Mama U rwagasabo

Gakenke:Abikorera bafatanyije n'abakozi b'ibitaro bya Nemba bibutse abazize Jenoside yakorewe Abatutsi

2024-06-08T13:28:51Z

Abakozi b'ibitaro bya Nemba n'abikorera bo mu karere ka Gakenke bibutse ku nshuro ya 30 Jenoside yakorewe Abatutsi mu 1994 bahoze ari abakozi b'ibi bitaro ndetse n'abikoreraga muri icyo gihe, bose bishwe bazira uko baremwe.

Ni igikorwa cyabanjirijwe n'urugendo rwo kwibuka, rwatangiriye ku bitaro bya Nemba berekeza ku Rwibutso rw'Akarere ka Gakenke rushyinguwemo imibiri 1889 y'Abatutsi biswhe urw'agashinyaguro bazira uko baremwe.

Mu kiganiro cyatanzwe na Mfitimufasha Eden, umuyobozi w'ishuri ryisumbuye rya Nyarutovu yagarutse ku nzira y'umusaraba Abatutsi banyuzemo ubwo bicwaga urw'agashinyaguro, bameneshwa, batotezwa bitewe na Leta mbi yari iriho, aho bafataga Umututsi nk'umwanzi w'Igihugu arinako bicwaga.

Umwe mu barokokeye, Tuyambaze Beata yagarutse ku rugendo rutoroshye yanyuzemo, ndetse yavuze uburyo umubyeyi we yishwe urw'agashinyaguro n'abantu yari yarahaye akazi akaba aribo bamujyanye kumwica.

Yagize ati: "Twari dufite umuryango mwiza wishoboye, wifite kandi usenga, tukaza gusengera hano ku kiliziya i Nemba twishimye, Papa yari umucuruzi ukomeye hano mu Gakenke, bari babizi; kuva muri 90 ntabwo twigeze tugira amahoro. Jenoside yarateguwe kuko Interahanwe zitwikiraga ijoro bakajya baza gukomanga, bakaza kudusahura, bavuga ko bari gushaka Inkotanyi ngo zihishe iwacu, bakatubuza amahoro. Ubwo Papa akabaha mafaranga bakagenda, ubwo rero mu rugo hahoraga abantu benshi, abaza kuduhingira, mbese Mama yahaga ibyo kurya buri wese."

Tuyambaze Beatha akomeza ubuhamya agira ati: "Urwango rwakomeje kwigishwa mu bato bakajya badutoteza mu ishuri; iyo wabaga uri Umututsi ntabwo wabashaga kunyura kuri Buranga, hari hari Urwibutso kuko bagusabaga kwicururira ukishyingura uri muzima. Ubwo aho twari twihishe Papa baramutwaye abo yakoreshaga, yagaburiraga, yagiriye neza, bajya kumwica barangije bamwambura ibyo yari afite byose, imyenda, inkweto. Ubwo interahamwe zakomeje kudushinyagurira ngo aba bagore beza ntawabica, mu rwego rwo kugira ngo baturundanye batwice, badukoresha urugendo badukubita imipanga, ubuhiri, ba mama babicira aho tureba."

Akomeza ashimira Imana yabarinze ndetse n'Inkotanyi zaje gutabara Abatutsi.

Umuyobozi w'ibitaro bya Nemba Dr Habimana Jean Baptiste yavuze ko ibyabaye ari amahano atarakwiye kubaho.

Yagize ati:"Muri aka gace ka Gakenke habaye amahano, ubumuntu bwari bwatakaye aho umuntu yicaga undi kandi bose bararemwe mu ishusho imwe, turufuza ko Jenoside yakorewe Abatutsi mu 1994 itazongera kubaho ukundi."

Umuyobozi w'Abikorera (PSF) mu karere ka Gakenke Mbaga Daniel yavuze ko nk'abikorera bazakomeza kugira uruhare mu gukomeza kuba hafi abarokotse Jenoside yakorewe Abatutsi mu 1994, bababa hafi mu buryo bwose bushoboka.

Mukanyarwaya Donatha uhagariye abikorera mu ntara y'Amajyaruguru (PSF) yanenze abikorera bijanditse mu marorerwa ya Jenoside mu 1994, ndetse yashimiye Perezida Kagame wahagaritse Jenoside.

Yasabye ababyeyi kujya baganiriza abana ku mateka y'Igihugu atagoretse.

Yagize ati: "Ndanenga cyane abikorera bijanditse muri ayo marorerwa ya Jenoside yakorewe Abatutsi mu 1994, ndasaba ababyeyi kujya muganiriza abana banyu mukajya mubabwira amateka atagoretse, kandi ntitwabura gushimira Perezida wa Repubulika y'u Rwanda Paul Kagame wahagaritse ubwicanyi."

Perezida wa Ibuka mu karere ka Gakenke Bwana Hamdoun Twagirimana yashimiye abikorera ndetse n'ibitaro bya Nemba uruhare rwabo mu kuzirikana abarokotse Jenoside yakorewe Abatutsi mu 1994. Yongeye gusaba kandi buri wese muri aka karere ka Gakenke uzi ahakiri imibiri kuyigaragaza kugira ngo ishyingurwe mu cyubahiro.

