Mama U rwagasabo

U Rwanda rwatangiye kugerageza application ya AI izajya ifasha abaganga gusuzuma no gufata ibyemezo byihuse

Chadadi Habimana — 2026-02-03T09:01:21Z

Mu rwego rwo gukomeza kunoza no kwihutisha serivisi z'ubuvuzi, Guverinoma y'u Rwanda yatangiye kugerageza porogaramu (application) ikoresha Ubwenge Buhangano (Artificial Intelligence – AI) izajya ifasha abaganga n'abaforomo gusuzuma abarwayi no gufata ibyemezo byihuse ku miti igomba gutangwa.

Iryo gerageza riri gukorwa binyuze mu mushinga wiswe Horizon 1000, uhuriyemo Guverinoma y'u Rwanda, Bill & Melinda Gates Foundation ndetse na OpenAI. U Rwanda ni rwo rwatoranyijwe nk'igihugu cyatangirijwemo igerageza ry'uyu mushinga ku rwego rwa Afurika.

Imaze imyaka ibiri igeragerezwa mu mavuriro yo mu Rwanda.

Umuyobozi ushinzwe Ikoranabuhanga muri Minisiteri y'Ubuzima, Muhire Andrew, yatangaje ko Horizon 1000 imaze imyaka igera kuri ibiri igeragerezwa mu mavuriro hafi 50 yo hirya no hino mu Rwanda.
Yasobanuye ko nubwo iri koranabuhanga rigamije kunganira abaganga mu kazi kabo ka buri munsi, ridateganyijwe na gato gusimbura icyemezo cya nyuma gifatwa n'umuganga.
Ati: “Gates Foundation na OpenAI bawushoyemo asaga miliyari 50 z'amadolari ya Amerika. Intego nyamukuru ni ukwihutisha no kunoza serivisi z'ubuvuzi, ariko si ugusimbura abaganga. Icyemezo cya nyuma kizakomeza gufatwa n'umuntu.”

Uko application' izajya ikora

Iyo porogaramu izajya ifasha umuganga cyangwa umuforomo mu gihe ari gusuzuma umurwayi, aho izajya itega amatwi uko umurwayi asobanura ibimenyetso by'uburwayi bwe, ikabyandika mu buryo bwikora.

Nyuma yo kwakira ayo makuru, izajya isesengura ibimenyetso yatanzwe, igafasha umuganga gufata icyemezo cyihuse ku muti ugomba gutangwa, bigabanya igihe cyatakazwaga mu gusesengura amakuru.

Izajya kandi igaragaza niba umurwayi afite ibimenyetso byihutirwa (red flags) bisaba koherezwa mu buvuzi bwisumbuyeho, bityo bigafasha kwirinda gutinda mu gutanga ubuvuzi bukomeye.
Igisubizo ku kibazo cy'ubuke bw'abaganga
Iri koranabuhanga ryitezweho gufasha cyane u Rwanda mu kibazo cy'ubuke bw'abatanga serivisi z'ubuvuzi. Kugeza ubu, umuganga umwe ashobora kwita ku barwayi bagera ku 1,000, mu gihe Ishami ry'Umuryango w'Abibumbye ryita ku Buzima (OMS) rigaragaza ko abaganga bane ari bo bagomba kwita ku barwayi 1,000.

Horizon 1000 izafasha kugabanya umutwaro ku baganga, by'umwihariko mu bigo nderabuzima byo mu cyaro.

Izakora n'aho internet itari ihamye

Ikindi cyiza kuri iyo ‘application' ni uko izashobora gukora idakeneye internet ihoraho, cyane cyane mu mavuriro yo mu byaro aho ikoranabuhanga rishingiye kuri murandasi ritaraba rinoze bihagije.

Gusa haracyari imbogamizi y'ururimi, kuko iyo porogaramu yubatse mu Cyongereza mu gihe abarenga 75% by'Abanyarwanda bavuga Ikinyarwanda. Minisiteri y'Ubuzima ivuga ko iki kibazo kiri mu biri kwitabwaho kugira ngo abarwayi babashe kwisobanura mu rurimi basanzwe bakoresha.

