere ka Rubavu, yagaragaje ko hadakenewe impano zabatsinze gusa.

Ati"Izi mpano zanyu ntabwo turareba izatsinze gusa, n'izo muba musigaranye, ibyo bihangano byose tuzakomeza tubikoreshe, ibyo bihangano turabikeneye kugira ngo abandi bagenzi bacu babimenye.

Bikaba byari biteganyijwe ko abagomba gutoranya abahatanye muri aya marushanwa bagomba kureba impano zashyizwe mu byiciro bitandatu, hanyuma icyiciro kimwe cy'abatora bagatora babicishije ku mbuga nkoranyambaga, ku kigero cya 50%, hanyuma abanyamakuru nabo bari mu batora, batore nabo ku kigero cya 50%. Gutanga ibihembo bikaba biteganyijwe tariki 13 Kamena 2026.

Aya marushanwa yateguwe n'ikigo cya Vision Jeunesse Nouvelle, Akarere ka Rubavu na Future Novelty Company, akaba uyu mwaka yarabaye ku nshuro ya kabiri nyuma y'umwaka ushize.

Yanditswe na Eulade Mahirwe.

Rwanda: Hazatangwa ibikombe 2 muri Shampiyona

Valens Nzabonimana — 2026-05-12T11:13:18Z

Mu gitondo cyo kuri uyu wa Kabiri, nyuma y'uko Perezida wa FERWAFA Shema Ngonga Fabrice yari yatangaje ko hazatangwa igikombe kimwe kuri Al Hilal SC, ikipe yo mu Rwanda yaje imbere igahabwa amafaranga gusa, abantu bibazaga uko bizagenda, kuko byari bitandukanye n'ibyatangajwe mbere.

Urwego Rushinzwe gutegura shampiyona, Rwanda Premier League, rwatangaje ko hazatagwa ibikombe bibiri.

Ikipe yo muri Sudani izasoreza ku mwanya wa mbere muri BK Pro League y'uyu mwaka izahabwa igikombe nk'ikipe yahize izindi [BK Pro League Champions 2025/2026]. Ariko aya makipe y'abashyitsi yo ntabwo azahabwa ibihembo by'amafaranga byagenewe amakipe yitwaye neza.

Rwanda Premier League kandi izatanga ikindi gikombe ku ikipe yahize andi mu makipe yo mu Rwanda [BK Pro League National Champions] ndetse akaba ari yo izahagararira u Rwanda muri CAF Champions League ya 2026/2027.

Valens Nzabonimana

Rubavu: Itorero EAR ryateguye igikorwa cyo kwibuka Jenoside yakorewe Abatutsi mu 1994

Valens Nzabonimana — 2026-05-09T16:41:31Z

Ku wa Gatanu, ku tariki ya 8 Gicurasi 2026, mu murenge wa Gisenyi, mu Karere Karere ka Rubavu, habereye igikorwa cyo Kwibuka ku nshuro ya 32 Jenoside yakorewe Abatutsi mu 1994.

Musenyeri Ahimana agaragaza ko ari ngombwa kwibuka Jenoside yakorewe Abatutsi mu 1994

Iki gikorwa cyateguwe n'Itorero Angilikani mu Rwanda Diyoseze ya Kivu (EAR), mu rwego rwo kwibuka Abakiristo ba Diyoseze ya Kivu n'abandi bose bazize Jenoside yakorewe Abatutsi mu 1994.

Niyigena Drocelle agaragaza amakuba yanyuzemo mu gihe cya Genoside yakorewe Abatutsi mu 1994, aho icyo gihe we n'umuryango we bari batuye mu cyahoze ari mu karere ka Rubavu, ubu ni mu Murenge wa Rugerero, muri kano Karere ka Rubavu.

Muri icyo gihe yari umwana uri mu kigero cy'imyaka umunani, akaba yarabuze abatari bake bo mu muryango we.

Mu buhamya bwe ati"Abantu babaca amaguru, ni ibintu utabasha kuvuga twabonye n'amaso yacu, mukuru wanjye nakurikiraga yarimo bari bamuteye inkota mu nda, amara yasohotse hanze atarapfa".

