Mama U rwagasabo

Lioner Messi yageze ku mukino wa nyuma w'Igikombe cy'Isi cya 2026

Valens Nzabonimana — 2026-07-16T12:33:25Z

Kapiteni wa Argentina yongeye kuyobora ikipe ye mu rugendo rwo guhatanira igikombe cya kabiri gikurikiranye, Lionel Messi yongeye kwandika amateka nyuma yo gufasha ikipe y'igihugu ya Argentina kugera ku mukino wa nyuma w'Igikombe cy'Isi cya 2026. Ni intambwe ikomeye ku mukinnyi w'imyaka 39 ukomeje kwerekana ko afite impano idasanzwe.

Mu mukino wa 1/2 wahuje Argentina n'Ubwongereza, Messi yagaragaje ubuhanga bwe, afasha bagenzi be kugenzura umukino no kugera ku ntsinzi yabahesheje itike yo kuzakina umukino wa nyuma. N'ubwo atakiri muto nk'uko byahoze, akomeje kuba umutima w'ikipe ndetse n'umukinnyi utuma ibintu bihinduka igihe bikomeye.

Kugera ku mukino wa nyuma bivuze ko Argentina igifite amahirwe yo kwisubiza igikombe yatwaye mu 2022. Abafana bayo hirya no hino ku isi bakomeje kwizera ko Messi ashobora gusoza urugendo rwe mu Gikombe cy'Isi yegukanye indi ntsinzi ikomeye.

Ni ku nshuro ya kabiri yikurikiranya Argentina igeze ku mukino wa nyuma w'Igikombe cy'Isi, ibintu bigaragaza ko ikomeje kuba imwe mu makipe akomeye ku rwego mpuzamahanga. Umutoza n'abakinnyi bavuga ko intego yabo ari ugusoza neza iri rushanwa begukana igikombe.

Mu mukino wa nyuma, Argentina izahura na Espagne Uwo mukino utegerejwe na benshi kuko uzagaragaza niba Messi ashobora kongera kwegukana Igikombe cy'Isi cyangwa se Spain igitware dore ko iheruka ku mukino wa nyuma 2010 iranagitwara itsinze Ubuholandi 1-0.

YANDINTSWE NA GENIUS FIDA

France na Espagne ziracakirana mu mukino wa 1/2 cy'Igikombe cy'Isi 2026: Mbappé na Yamal bahanganiye itike yerekeza ku mukino wa nyuma

Valens Nzabonimana — 2026-07-14T12:16:59Z

Dallas, Texas kuri uyu wa Kabiri saa tatu z'ijoro ku isaha yo mu Rwanda, amakipe y'ibihangange mu mupira w'amaguru ku mugabane w'u Burayi, u Bufaransa (France) na Espagne (Spain), aracakirana mu mukino wa 1/2 cy'Igikombe cy'Isi cya 2026. Uyu ni umwe mu mikino utegerejwe cyane muri iri rushanwa kuko uhuza amakipe abiri amaze kwitwara neza kuva ryatangira.

Mu rugendo rwo kugera muri 1/2, u Bufaransa bwitwaye neza, aho bwatangiye butsinda Suède ibitego 3-0 muri 1/32, bukurikiraho Paraguay 1-0 muri 1/16, mbere yo gukuramo Maroc itsinzwe ibitego 2-0 muri 1/4.

Ku rundi ruhande, Espagne yasezereye Autriche iyitsinze ibitego 3-0, itsinda Portugal 1-0 muri 1/16, nyuma ikuramo u Bubiligi ku bitego 2-1 muri 1/4.

Amaso y'abakunzi b'umupira araba ahanzwe cyane ba rutahizamu b'ibyamamare, ari bo Kylian Mbappé uyoboye ubusatirizi bw'u Bufaransa, afatanyije na Ousmane Dembélé na Michael Olise, mu gihe Espagne iribwishingikirize kuri Lamine Yamal, Pedri, Rodri na Mikel Merino, bakomeje kwitwara neza muri iri rushanwa.

Aya makipe afite amateka akomeye yo guhangana, aho mu mikino 38 amaze guhura, Espagne yatsinze inshuro 18, u Bufaransa butsinda inshuro 13, banganya inshuro 7.