AI mu cyerekezo cy'iterambere ry'igihugu.

Uyu mushinga uje ukurikira iyemezwa rya Politiki y'Igihugu y'imyaka itanu yo kwihutisha ikoranabuhanga rya AI, yemejwe n'Inama y'Abaminisitiri muri Mata 2023. Isesengura ryakozwe ryagaragaje ko hakenewe ishoramari rya miliyoni 76,5 z'amadolari ya Amerika kugira ngo AI yimakazwe mu nzego zitandukanye z'igihugu.

Horizon 1000 iteganyijwe kugera ku mavuriro 1,000 hirya no hino muri Afurika bitarenze umwaka wa 2028, mu gihe igerageza ririmo gukorwa mu Rwanda rizaba rigenze neza.

Rosine Nzahabwanimana

Ihohoterwa rishingiye ku gitsina mu Rwanda ryiyongereyeho abarenga ibihumbi 10 mu myaka itanu: MINISANTE

Chadadi Habimana — 2026-01-28T09:40:00Z

Minisiteri y'Ubuzima (MINISANTE) yatangaje ko imibare y'abagana ibigo by'ubuvuzi bahuye n'ihohoterwa rishingiye ku gitsina mu Rwanda yiyongereye cyane mu myaka itanu ishize, aho hiyongereyeho abarenga ibihumbi 10, ibi bikaba impamvu igaragaza ko iki ari kibazo gihangayikishije igihugu.

Ibi byatangajwe n'Umunyamabanga wa Leta muri Minisiteri y'Ubuzima, Dr. Yvan Butera, ubwo yaganiraga n'Abadepite bagize Komisiyo y'Imiyoborere, Uburinganire n'Ubwuzuzanye bw'Abagabo n'Abagore mu Nteko Ishinga Amategeko.

Umunyamabanga wa Leta muri Minisante aganira n'abadepite.

Dr. Butera yasobanuye ko ihohoterwa rishingiye ku gitsina rigaragara mu byiciro bine birimo: Guhohotera umuntu ku mubiri, Kwangiza amarangamutima n'imitekerereze, Ihohoterwa rishingiye ku gitsina, Kubangamira ubushobozi n'uburenganzira bw'umuntu.

Yongeyeho ko riterwa ahanini n'uko umwe arusha undi imbaraga cyangwa ubushobozi, kudaha agaciro uburenganzira bwa muntu, kutubahiriza uburinganire n'ubwuzuzanye, ndetse n'ibindi bibazo by'imibereho.

MINISANTE igaragaza ko hari n'izindi mpamvu zituma ihohoterwa rikomeza kwiyongera zirimo ubukene, amakimbirane yo mu miryango, ndetse n'ikoreshwa ry'inzoga n'ibiyobyabwenge.
Mu mibare yagaragajwe, mu mwaka wa 2020/2021, abagana ibigo by'ubuvuzi bari 33.800, mu gihe mu mpera z'umwaka ushize bageze kuri 42.000, bivuze ko biyongereyeho hafi ibihumbi 10.

Dr. Butera yavuze ko hacyigwa niba izi mpinduka ziterwa n'uko ihohoterwa ryiyongera koko, cyangwa niba ari ingaruka z'ubukangurambaga butuma abahohotewe bagana inzego zibafasha.

Imibare ya MINISANTE yerekana ko 84% by'abakorewe ihohoterwa ari abagore naho 15% akaba ari abagabo. Mu bwoko bw'ihohoterwa, irishingiye ku gitsina ni ryo ryiganje (47%), rikurikirwa n'iryo gukubita no gukomeretsa (40%).

Minisiteri y'ubuzima yemeza ko ihohotera rishingiye ku gitsina ryiyongereye.

Nubwo hashyizweho Isange One Stop Centers zitanga serivisi z'ubufasha ku bahohotewe, benshi bacyahitamo guceceka.
Dr. Butera yavuze ko atari ibintu byoroshye ku muntu kuza akavuga ihohoterwa yakorewe, agaragaza ko hakiri urugendo mu guhindura imyumvire no gushishikariza abantu gutanga amakuru.