Musenyeri Ahimana Augutsin, Umuyobozi w'Itorero Angilikani ry'u Rwanda Diyoseze ya Kivu (EAR), agaragaza ko ari ngombwa gukomeza kwibuka Jenoside yakorewe Abatutsi mu 1994.

Yagize ati"Ni ugukomeza kwibuka Jenoside yakorewe Abatutsi, kwibuka impamvu zayiteye, no kwibuka ingaruka zayo, n'akaga byatugejejeho nk'igihugu, kandi no kuzirikana ko tutabaye maso dufatanye twese, ubundi ingorane twazisubiramo".

Umuyobozi w'Akarere ka Rubavu Mulindwa Prosper, nawe yaboneyeho gusaba Abanyarwanda kunga ubumwe.

Yagize ati"Dukomere ku buyobozi bwacu, kuko ubuyobozi bwatweretse ko bishoboka, kubaka ubumwe bwari bwarashwanyaguritse, hafi ya burundu, kandi Imana yaturemye iba ifite aho ihuriye no gushyiraho ubuyobozi bwiza".

Mu buhamya bya Niyigena (uwatanze uhuhamya), haraho yagaragaje ko mu gihe cya Jenoside yakorewe Abatutsi yashatse guhungira mu rusengero rumwe rwo mu Itoreri rya EAR ariko Pasiteri wa EAR icyo gihe umwe yanga ko aruhungiramo.

Ibi byatumye Musenyeri Ahimana abimusabira imbabazi kubera guteshuka ku ishingano bikozwe n'uwamwimye ubuhungiro.

Muri iki gikorwa kandi habayemo no gusura urwibutso rwa Jenoside Yakorewe Abatutsi rwa Commune Rouge, ruherereye muri aka Karere ka Rubavu.

Eulade Mahirwe.

Rubavu: Rubavu Music Awards and Talent Detection igiye kongera kuba bwa kabiri

Valens Nzabonimana — 2026-04-27T09:51:39Z

Aya marushanwa yateguwe n'ikigo cya Vision Jeunesse Nouvelle na Future Novelty Company n'Akarere ka Rubavu, akaba agiye kuba ku nshuro ya kabiri, nyuma y'umwaka ushize. Ibi bikaba byaragatsweho mu kiganiro n'abanyamakuru ku wa Gatandatu tariki 26 Mata 2026.

Frère Vital Ringuyeneza, Umuyobozi wa Vision Jeunesse Nouvelle

Aya marushanwa afite intego yo gufasha urubyiruko guteza impano zabo imbere, bityo zibe zabafasha kugera ku musaruro, aho biteganyijwe ko mu bayategura bazazenguruka mu mirenge yose y'Akarere ka Rubavu, bashaka abanyempamo ngo bahatane muri aya marushanwa.

Fred Ruterana, Umuyobozi wa Future Novelty Company, yagarutse ku buryo ibihembo biteye n'uburyo bizatangwa mu byiciro 12 ku bazaba batsinze muri aya marushanwa.

Yagize ati"N'ubundi tuzareba ibyiciro 12 nkuko twabigenjeje umwaka ushize, ariko hari impinduka zabayemo, ubushize, twari dufite icyiciro, cy'umufotogarafe mwiza, ariko icyo cyiciro twagikuyemo, dushyiramo icyindi cyiciro twagiraga ngo kidufashe kugera mu gihugu hose".

Abategura aya marushanwa kandi bagaragaza muri rusange ko hari intambwe ifatika mu kugera ku ntego zayo kuva yatangira, nkuko bigarukwaho kandi na Frère Vital Ringuyeneza, Umuyobozi w'Ikigo cya Vision Jeunesse Nouvelle.

Ati"Twabonye impano shyashya, mu bajene 500, tubona abahanzi nabo babigize umwuga 72, nabo bitabiriye, kandi muri abo bahanzi bitabiriye 12 muri bo barahembwe, uwa mbere uwa kabiri muri buri cyiciro, nanone duhemba no muri za mpano z'abajene bakizamuka 12".