Mu mikino iheruka, Espagne yatsinze u Bufaransa muri EURO 2024 no muri UEFA Nations League 2025, ibintu bituma u Bufaransa bwinjira muri uyu mukino bushaka kwisubiza icyubahiro.

Abasesenguzi benshi bemeza ko uyu mukino ushobora kugenwa n'uburyo amakipe yombi yitwara hagati mu kibuga no mu bwugarizi.

U Bufaransa buzwiho gusatira bwihuse no gukoresha impano ya Mbappé, mu gihe Espagne izwiho kugenzura umupira no kubaka ibitero buhoro buhoro.

Ibyo bituma benshi bawufata nk'ushobora kuba ari wo mukino ukomeye kurusha indi yose yabaye muri iki Gikombe cy'Isi kugeza ubu.

Ikipe iratsinda hagati ya France na Espagne irahita ibona itike yo gukina umukino wa nyuma w'Igikombe cy'Isi cya 2026, aho izahura n'izava hagati y'Ubwongereza (England) na Argentine bazakina undi mukino wa 1/2 ku wa Gatatu.

Utsindwa azakina umukino wo guhatanira umwanya wa gatatu. Abakunzi b'umupira w'amaguru ku isi yose bategerezanyije amatsiko kureba niba Mbappé ayobora u Bufaransa bukagera ku mukino wa nyuma inshuro ya Gatatu bikurikiranya, cyangwa niba Lamine Yamal n'abagenzi be bakomeza kwandika amateka mashya bakageza Espagne ku mukino wa nyuma w'Igikombe cy'Isi cya 2026 baherukaga kugeraho muri 2010 baranagitwara icyo gihe.

Lamine Yamal yujuje imyaka 19: Umwana w'igitangaza ukomeje kwandika amateka muri ruhago y'Isi

Valens Nzabonimana — 2026-07-13T12:13:52Z

Tariki ya 13 Nyakanga 2026, rutahizamu w'ikipe y'igihugu ya Espagne na FC Barcelona, Lamine Yamal, yujuje imyaka 19 y'amavuko. Nubwo akiri muto, amaze kuba umwe mu bakinnyi bakomeye ku Isi, ndetse isabukuru ye ije mu gihe ari gufasha Espagne guhatanira igikombe cy'Isi cya 2026.

Lamine Yamal yavukiye i Esplugues de Llobregat muri Espagne ku wa 13 Nyakanga 2007. Yinjiye mu ishuri ry'umupira rya La Masia rya FC Barcelona akiri muto cyane, aza kuzamurwa mu ikipe nkuru mu 2023. Mu gihe gito yakurikiyeho, yaciye agahigo ko kuba umwe mu bakinnyi bato bakoze ibidasanzwe haba muri La Liga ndetse no mu ikipe y'igihugu ya Espagne.

Mu mwaka ushize, Yamal yafashije FC Barcelona gutwara ibikombe bitandukanye, anahabwa umwambaro w'icyamamare nimero 10, wigeze kwambarwa na Lionel Messi. Yakomeje kwitwara neza ndetse yegukana ibihembo bitandukanye by'umukinnyi ukiri muto witwaye neza ku Isi, ibintu byamushyize mu bakinnyi bafite ejo hazaza heza muri ruhago.

Isabukuru ye y'uyu mwaka ije mu bihe bidasanzwe kuko Espagne iri kwitegura umukino wa 1/2 cy'Igikombe cy'Isi izahuramo n'u Bufaransa bwa Kylian Mbappé. Abasesenguzi benshi bavuga ko uyu mukino ushobora kuba amahirwe akomeye kuri Yamal yo gukomeza kwerekana impano ye no kuyobora Espagne igana ku mukino wa nyuma iherukaho muri 2010 iranacyegukana kugitego kimwe kubusa cyatsinzwe na Iniesta batsinze ubuhorande.

Nubwo afite imyaka 19 gusa, Lamine Yamal amaze kwandika amateka menshi. Yabaye umwe mu bakinnyi bato bakinnyi benshi bahamagarwa mu ikipe nkuru ya Espagne, atsinda ibitego by'ingenzi kandi agatanga imipira yavuyemo ibitego. Muri iki Gikombe cy'Isi cya 2026, yanabaye umukinnyi muto kurusha abandi ugeze ku mikino itandatu y'Igikombe cy'Isi mbere y'imyaka 19, ikindi kimenyetso cy'ubuhanga bwe.