Imibare igaragaza ko Abagore 43% ari bo bavuga bagasaba ubufasha naho Abagabo 40% ni Abatagira uwo babibwira 40% ni abagore, 38% ni abagabo
Mu mwaka w'ubucamanza wa 2024/2025 Dosiye 6.124 ni iz'abasambanyije abana 906 ni izihohoterwa rishingiye ku mibonano mpuzabitsina ku gahato, 2.034 ni izo guhoza ku nkeke uwo bashyingiranywe hakaba n'Amadosiye arenga ibihumbi 10 yo gukubita no gukomeretsa.

Abadepite bagaragaje ko zimwe muri Isange One Stop Centers zihura n'imbogamizi zirimo abakozi bake n'inyubako zishaje. MINISANTE yagaragaje ko abangavu bafite imyaka 15–19 baterwa inda zitateganyijwe biyongereye bava kuri 5% mu 2020 bagera kuri 8%.
Abangavu batize ni bo bafite ibyago byinshi (21%), mu gihe abarangije amashuri yisumbuye ari 4% gusa.

Isange One Stop Center igira uruhare mu gufasha abahohotewe.

Dr. Butera yavuze ko kugumisha umwana w'umukobwa mu ishuri no kumwemerera gukoresha serivisi zo kuboneza urubyaro guhera ku myaka 15 bishobora kugabanya iki kibazo.
Abadepite basabye ko abajyanama b'ubuzima bakifashishwa mu bukangurambaga bwo kurwanya ihohoterwa rishingiye ku gitsina, Minisiteri y'Ubuzima ikaba yatangaje ko iki gitekerezo kiri kwigwaho.

Rosine Nzakizwanayo

GATSIBO: Batawe nabo bashakanye nyuma yo kubyara abana bafite ubumuga

Chadadi Habimana — 2026-01-21T07:44:46Z

Ni bamwe mu baturage barerera mu kigo cyita kubafite ubumuga gikorera mu murenge wa Ngarama akarere ka Gatsibo maze bagaruka kungorane nahuye nazo mu miryango yabo harimo gutabwa nabo bashakanye nabo guhatirwa inshingano ndetse n'ibindi nyuma yo kwibaruka abana bakavukana ubumuga.

Mukashyaka Alphonsina akaba umwe mu barerera aha yagize ati "Muri macye iyo umwana avutse afite ikibazo n'umuryango nawo uhita ugira ikibazo bigatera amakimbirane, mabukwe yagerageje kubimbwira ariko ntabwo umugabo yigeze abimbwira gusa nyine naravugaga nawe siwe icyampa akigishwa."

Mukashyaka Alphonsina yemeza ko iyo umwana avukanye ubumuga ntiyitabweho bigira ingaruka ku muryango

Naho Mukamuganga nawe ati "nange ubwange naramubyaye ariko wasangaga bambwira ngo ase uyu ni umwana uba umuha ibere ry'iki iki ko ari ikizongwe bikambabaza cyane nkumva ndigunze cyane ubu umugabo nawe yaramparitse".

Mukamuganga yemeza ko akato gahabwa abana bavukanye ubumuga bibagiraho ingaruka.

Ababyeyi usibye gutabwa nabo bashakanye usanga ahenshi imiryango bashingiwemo ibashiraho ikosa ko ari karande yiwabo ndetse bigatuma n'uwo mwana Uba yavutse atitabwaho uko bikwiye.

Mu guhabwa ubuvuzi uburezi ndetse n'izi service nkenerwa mu buzima.
Ni ubwo bimeze biryo ariko umwana ufite ubumuga leta yamushiriyeho amahirwe aho nawe ashobora kwiga kandi akaminuza ndetse agahatana ku isoko ry'umurimo ubona ko umuryango mugari hakirimo abatarabyumva neza.

Fiston Hakizimana

Kigali:Barasaba abagira ikibazo cyo kuruka mu modoka kwitwararika

Chadadi Habimana — 2026-01-20T11:59:52Z

Bamwe mu batuye mu mujyi wa Kigali,bavuga ko kwihanganira umuntu ugize ikibazo cyo kuruka mu modoka bikwiye kuba umuco ,ariko nawe agasabwa kwitwararika bigamije kudateza abandi ikibazo.