Akarere ka Rubavu ni umwe mu baterankunga bakomeye baya marushanwa, ndetse kagaragaza ko gafite n'ubushake by'umwihariko mu guteza imbere impano z'urubyiruko muri kano karere, nkuko bishimangirwa na Mulindwa Prosper ukayobora.

Ati"Amakosa cyangwa ibyuho mwaba namwe mwarabonye, turagira ngo tubabwire ngo ntabwo bizongera kubaho uyu mwaka, kuko mu mitegurire yacu, twabanje guhindura mu byo tutakoze neza, kugira ngo tuzabigereho muri uriya mwaka".

Abazatoranya abazahatana muri aya marushanwa bazareba impano zashyizwe mu byiciro bitandatu, hanyuma abazatora bakazatora babicishije ku mbuga nkoranyambaga, ku kigero cya 50%.

Biteganyijwe ko hari n'abanyamakuru nabo bazaba bari mu batora, batore nabo ku kigero cya 50%. Gutanga ibihembo bikaba biteganyijwe mu kwezi gutaha kwa Gicurasi.

Eulade Mahirwe

AFC/M23 na Kinshasa bemeranyije guhererekanya imfungwa zikanyuzwa muri Uganda

Valens Nzabonimana — 2026-04-23T16:09:50Z

Byagarutsweho mu kiganiro Ihuriro AFC/M23 n'abanyamakuru cyabaye ku wa Gatatu, ku tariki 22 Mata 2026, mu Mujyi wa Goma kiyobowe na Benjamin Mbonimpa, usanzwe ari Umunyamabanga wa AFC/M23.

Ihuriro AFC/M23 ryagiranye ikiganiro n'itangazamakuru.

Iri huriro ryagarutse ku byo ryemeranyijwe na Leta ya Kinshasa mu biganiro by'amahoro i Montreux mu Busuwisi muri uku kwezi kwa Kane. Harimo ingingo eshatu bemeranyijweho, arizo guhererekanya ifungwa, agahenge, ndetse no korohereza ibikorwa by'ubutabazi.

Impande zombi zemeranyijwe guhererekanya imfungwa, ariko zikanyuzwa muri Uganda. Ku ngingo yo guhererekanya ifungwa biteganyijwe ko Kinshasa izatanga imfungwa za AFC/M23 zigera kuri 311, naho AFC/M23, nayo igaha Kinshasa abagera ku 166, ibi bikazakorwa ku bufatanye n'Umuryango Utabara Imbabare, (CICR) zikanyuzwa mu gihugu cya Uganda, mbere yuko zigezwa mu birindiro bya buri ruhande muri izi zihanganye.

Iyi ngingo yagarutsweho na Me Jean Paul Shaka wari muri iki kiganiro, ndetse akaba ari n'umwe mu bari bahagarariye AFC/M23, muri ibi biganiro byabereye mu Busuwisi.

Ati" Impande zombi zumvikana ko ifungwa zigomba kurekurwa mu minsi icumi, uhereye umunsi ibiganiro byarangiye, ibyo ngibyo bikurikiye raporo ya CICR, kuko yari yarakoranye n'impande zombi. Dushobora kugaragaza izo fungwa ni bande? Kuko buri ruhande bari batanze amazina y'ifungwa".

Hanyuma ku kijyanye no guhagarika imirwano, Me Shaka yagaragaje ko bumvikanye ko mu minsi ya vuba abo bantu batatu kuri buri ruhande bazakorana inama n'iryo tsinda (team ) kugira ngo batangire gukora ingendo, kugira bareba iyubahirizwa ry'amasezerano riri gukorwa".

Izi mpande zombi zemeranyijwe ibikorwa bigendanye n'ubutabazi nko kwirinda ibikorwa bihungabanya abaturage bityo bakabona uburyo bagera ku bikorwa bakenera byo kubafasha kubaho.

Ni mu gihe Leta ya Kinshasa ishinjwa kugota abaturage mu bice bya za Minembwe, bityo ntibabashe kubona uburyo bagera ku bintu bimwe by'ingenzi bakenera, nk'imiti n'iibiribwa.