Abakunzi b'umupira w'amaguru hirya no hino ku Isi bifurije Lamine Yamal isabukuru nziza, banamwifuriza gukomeza kurangwa n'ubwitange, kwirinda imvune no gukomeza kwandika amateka. Niba azakomeza gutera imbere nk'uko biri ubu, benshi bemeza ko ashobora kuzaba umwe mu bakinnyi beza Isi izibuka mu myaka iri imbere.

Yanditswe na Genius Fida

BK Pro League Awards 2026: Abakinnyi babaye intyoza bashimiwe ku mugaragaro

Valens Nzabonimana — 2026-07-13T10:25:16Z

“Mu” rwego rwo gushimira no guhemba abitwaye neza mu mwaka w'imikino wa 2025/26, BK Pro League yateguye ibirori bya BK Pro League Awards 2026, aho hatangajwe Ikipe y'Umwaka (Best XI of the Season), igizwe n'abakinnyi 11 bagaragaje ubwitange, ubuhanga n'umusaruro udasanzwe muri shampiyona. Ni ubwa mbere ibi bihembo byateguwe ku rwego runini, bigamije guha agaciro ibikorwa by'indashyikirwa byaranze umwaka wose.

Aba nibo bakinnyi beza baranze shampiyona y'u Rwanda mu mwaka w'imikino ushize.

Ikipe y'umwaka igizwe n'umunyezamu Désiré, ba myugariro ni Jean Gilbert Byiringiro, Luzolo, Karshoum na Sogoba, hagati mu kibuga hatoranyijwe Sackey J.Gilles R. na Jean Claude Girumugisha, mu gihe ubusatirizi bugizwe na Madické Kane, Djibril Ouattara na Taiba Mbonyumwami. Aba bakinnyi bose bagize umwaka udasanzwe, bafasha amakipe yabo kugera ku ntego zitandukanye zirimo guhatanira igikombe, imyanya myiza ndetse no kwitwara neza muri shampiyona.

Umwe mu bakinnyi bagaragaye cyane muri ibi bihembo ni Jean Claude Girumugisha wa Al Hilal SC, wegukanye igihembo cy'Umukinnyi Mwiza w'Umwaka (Player of the Season). Girumugisha yahawe imodoka nshya ifite agaciro ka miliyoni 15 Frw nyuma yo gutsinda bagenzi be bari bahanganye muri iki cyiciro. Imikinire ye, umuvuduko n'uruhare yagize mu gutwara igikombe cya shampiyona byatumye atorwa nk'umukinnyi wahize abandi bose muri uyu mwaka w'imikino.

Abasesenguzi b'umupira w'amaguru bavuga ko iyi kipe y'umwaka ari ishusho y'uko urwego rwa BK Pro League rukomeje gutera imbere. Kuba abakinnyi bakomoka mu makipe atandukanye bagaragaye muri iyi Best XI bigaragaza ko amarushanwa yaranzwe n'ihangana rikomeye ndetse n'ubuziranenge bwazamutse ugereranyije n'imyaka yabanje.

Ibi bihembo kandi ni intambwe ikomeye mu kuzamura isura ya shampiyona y'u Rwanda, kuko bishishikariza abakinnyi gukora cyane no guhatana mu buryo bw'umwuga. Byitezwe ko mu myaka iri imbere BK Pro League Awards izakomeza kuba kimwe mu birori bikomeye muri ruhago nyarwanda, bikazamura agaciro ka shampiyona ndetse bikanafasha abakinnyi b'Abanyarwanda kumenyekana ku rwego mpuzamahanga kandi bakarushaho gukarishya ubumenyi bityo ikipe y'igihugu ikabyungukiramo.

Yanditswe na Genius Fida

Jean Claude GIRUMUGISHA wa Al Hilal S.C, yahawe igihembo cy'Umukinnyi w'Umwaka (MVP), aho yahembwe imodoka nshya ya KIA Sorento.

Emmanuel Flomo wa Al Hilal Sports Club yegukanye Igihembo cy'Umukinnyi ukiri muto w'umwaka w'imikino 2025-26.

Rutahizamu wa APR FC Cheick Djibril Ouattara yahembwe nka rutahizamu watsinze ibitego byinshi (18) muri BK Pro League 2025-26.