Hari abavuga ko bitangira ubona Ibiti biba ngo byiruka ,abandi amazu akagenda abakurikiye. Ni bimwe mu bimenyetso abahura n'ikibazo cyo kuruka mu modoka bagaragaza ku ikubitiro. Mu kigo gitegerwamo imodoka cya Nyabugogo ,bamwe mu bagenzi baganiye na Mama Urwagasabo Tv; bavuga ko kuruka mu modoka bikunze kubaho ,icyakora ikibitera n'uburyo bwo guhangana nabyo babifiteho imyumvire itandukanye.

Gare ya Nyabugogo niyo nini mu Rwanda itegerwamo imodoka zijya hirya no hino mu gihugu.

Umwe mubabyeyi bakuze twasanze ateze imodoka yerekeza mu Burasirazuba bw'igihugu yagize ati”Njye nziko iyo ufashe urugendo ukunda kugira ikibazo cyo kuruka mu modoka ,hanyuma ukikora mu kwaha ukinukiriza ,uba ubitsiritse .Urugendo rwose ruba amahire.

Undi nawe amwunganira yahamije ko koko ubu buryo bukora ,cyakora yongeraho ko uhekenya n'ubwoko bw'inturusu bita Mayideni cg se ugafata akanini kagurirwa muri Farumasi karinda kuruka . Aba bose bahuriza kukuba ari ibintu byizana ,cyane cyane kumuntu utaruherutse gukora ingendo ndende.

Hari icyo basaba abakunze guhura n'iki kibazo mu rwego rwo kwirinda kubangamira abandi. Aha bavuga ko usanzwe yiyiziho kugira iki kibazo yajya yitwaza agatambaro ko kurukamo ,kugirango atabangamira abandi ,nubwo abantu bose Atari kimwe ngo hari abinuba abahura n'iki kibazo ,nubwo bidakwiye .

Umwe mubatwara abagenzi mucyerekezo cya Kigali-Karongi ,avuga ko nabo nk'abashoferi babangamirwa ,gusa bagerageza gufasha abahuye n'iki kibazo,birimo kubasaba kubanza gushaka akanini mbere y'urugendo kubahura n'iki kibazo ,guhagarara mugihe bibaye ngombwa n'ibindi.

Abaturage basanga abafite icyo kibazo bajya bagana kwa muganga.

Kubaganga bavuga ko hari inama zagufasha nubwo zitandukana muburyo zitanga umusaruro bitewe n'imiterere y'umubiri w'umuntu.

Izi zikubiyemo kwirinda kurya ifunguro rikomeye ,kuko ngo riremerera igifu ndetse n'ibiryo birimo amavuta si byiza .Kwirinda kurangarira kuri telefoni ngendanwa nabyo birafasha ,ndetse no kunywa amazi menshi mbere y'urugendo .Kubo bishobokeye bakwiye gufata akanini cg se bakanywa icyayi kirimo yangawizi. Ikindi ni uguhitamo kwicara ku mwanya w'imbere ,kuko bikurinda kurangara cyane.

Abashakashatsi bemeza ko byibura 1/3 cy'abantu bagiye bahura n'ikibazo cy'urugendo muri aba hakaba n'ababirwara burundu, usanga batangira bayura,bagatangira kugira icyuya niyo haba hakonje,bakagira isesemi rimwe narimwe bikabaviramo kuruka,kuribwa umutwe cyangwa kutabona neza.

ibi bibazo byibasira abari mu rugendo, baba bakoresha: imodoka, gariyamoshi, amazi (icyo bita mal de mer mu gifaransa), indege (mal de l'air) ngo byaba biterwa nikusanyamakuru ry'umubiri riba ritagenze neza biturutse ku bice bimwe na bimwe by'umubiri nk'amaso n'amatwi.