Icyicaro cy'abantu batatu ku ruhande rwa Leta ya Kinshasa, ndetse n'uruhanda rwa AFC/M23, hamwe n'abandi bo mu bihugu by'akarere, ICJR, baza bashinzwe kugenzura ishyirwa mu bikorwa ry'agahenge bazaba bafite icyicaro i Goma, hasanzwe hagenzurwa na AFC/M23.

Eulade Mahirwe.

Perezida w'u Burundi yaragije Imana igihugu cye nyuma y'uko ububiko bw'intwaro z'igisirikare cy'u Burundi bufashwe n'inkongi y'umuriro

Valens Nzabonimana — 2026-04-01T08:35:34Z

Iyi nkongi yabaye mu ijoro ryo ku wa 31 Werurwe, yibasiye ububiko bw'intwaro buri mu kigo cya gisirikare kizwi nka ‘Base', giherereye mu gace ka Musaga i Bujumbura.

I Burundi mu ijoro ryo kuwa 31 Werurwe 2026, humvikanye urusaku rw'ibiturika.

Igisirikare cy'u Burundi na Minisiteri y'Umutekano w'imbere mu gihugu, byatangaje ko iyi nkongi yaturutse ku kibazo cy'umuriro w'amashanyarazi.

Mu butumwa Perezida Ndayishimiye yashyize ku rubuga nkoranyambaga rwa X, mu ijoro ryo ku wa 31, yihanganishije Abarundi, ndetse asaba Imana kubana n'u Burundi.

Ati “Nihanganishije abagize ibyago biturutse ku muriro wadutse mu bubiko bumwe bw'ikigo cya gisirikare iri muri Zone Musaga. Duhumurije Abarundi bose: Inzego z'igihugu ziri gukora ibishoboka byose kugira ngo zitabare kandi zikomeje kurinda ubusugire mu buryo. Imana irinde u Burundi.”

U Rwanda rwitabiriye PISA 2025 mu rwego rwo kunoza ireme ry'uburezi, ntabwo ari amarushanwa

Valens Nzabonimana — 2026-03-11T11:25:25Z

Mu rwego rwo kurushaho kunoza ireme ry'uburezi no gufata ibyemezo bishingiye ku makuru afatika, u Rwanda rwinjiye ku nshuro ya mbere mu isuzuma mpuzamahanga rya Porogaramu Mpuzamahanga y'Isuzumabumenyi ry'Abanyeshuri (PISA). Iri suzuma ritegurwa n'Umuryango Mpuzamahanga w'Ubukungu, Ubufatanye n'Iterambere (OECD), rikaba rikorwa ku banyeshuri bafite imyaka 15, hagamijwe kureba uko bashobora gukoresha ubumenyi bafite mu gusoma, imibare na siyansi mu gukemura ibibazo byo mu buzima busanzwe.

Isuzuma mpuzamahanga rya PISA umukoro ku Rwanda

Mu rwego rwo gufasha abafatanyabikorwa mu burezi gusobanukirwa neza iri suzuma n'akamaro karyo, Ikigo cy'Igihugu gishinzwe Ibizamini n'Ubugenzuzi bw'Amashuri (NESA) cyari cyateguye inama nyunguranabitekerezo yahuje abafatanyabikorwa mu burezi ku wa 23 na 24 Gashyantare 2026.

Iyo nama yahuje abayobozi b'amashuri, ababyeyi, abayobozi bungirije b'uturere bashinzwe imibereho myiza y'abaturage, abashinzwe uburezi mu turere, abafatanyabikorwa mu burezi, abayobozi ku rwego rw'igihugu bafite aho bahuriye n'uburezi n'ibarurishamibare ndetse n'abanyamakuru.

Nubwo iyi nama yabaye mu ntangiriro z'umwaka, abayobozi mu burezi bavuga ko ibiganiro byabereye muri yo bikomeje kugira uruhare mu gusesengura amakuru yakusanyijwe muri PISA 2025 no gutegura raporo y'igihugu izafasha kunoza uburezi mu Rwanda.

Kuki u Rwanda rwinjiye muri PISA?