Umunyezamu wa Kiyovu Sports, James Bienvenue Désiré Djayoyang yahawe igihembo cy'umunyezamu w'umwaka w'imikino 2025-26.

Hesbone Rutonesha ukinira Gorilla FC yegukanye igihembo cy'Igitego cy'Umwaka

Morocco irashaka kwihimura kuri France mu mukino w'ishiraniro wa 1/4 cy'Igikombe cy'Isi 2026

Valens Nzabonimana — 2026-07-09T18:28:32Z

Amatara ya Boston Stadium araka kuri uyu wa Kane, tariki ya 9 Nyakanga 2026, arerekeza ku mukino umwe rukumbi uri bube ku ngengabihe y'Igikombe cy'Isi. Ikipe y'igihugu y'u Bufaransa (France) iracakirana na Morocco mu mukino wa 1/4 cy'irangiza utangira saa 22:00 z'ijoro ku isaha ya Kigali, aho ikipe itsinda irahita ibona itike ya 1/2 cy'irangiza.

Uyu mukino ugarutse mu mitima y'abakunzi ba ruhago nyuma y'isubiranamo ryabaye mu Gikombe cy'Isi cya 2022, ubwo France yasezereraga Morocco muri 1/2 cy'irangiza. Kuri iyi nshuro, Morocco igarutse ifite icyizere cyo kwihimura no gukomeza kwandika amateka yo kuba igihugu cya Afurika cyagera kure kurushaho muri iri rushanwa, mu gihe France ishaka kongera kwerekana impamvu iri mu makipe ahabwa amahirwe yo kwegukana igikombe.

France yageze muri iki cyiciro nyuma yo gutsinda Sweden ibitego 3-0 muri 1/16 cy'irangiza, ikomeza isezerera Paraguay igitego 1-0 muri 1/8 cy'irangiza. Nubwo itari yatsinda ibitego byinshi mu mukino uheruka, yakomeje kwerekana ubukure, uburambe n'ubushobozi bwo kubona intsinzi igihe bikenewe.

Ku ruhande rwa Morocco, urugendo rwayo rwabaye urw'igitangaza. Yabanje gukuramo Netherlands kuri penaliti, mbere yo kunyagira Canada ibitego 3-0, ibintu byatumye yongera kwigarurira imitima y'abakunzi ba ruhago ku Isi. Imikinire yayo yiganjemo ubwugarizi bukomeye, gukoresha neza uburyo bwo gusubiza ibitero no gukorera hamwe ni byo byatumye igera muri iki cyiciro.

Abakinnyi baribandwaho cyane muri uyu mukino ni Kylian Mbappé, umaze kuba umwe mu bakinnyi b'ingenzi ba France, ndetse na Achraf Hakimi, kapiteni wa Morocco ukina ku ruhande rw'inyuma ariko ugatanga umusanzu munini mu busatirizi. Hararebwa kandi uko ba myugariro ba Morocco bazahangana n'umuvuduko wa Mbappé, mu gihe France izaba ishaka guca intege ibitero bya Morocco biyobowe na Hakimi na bagenzi be.

France kubera uburambe bwayo mu mikino nk'iyi ifite irahabwa amahirwe, gusa bamwe na bamwe banemeza ko Morocco ari ikipe itagomba gusuzugurwa kuko yamaze kwerekana ko ishobora gutsinda amakipe akomeye kandi ikitwara neza mu mikino y'ogukuranwamo.

Uratsinda hagati ya France na Morocco azahura muri 1/2 cy'irangiza n'uzava hagati ya Spain na Belgium, bityo uyu mukino ukaba ufite agaciro gakomeye ku makipe yombi mu rugendo rwo guhatanira igikombe cy'Isi cya 2026.

FIDA OMAR

Spain na Portugal ziracakirana i Saa 21:00 mu mukino ukomeye uzakugena ikipe ikomeza muri 1/4 cy'Igikombe cy'Isi

Valens Nzabonimana — 2026-07-06T11:19:08Z

Ikipe y'Igihugu ya Spain irahura na Portugal kuri uyu wa Mbere saa 21:00 z'ijoro ku isaha y'i Kigali, mu mukino wa 1/8 cy'Igikombe cy'Isi cya 2026, aho amakipe yombi yifuza gukomeza urugendo rugana ku gikombe.