Iri kusanywa rizamo amakosa iyo amaso afite ibindi bintu arangariyeho, nibwo agace k'umubiri kitwa Vestibule kaba mu gutwi, gasanzwe kagira uruhare mu kurinda ihungabana ry'umubiri gatanga amakuru anyuranye n'ayo amaso ari gutanga, kuko umubiri wose uba uri mu muvuduko. Iki kibazo kigaragara cyane kubagenzi,abatwara ibinyabiziga bo ngo ntibahura nacyo impamvu
nta yindi ni uko ari ikizira kuba utwara yarangarira ahandi hatari aho ari kwerekeza.

Ishimwe Honore

IGIPIMO CY'IGWINGIRA MU RWANDA KIGEZE KURI 27%: ICYO IMIBARE IGARARAGAZA

Chadadi Habimana — 2026-01-16T08:43:55Z

Ubushakashatsi bwa karindwi ku mibereho n'ubuzima bw'abaturage (RDHS7) bwakozwe n'Ikigo cy'Igihugu Gishinzwe Ibarurishamibare (NISR) bugaragaza ko igwingira ry'abana mu Rwanda rikomeje kugabanuka, nubwo rikiri ikibazo gikomeye ku iterambere ry'igihugu.

Raporo ya RDHS7 igaragaza ko 27% by'abana bari munsi y'imyaka itanu bagwingira, ugereranyije na 33% byagaragaye mu bushakashatsi bwa DHS 2019/2020. Iri gabanuka rifatwa nk'intambwe ishimishije, rigaragaza ko politiki n'ingamba Leta yashyizeho mu rwego rw'imirire n'ubuzima byatangiye gutanga umusaruro.

Muri rusange imibare y'igwingira mu Rwanda yaragabanutse.

Igwingira ni ikibazo cy'imirire mibi ihoraho ituma umwana adakura uko bikwiye mu gihagararo, bikagira ingaruka ku buzima bwe bw'igihe kirekire no ku bushobozi bwe bwo kwiga no gutanga umusaruro mu buzima bwe bw'akazi. Ubushakashatsi bwerekana ko igwingira rigaragara cyane mu bana bafite hagati y'amezi 18 na 35, igihe baba batangiye kurya ibiribwa bisanzwe ariko bitarimo intungamubiri zihagije.

Kutamenya gutegura indyo yuzuye ni imwe mu mbogamizi zigaragara mw'igwingira ry'abana.

Raporo igaragaza kandi ko abana bo mu byaro bagwingira kurusha abo mu mijyi, ndetse ko abahungu bagira igipimo cy'igwingira kiri hejuru ugereranyije n'abakobwa. Ibi bifitanye isano n'imibereho y'imiryango, ubukene, imirire idahagije, isuku nke n'indwara ziterwa n'amazi mabi.

Mu turere tumwe na tumwe, ikibazo cy'igwingira gikomeje kugaragara ku gipimo cyo hejuru; Gicumbi (38.8 %), Burera (37.6 %) na Ngororero (35.8 %) biri mu byerekanaga ibipimo biri hejuru ya 35 %, naho Rutsiro, Karongi, Rubavu, Gisagara, Nyabihu, Musanze, Kirehe na Rusizi zose zari hejuru ya 30 %. Ibi bipimo bigaragaza ko hari ingamba zikomeye zikenewe kugira ngo abana bo muri ibyo bice babeho neza kandi bakure neza mu buryo bw'umubiri n'ubwonko.

Akarere ka Gicumbi niko kaza imbere mu kugira imibare iri hejuru y'abana bagwingira.

Nubwo hari intambwe imaze guterwa, inzobere zigaragaza ko hakenewe kongera imbaraga mu guteza imbere imirire myiza y'abana n'ababyeyi batwite, guteza imbere isuku n'isukura, no kongera ubukangurambaga ku kamaro ko konsa neza no gutegura indyo yuzuye.

Chadadi Habimana

Rwamagana: Barasaba kwimurwa kubera inganda zibateza umunuko

Valens Nzabonimana — 2026-01-16T03:07:54Z

Ni abatuye ahari ahahariwe icyanya cy'inganda bavuga ko babangamiwe n'uruganda rutunganya ibirimbwa by'amatungo kubera umunuko utekurwa n'uru ruganda.