PISA ni isuzuma mpuzamahanga rikorwa buri myaka itatu ku banyeshuri bafite imyaka 15, rikareba cyane cyane ubumenyi bwabo mu gusoma, imibare na siyansi, harebwa uko bashobora gukoresha ibyo bize mu gukemura ibibazo byo mu buzima busanzwe.

Kwitabira iri suzuma bifasha ibihugu kubona amakuru afatika ku rwego rw'ubumenyi bw'abanyeshuri, bityo bikabasha gushyiraho ingamba zigamije kunoza ireme ry'uburezi.

Ku Rwanda, kwitabira PISA 2025 hagamijwe kugereranya ireme ry'uburezi bw'u Rwanda n'ibipimo mpuzamahanga; kubona amakuru yizewe yafasha mu gufata ibyemezo bishingiye ku bimenyetso mu rwego rwa politiki y'uburezi; no guteza imbere ibiganiro ku rwego rw'igihugu bigamije kunoza ireme ry'uburezi.

Abayobozi mu burezi bashimangira ko nubwo iri suzuma rituma ibihugu bishobora kugereranya aho bihagaze, intego nyamukuru atari ukurushanwa n'ibindi bihugu, ahubwo ari kwigira ku makuru atangwa n'iri suzuma kugira ngo uburezi bukomeze kunozwa.

PISA ifasha kumenya aho uburezi buhagaze

Mu ijambo rye ryatanzwe muri iyo nama, Umuyobozi Mukuru wa NESA, Dr Bernard Bahati, yavuze ko kwitabira PISA ari intambwe ikomeye ku Rwanda mu gusobanukirwa neza ireme ry'uburezi.

Yagize ati:“Kwifatanya n'ibindi bihugu muri PISA si ukurushanwa, ahubwo ni amahirwe yo gusobanukirwa aho uburezi bwacu buhagaze no kumenya ibyo twanoza. Amakuru azava muri iri suzuma azadufasha gufata ibyemezo bishingiye ku bimenyetso bigamije guteza imbere ireme ry'imyigire n'imyigishirize.”

Umuyobozi Mukuru wa NESA, Dr Bernard Bahati

Yongeyeho ko usibye gupima ubumenyi bw'abanyeshuri, PISA inakusanya n'amakuru ajyanye n'imibereho yabo, imyigire n'ibindi bishobora gufasha gusobanukirwa impamvu zimwe mu zituma imyigire igenda neza cyangwa igahura n'imbogamizi.

Icyizere ku hazaza h'uburezi

Biteganyijwe ko raporo ya PISA 2025 izatangazwa ku mugaragaro ku wa 8 Nzeri 2026. Amakuru azavamo azafasha u Rwanda kumenya aho ruhagaze mu burezi ugereranyije n'ibindi bihugu, ndetse anafashe inzego zishinzwe uburezi gushyiraho ingamba zigamije kurushaho kunoza ireme ry'uburezi.

Mu Rwanda, isuzuma rya PISA 2025 ryitabiriwe n'abanyeshuri basaga 7,000 bafite imyaka 15 baturutse mu mashuri asaga 200 yo hirya no hino mu gihugu.

Ku Rwanda, uru rugendo rwa PISA rufatwa nk'intambwe ikomeye igamije gukomeza guteza imbere uburezi bushingiye ku makuru afatika no gutegura neza ejo hazaza h'abanyeshuri.

Harerimana Dieudonne

Dore link iriho ikiganiro cyose.

https://youtu.be/z_8u0HncAoo?si=SsAMOaS2oOXpZlKq

Yafashwe inatunganywa na Niyigena Benjamin na Harerimana Dieudonne.

Amafoto yaranze ibikorwa bitandukanye.

Gicumbi: Abarwanashyaka ba Green Party basabwe guhangana n'ibiyobyabwenge

Valens Nzabonimana — 2026-03-01T17:12:00Z

Hon. Masozera wo mu ishyaka riharanira Demokarasi no kurengera ibidukikije mu (Rwanda Green party of Rwanda) yasabye Abarwanashyaka ko bakwiye guhangana n'ibiyobyabwenge nk'abantu baturiye umupaka.