Portugal na Spain zigiye guhura ku nshuro ya 42

Spain yageze muri iki cyiciro nyuma yo kunyagira Austria ibitego 3-0, igaragaza ubusatirizi bukomeye ndetse n'uburyo bw'umukino unogeye ijisho. Ku rundi ruhande, Portugal nayo yinjiriye muri 1/8 itsinze Croatia ibitego 2-1, yerekana ko ifite ikipe ishobora guhangana n'uwo ari we wese.

Uyu mukino uhuza ibihugu bibiri bihora bihanganye mu Burayi, kandi buri ruhande rufite abakinnyi bashobora guhindura umukino mu kanya gato. Spain iracyishingikiriza ku bakinnyi bayo bato bafite umuvuduko n'ubuhanga bwo guhererekanya umupira, mu gihe Portugal ifite uburambe n'abakinnyi bafite ubunararibonye.

Mu mateka y'aya makipe, imikino hagati yayo yakunze kuba irimo ihangana rikomeye, aho akenshi amakipe yombi atsindana bigoranye. Ibyo bituma benshi bateganya ko n'uyu mukino ushobora kurangira utandukanyijwe n'igitego kimwe cyangwa ukagera mu minota y'inyongera cyangwa hakaba hakitabazwa za penaliti.

Ikipe iratsinda hagati ya Spain na Portugal irahita ibona itike ya 1/4, aho izahura n'izava hagati ya Belgium na United States, na bo bakina kuri uyu wa kabiri saa 2:00 mu rukerera.
Abafana b'umupira w'amaguru hirya no hino ku Isi bategereje uyu mukino nk'umwe mu ikomeye muri iki cyiciro, bitewe n'ubwiza bw'umupira amakipe yombi asanzwe akina ndetse n'amazina akomeye ayarimo.

Biteganyijwe ko uraba ari umukino urimo ubuhanga, amayeri menshi y'abatoza n'ihangana rikomeye kugeza ku munota wa nyuma. Aya makipe amaze guhura inshuro 41 aho Spain yatsinze 17 naho Portugal yatsinze inshuro 6 hanyuma banganya inshuro 18.

Yanditswe na Genius Fida

Neymar yasezeye gukinira ikipe ya Brazil

Valens Nzabonimana — 2026-07-06T11:00:09Z

Umunya-Brazil Neymar da Silva Santos Júnior yatangaje ko atazongera gukinira ikipe y'igihugu ya Brazil (Seleção), nyuma y'uko iyi kipe isezerewe mu Gikombe cy'Isi cya 2026.
Brazil yasezerewe muri 1/8 cy'irangiza nyuma yo gutsindwa na Norway ibitego 2-1, umukino warangiye ushyize akadomo ku rugendo rwa Neymar mu ikipe y'igihugu yari amaze imyaka 16 akinira.

Neymar ntazongera kugaragara mu ikipe ya Brazil

Nyuma y'umukino, Neymar yavuze amagambo agaragaza ko atazongera kwambara umwambaro wa Brazil, ashimira abafana, abatoza n'abakinnyi bose bakoranye muri uru rugendo.

Uyu mukinnyi w'imyaka 34 asoje ari umwe mu bakinnyi bakomeye igihugu cya Brazil cyagize. Mu rugendo rwe, yafashije Brazil kwegukana FIFA Confederations Cup 2013, anatwara umudari wa zahabu mu mikino Olempike ya Rio de Janeiro mu 2016.

Neymar yanditse amateka yo kuba umwe mu bakinnyi batsindiye Brazil ibitego byinshi kurusha abandi, ibintu byamushyize mu banyabigwi b'umupira w'amaguru muri iki gihugu, kuko Neymar yatsinze ibitego 80, akaba akurikirwa na nyakwigendera Pele watsinze 77.

Nubwo yasezeye mu ikipe y'igihugu, Neymar ntaratangaza ko asezeye burundu ku mupira w'amaguru. Kugeza ubu aracyakinira ikipe ya Santos FC, bivuze ko abafana be bazakomeza kumubona mu marushanwa y'amakipe.

Gusezera kwe gukinira Brazil ni iherezo ry'igihe cyaranze umupira w'amaguru muri iki gihugu, aho yabaye umwe mu bakinnyi bakunzwe cyane ku Isi kubera ubuhanga bwe, umuvuduko n'ubushobozi bwo gutsinda ibitego.