Mukandayisenga Vestine, Umuyobozi w'Akarere ka Gakenke yihanganishije imiryango yabuze ababo, yibutsa impumvu abanyarwanda bibuka buri mwaka.

Yagize ati: "Mbere na mbere ndabanza nihanganishe imiryango yabuze ababo muri Jenoside yakorewe Abatutsi mu 1994; turibuka abacu kugira ngo amateka atazazima, twibuka abacu bazize uko baremwe, kwibuka kandi biduha imbaraga zo guhangana n'abahakana ndetse bagapfobya Jenoside, muri aka karere iwacu twabonye umuntu umwe wapfobeje Jenoside mu minsi yashyize, kandi ntituzigera twihanganira uwari we wese ugarura amacakubiri kugira ngo abantu bongere bicane, turi mu gihugu cyiza muhunure ntabwo bibongera."

Yakomeje agira ati: "Biteye isoni n'agahinda, uwo wagaburiraga, wahaga akazi, umuganga wakuvuraga ukamwica; ndashimira abarokotse Jenoside uburyo mwatanze imbabazi n'ubutwari turabibashimiye, ndashimira PSF uruhare mwagize kugira ngo mubashe kuremera iyi miryango mufatanyije nibitaro bya Nemba."

Uyu munsi kandi harakomeza umugoroba wo kwibuka ku Rwibutso rwa rw'Akarere ka Gakenke ruherereye muri Buranga,

Habayeho n'igikorwa cyo kuremera imwe mu miryango yagizweho ingaruka na Jenoside yakorewe Abatutsi mu 1994, harimo n'iyagiye ibura abavandimwe babo bishwe urw'agashinyaguro mu gihe cya Jenoside.

Abanyarwanda bashyiriweho uburyo bwo kugera ku ikoranabuhanga bihendutse

2023-05-16T08:12:57Z

Yanditswe na Ndayambaje Jean Claude

Bamwe mu bikorera bo mu karere ka Musanze, bavuga ko mu gihe nta koranabuhanga kuri buri wese iterambere ritadashobora kugerwaho vuba bityo bagasaba Abanyarwanda kwitabira kubyaza umusaruro amahirwe atandukanye bagiramo uruhare mu kugeza iryo koranabuhanga kuri bose.

Babibwiye itangazamakuru kuri uyu iki cy'umweru tariki ya 14 Gicurasi 2023, ubwo mu karere ka Musanze bari mu gikorwa cyo kwishimira ibyagezweho, mu gikorwa cyari cyahawe intero igira iti "Nanjye Nzaba mpari ".

Ni umuhango wabayemo kwereka abaturage ko byoroshye gutunga telefone zigezweho, zizwi nka "smartphone" zitangwa na "Samsung 250" zishyurwa ibiceri 360 buri munsi.

Umukozi w'ikigo Samsung 250, witwa Hakorimana Emmanuel, yavuze ko bashimira Perezida wa Repubulika y'u Rwanda iterambere akomeje kugeza ku banyarwanda, by'umwihariko mu rwego rwo gukomeza korohereza abaturage gutunga smartphone.

Yagize ati: "Ikoranabuhanga n'iterambere bigomba kugendana, iyi ni gahunda ya leta yashyizweho kugira ngo Abanyarwanda bage bamenya amakuru ku gihe, bishyure imisoro bakoresheje EBM, bakore businesses zitandukanye, bifashishije smartphone."

Hakorimana yakomeje avuga ko baje i Musanze muri iki gikorwa cyo gushima ibyagezweho ndetse ngo bari baje kumurika na gahunda ya 'make make' ariko bagashishikariza abaturage gutunga telefone zigezweho .

Ati: "Ndasaba urubyiruko gukomeza kurinda ibyiza u Rwanda rwagezeho, binyuze mu gukoresha smartphone ku mbuga nkoranyambaga ndetse ufashe telefone mu kigo cya Samsung 250 iyo yibwe tuguha indi ya kabiri."

Perezida w'urugaga rw'abikorera (PSF) mu karere ka Musanze, Habiyambere John ashimangira ko iyo habayeho ikoranabuhanga iterambere naryo ryihuta, igihugu kigatera imbere.

Ati: "Mwabonye amagorofa tumaze kuzamura mu mujyi wacu wa Musanze, imihanda irimo kubakwa, ndetse hari n'ibindi byinshi dukomeje gukora byose tubikesha Nyakubahwa PaulKagame, abaje kumurika ibikorwa byabo hano batandukanye mwabonyemo, n'ikigo cya Samsung250 cyaje, iki kigo nacyo gifite gahunda yo kugeza telefone nziza ku banyarwanda bose, kandi bagenda boroherezwa kwishyura make make."

Guverineri w'Intara y'Amajyaruguru Nyirarugero Dancilla, wari umushyitsi mukuru muri iki gikorwa cyo gushima ibimaze yasabye abikorera bo mu karere ka Musanze gukomeza guhanga udushya, baguka mu bitekerezo byo gukomeza gutekereza ibiteza imbere Igihugu by'umwihariko iyi ntara.

Ikigo Samsung 250 kuri ubu gifite ishami mu mujyi wa Musanze.

Bamwe mu bikorera bo mu karere ka Musanze

Itangazo ryo guhinduza izina

2022-09-04T07:25:57Z

Itangazo Ryo Kurangisha Ibyangombwa

2022-07-31T13:00:11Z