Hon. Jacky Icyizanye Masozera

Ibi yabigarutseho kuri iki Cyumweru ubwo yari yaje mu nama ikomatanyije n'amahugurwa y'Abarwanashyaka yabereye mu karere ka Gicumbi.

Dusengima Domithila n'umurwanashyaka wa Green Party avuga ko bagiye gukomeza kwigisha ndetse bagatangira amakuru ku gihe .

Ati”Guhangana n'ibiyobyabwenge ntabwo uhangana n'abanyirabyo ahubwo utangira amakuru ku gihe ku nzego z'umutekano, nk'abarwanashyaka ni ukubyirinda dukurikiza inama abayobozi bacu batugiriye tukabyirinda kuko biduhesha isura mbi.”

Dusabyimana Theoneste ni Chairman w'abarwanashyaka ba Green Party mu karere ka Gicumbi avuga ko bagiye gukomeza ingamba zo guhashya ibiyobyabwenge.

Ati”ibyo bintu bijyanye n'ibiyobyabwenge birahari inaha kubera ko duhanye imbibi na Uganda ndetse na Tanzania, ariko Abarwanashyaka bacu ba Green Party tubashishikariza kutajya muri ibyo bintu ubu dutahanye ingamba zo gukomeza kubyirinda cyane ko mwabonye ko twarikumwe n'urubyiruko rwinshi cyane kuko ari bo bakunda kubyijandikamo cyane twababwiye ko bagomba kugeza ubu butumwa hose mu mirenge.”

Abarwanashyaka ba Green Party biyemeje kurwanya ibiyobyabwenge.

Hon.Masozera waje ahagarariye Perezida w'ishyaka rya Green Party yavuze ko umuntu w'umusinzi atajya gutanga ubutumwa ngo abayoboke bamwumve.

Ati”Umuntu agusanisha n'icyo uri cyo ntabwo waba uri umusinzi ngo ujye gutanga ubutumwa bwo kuyoboka ishyaka ryacu ngo hagire ukumva, ntabwo waba ugira urugomo ngo ujye gukora ubukangurambaga ubwo umuntu yakumva ko Abarwanashyaka ari iyo myitwarire bafite, rero turasaba Abarwanashyaka bacu dutumye kujya gushaka abayoboke kurangwa n'imyitwarire myiza.”

Ndayambaje Jean Claude

Ubumwe bw'Uburayi (EU) yatangaje ko itazemera izamurwa ry'imisoro ku bicuruzwa byoherezwa muri Amerika nyuma y'icyemezo cy'Urukiko rw'Ikirenga

Valens Nzabonimana — 2026-02-23T10:47:09Z

Komisiyo y'Ubumwe bw'Uburayi yatangaje ko nta zamurwa ry'imisoro (tariffs) izemera ku bicuruzwa byoherezwa muri Leta Zunze Ubumwe za Amerika, nyuma y'uko Urukiko rw'Ikirenga rwa Amerika ruhagaritse amategeko yari yemereye Perezida Donald Trump gushyiraho imisoro ya rusange ku mbuto zose ziva mu mahanga.

Nyuma y'icyo cyemezo, Perezida wa Leta zunze ubumwe z'Amerika yashyizeho misoro mishya ya 10% ku bicuruzwa byose byinjira mu gihugu, kugera kuri 15% umunsi wakurikiyeho. Ibi byateje impaka kuko bitajyanye n'amasezerano y'ubucuruzi Ubumwe bw'Uburayi ndetse na Leta Zunze Ubumwe za Amerika yo mu mwaka ushize, yari yashyizeho 15% ku misoro ku bicuruzwa byinshi byoherezwa n'Ubumwe bw'Uburayi, hamwe n'imisoro ya 0% ku bindi.

Komisiyo y'Ubumwe bw'Uburayi ivuga ko ibi byemezo bidahuye n'amabwiriza y'amasezerano kandi bishobora guteza ikibazo ku masoko y'imari n'ibikorwa by'ubucuruzi. Yongeyeho ko Ubumwe bw'Uburayi buteze amatwi ibisobanuro byuzuye ku byo Amerika izakora nyuma y'icyemezo cy'urukiko, ariko ko “amasezerano ari amasezerano” kandi ko kuzamura imisoro ku rwego rwo hejuru bitazemerwa.