Nubwo urugendo rwe muri Seleção rurangiye, izina rya Neymar rizakomeza kuba mu mateka y'umupira w'amaguru wa Brazil nk'umwe mu bakinnyi b'ibihe byose.
Mu myaka 16 yakinnye ku rwego rwo hejuru (2009–2025), Neymar yegukanye ibikombe byinshi mu makipe yakiniye ndetse no mu ikipe y'igihugu Muri Santos FC (Brazil) Neymar yatwaye, Campeonato Paulista (3): 2010, 2011, 2012 arongera atwara Copa do Brasil (1): 2010, Copa Libertadores (1): 2011, Recopa Sudamericana (1): 2012 .

Agikinira Barcelona yatwaye La Liga (2): 2014–15, 2015–16, Copa del Rey (3): 2014–15, 2015–16, 2016–17, Supercopa de España (1): 2016 UEFA Champions League (1): 2014–15, UEFA Super Cup (1): 2015, FIFA Club World Cup (1): 2015

Muri Paris Saint-Germain (PSG) Neymar yatwaye Ligue 1 (5): 2017–18, 2018–19, 2019–20, 2021–22, 2022–23, Coupe de France (3): 2017–18, 2019–20, 2020–21, Coupe de la Ligue (2): 2017–18, 2019–20 Trophée des Champions (3): 2018, 2020.

Yanditswe na Genius Fida

Rwanda: Hazatangwa ibikombe 2 muri Shampiyona

Valens Nzabonimana — 2026-05-12T11:13:18Z

Mu gitondo cyo kuri uyu wa Kabiri, nyuma y'uko Perezida wa FERWAFA Shema Ngonga Fabrice yari yatangaje ko hazatangwa igikombe kimwe kuri Al Hilal SC, ikipe yo mu Rwanda yaje imbere igahabwa amafaranga gusa, abantu bibazaga uko bizagenda, kuko byari bitandukanye n'ibyatangajwe mbere.

Urwego Rushinzwe gutegura shampiyona, Rwanda Premier League, rwatangaje ko hazatagwa ibikombe bibiri.

Ikipe yo muri Sudani izasoreza ku mwanya wa mbere muri BK Pro League y'uyu mwaka izahabwa igikombe nk'ikipe yahize izindi [BK Pro League Champions 2025/2026]. Ariko aya makipe y'abashyitsi yo ntabwo azahabwa ibihembo by'amafaranga byagenewe amakipe yitwaye neza.

Rwanda Premier League kandi izatanga ikindi gikombe ku ikipe yahize andi mu makipe yo mu Rwanda [BK Pro League National Champions] ndetse akaba ari yo izahagararira u Rwanda muri CAF Champions League ya 2026/2027.

Valens Nzabonimana

REG VC YEGUKANYE MEMORIAL KAYUMBA 2026 ITSINZE GISAGARA VC

Chadadi Habimana — 2026-03-09T08:59:39Z

Ikipe ya REG VC yegukanye igikombe cy'irushanwa ngarukamwaka rya Volleyball, rizwi nka Memorial Kayumba 2026, nyuma yo gutsinda Gisagara VC amaseti 3-1 ku mukino wa nyuma wabereye mu Karere ka Huye.

Iri rushanwa ribaye ku nshuro ya 16, rikaba ritegurwa buri mwaka mu rwego rwo kwibuka Padiri Kayumba Emmanuel wabaye Umuyobozi wa Groupe Scolaire Officiel de Butare (Indatwa n'Inkesha.)

Ni irushanwa ryabaye kuva ku wa Gatandatu tariki ya 7 kugeza ku Cyumweru tariki ya 8 Werurwe 2026, ribera ku kigo cy'amashuri cya Groupe Scolaire Officiel de Butare (GSOB), kizwi nka Indatwa n'Inkesha.

Amakipe yitabiriye muri Volleyball yari mu byiciro bitatu,shampiyona y'icyiciro cya mbere mu bagabo,icyiciro cya kabiri,abakiri bato n'abakanyujijeho
Mu cyiciro cya mbere mu bagabo, REG VC yegukanye igikombe itsinze Gisagara VC amaseti 3-1 (25-14, 25-20, 24-26, 25-21).

REG V.C yatsinze Gisagara yegukana igikombe cya Memorial Kayumba.

Ikipe ya East African University Rwanda (EAUR) yegukanye umwanya wa gatatu nyuma yo gutsinda Kepler.

Mu cyiciro cya kabiri, ikipe ya Kinyinya yegukanye igikombe itsinze UR Huye amaseti 3-0, naho Win Star itsinda UR Busoro amaseti 3-2.

Mu cyiciro cy'abakiri bato, ikipe ya U Poly yegukanye igikombe itsinze Nyanza TSS amaseti 3-1. Mu batarengeje imyaka 17 (O'Level), Regina Pacis yegukanye igikombe itsinze GSOB amaseti 3-2.Mu bakanyujijeho, ikipe ya Kinyinya yegukanye igikombe itsinze Umucyo amaseti 3-0.

Hanabaye andi marushanwa atandukanye arimo gusiganwa ku magare aho mu bahungu batarengeje imyaka 16, Butwari Bob yabaye uwa mbere, naho mu bakobwa Ineza Butera Kevine aba uwa mbere mu bilometero 8.3 byakinwe.

Umukino waranzwe n'ishyaka ryinshi ku mpande zombi.

Padiri Kayumba Emmanuel witabye Imana mu mwaka wa 2009, yari umuyobozi wa Groupe Scolaire Officiel de Butare ndetse n'umukunzi ukomeye wa Volleyball. Mu kumwibuka, iri rushanwa ryatangiye gutegurwa mu 2010, rigamije gukomeza guteza imbere uyu mukino n'indi mikino irimo Beach Volleyball ndetse no koga, nubwo Volleyball ari yo ihabwa umwanya munini.

Yvette Niyigena

Mugabe Aristide yasezeye burundu gukina Umukino wa Basketball nk'uwabigize umwuga

Chadadi Habimana — 2026-02-10T17:02:52Z

Mugabe Aristide, umwe mu bakinnyi b'inararibonye bakiniye Ikipe y'Igihugu ya Basketball y'u Rwanda, yatangaje ko yasezeye burundu gukina uyu mukino ku rwego rw'ababigize umwuga, ashyira akadomo ku rugendo rw'imyaka 18 yari amaze muri Basketball.

Abinyujije ku rukuta rwe rwa instagram, Mugabe Aristide yashyize hanze amwe mu mafoto ye y'urwibutso aho yari kumwe na bagenzi be bakinana Basketball maze ayakurikiza amagambo agira aAti “Uyu munsi, mu byiyumviro bivanze, nyuma y'imyaka 18, ntangaje ko nasezeye gukina Basketball. Ndashimira buri wese wagize uruhare mu rugendo rwanjye. Inshuti n'umuryango wanjye, abatoza bose, abo twakinanye, abafana, ubuyobozi bw'amakipe. Mwarakoze.”

Mugabe Arstide yari amaze iminsi akinira KEPLER BBC

Mugabe yabaye umwe mu bakinnyi ngenderwaho mu Ikipe y'Igihugu, aho yagaragaje ubuhanga, ubuyobozi n'ubunararibonye byatumye agira uruhare rukomeye mu iterambere rya Basketball nyarwanda. yakiniye amakipe atandukanye arimo Patriots BBC, Espoir BBC, CSK, Rusizi BBC ndetse na Kepler BBC ari nayo yarangirijemo umwuga we.

Mu gihe cye cyo gukina, Mugabe Aristide yegukanye Ibikombe bya Shampiyona umunani, ibintu byamushyize mu bakinnyi babaye indashyikirwa mu mateka ya Basketball mu Rwanda. Yanegukanye igihembo cy'Umukinnyi Mwiza wa Shampiyona inshuro ebyiri, mu mwaka wa 2012 n'uwa 2013, bigaragaza urwego rwo hejuru yagize mu mukino.

Mugabo Arstide na Patriots bitabiriye BAL ya mbere banagera 1/2.

Uretse kuba yaritwaye neza mu kibuga, Mugabe yanabaye kapiteni w'Ikipe y'Igihugu, aho yamenyekanye nk'umuyobozi mwiza ushobora guhuza bagenzi be no kubatera imbaraga.
Abakunzi ba Basketball n'abakurikiranira hafi siporo bagaragaje ishimwe ku ruhare rwe, bamwifuriza amahirwe masa mu buzima bushya nyuma yo gusezera, benshi bakifuza ko yakomeza gutanga umusanzu we muri Basketball mu bundi buryo.

Yvette Niyigena