Amasezerano y'ubucuruzi yashyizweho yari agamije kongera ubwizerane mu bucuruzi hagati y'ibihugu byombi, aho Ubumwe bw'Uburayi na Amerika bari bemeranyije kugabanya imbogamizi z'imisoro ku byoherezwa mu mahanga kugira ngo ubucuruzi bubere inyungu impande zombi.

SAUALA SANDRA TUMUKUNDE

U Burusiya bwakiriye Intwaro n'Amasasu menshi mu kwezi kwa Mutarama

Valens Nzabonimana — 2026-02-04T08:55:25Z

Minisitiri w'Ingabo w'u Burusiya, Andrey Belousov, yatangaje ko mu kwezi kwa Mutarama konyine, ingabo z'u Burusiya zakiriye intwaro zirenga 10,000 n'amasasu agera kuri miliyoni ebyiri, byinjiye mu mirimo ya gisirikare.

Ibi yabivugiye mu nama yayoboye igamije gusuzuma uko gahunda yo gutanga ibikoresho bya gisirikare igenda ishyirwa mu bikorwa. Belousov yavuze ko izi ntwaro n'amasasu byatangiye gukoreshwa n'ingabo z'u Burusiya, bikaba bigaragaza ko umusaruro w'inganda z'intwaro ukomeje kwiyongera.

Nyuma y'iyo nama, Minisiteri y'Ingabo y'u Burusiya yatangaje ko mu mwaka wa 2026 hateganyijwe gutanga ibikoresho bya gisirikare birenga 310,000, hamwe n'amasasu agera kuri miliyoni 21. Ibi bikubiyemo imodoka za gisirikare, intwaro ziremereye n'izoroheje, n'ibindi bikoresho byifashishwa ku rugamba.

Minisiteri yakomeje ivuga ko izi gahunda zigamije kongera ubushobozi bw'ingabo z'igihugu no kuzituma zikomeza kuba ku rwego rwo hejuru mu bijyanye n'ibikoresho n'intwaro.

Abasesenguzi bavuga ko iyi mibare igaragaza ko u Burusiya bukomeje gushyira imbaraga nyinshi mu gisirikare cyabwo, cyane cyane mu gihe umutekano w'akarere n'isi muri rusange ukomeje kuba ikibazo gikomeye.

Mama U rwagasabo

Rubavu: Abazahembwa muri Rubavu Music Awards and Talent Detection bamaze gutoranywa

Yanditswe na Eulade Mahirwe.

Rwanda: Hazatangwa ibikombe 2 muri Shampiyona

Valens Nzabonimana

Rubavu: Itorero EAR ryateguye igikorwa cyo kwibuka Jenoside yakorewe Abatutsi mu 1994

Eulade Mahirwe.

Rubavu: Rubavu Music Awards and Talent Detection igiye kongera kuba bwa kabiri

Eulade Mahirwe

AFC/M23 na Kinshasa bemeranyije guhererekanya imfungwa zikanyuzwa muri Uganda

Eulade Mahirwe.

Perezida w'u Burundi yaragije Imana igihugu cye nyuma y'uko ububiko bw'intwaro z'igisirikare cy'u Burundi bufashwe n'inkongi y'umuriro

U Rwanda rwitabiriye PISA 2025 mu rwego rwo kunoza ireme ry'uburezi, ntabwo ari amarushanwa

Harerimana Dieudonne

Gicumbi: Abarwanashyaka ba Green Party basabwe guhangana n'ibiyobyabwenge

Ndayambaje Jean Claude

Ubumwe bw'Uburayi (EU) yatangaje ko itazemera izamurwa ry'imisoro ku bicuruzwa byoherezwa muri Amerika nyuma y'icyemezo cy'Urukiko rw'Ikirenga

SAUALA SANDRA TUMUKUNDE

U Burusiya bwakiriye Intwaro n'Amasasu menshi mu kwezi kwa Mutarama

Saula Sandra Tumukunde