Emmanuel Nayituriki ni umugabo usanzwe atuye aha mu magambo ye yagize ati"izi nganda usanga harimo izirekura imyuka mibi cyane, urugero nka ruriya rutunganya ibiryo by'amatungo hamye n'urutunganya ibyuma usanga iyo imvura iguye amazi ahindura ibara kubera ibyuka birekurwa n'izo nganda kandi nanone ugasanga ziduteza umunuko aho dutuye''.

Aba baturage bifuza ko bakimurwa aha hantu kuko bishira ubuzima bwabo mu kaga.

Emmanuel Nayituriki yongeyeho ati"nkatwe dutuye hano ubona ko tuzituriye cyane rwose batwimura kuko turabangamiwe''.

Naho Mukeshimana Christine we yagize ati"usanga dupfuka amazuru iyo tuhageze rwose bibaye byiza batwimura aha hantu''.

Umuyobozi w'akarere ka Rwamagana Mbonyumuvunyi Radjab avuga ko hakorwa ubugenzuzi bityo hazarebwa inganda zitujuje ibisabwa.

Yagize ati"mu busanzwe tugenzura imikorere y'inganda tukareba ko ziri kubahiriza ibisabwa ubwo turaza kongera turebe tubasabe kubahiriza ibisabwa''.

Uruganda rushirwa mu majwi n'abaturage n'uruganda rutunganya ibirimbwa by'amatungo dore ko natwe ubwo twahegeraga twasanze Koko abaturage batabeshya kubera impumuro mbi twahasanze wumva ko iteje inkeke.

HAKIZIMANA Fisto

Minisitiri Uwimana Consolée asanga isuku ikwiye gutangirira mu bakiri bato

Valens Nzabonimana — 2026-01-13T13:50:54Z

Minisitiri w'Uburinganire n'Iterambere ry'Umuryango Uwimana Consolée, asanga isuku ikwiye gutangirira mu bakiri bato ikaba umuco. Ibi yabigarutse ubwo hatangizwaga ubukangurambaga bwiswe FresheriKuIshuri aho yasabye abanyeshuri n'abarezi kwita ku isuku yo ku mubiri mu ngo n'aho banyura mu rwego rwo kurushaho kwimakaza isuku.

Minisitiri w'Uburinganire n'Iterambere ry'Umuryango Uwimana Consolée.

Minisitiri Uwimana ubwo yifatanyaga nabo kuri Centre Scolaire Notre Dame de Fatima ku rwego rw'Intara y'Amajyaruguru, kuri uyu wa 12 Mutarama 2026.

Ati”Turifuza ko isuku itangirira mu bakırı bato bakayigira umuco niyo mpamvu ubu bukangurambaga bwakorewe mu mashuri.

Guverineri w'Intara y'Amajyaruguru Mugabowagahunde Mourice nawe yongeye gushimangira ko isuku ari isoko y'ubuzima aho yasabye buri wese kugira isuku ndetse ikagaragara ahantu hose.

Ku ruhande rw'abarezi n'abanyeshuri bahamya ko nta suku nta buzima bwiza. Dusengimana Marie Claire n'umurezi kuri Fatima yagize ati”Ubu tugiye kurushaho kunoza isuku nk'uko abayobozi babidusabye natwe tugomba kongeramo imbaraga.”

Umuhoza Dina yagize ati”tugomba guhorana Fresheri ku ishuri dusa neza ndetse tugasukura naho dutuye, tugasokoza imisatsi, tukoza amenyo tugasukura ibyo turiraho mbese tugakaraba n'intoki kenshi.”

Minisitiri Uwimana Consolee nanone yavuze ko isuku itaranozwa neza nkuko byifuzwa akaba yasabye abanyarwanda kwimakaza isuku bakanga umwanda.

Ati”Ubu bukangurambaga bugiye gukorwa mu Gihugu hose, mu gihugu cyacu turacyafite ibibazo bibangamiye imibereho myiza mu muryango harimo n'ikibazo cyo kuba tudafite isuku ku buryo buhagije haba aho dutuye aho tugenda n'aho dukorera murabizi hashyize igihe kinini bivugwa, ddasaba buri wese kugira isuku nyambere.”

Ni ubukangurambaga bwa Minisiteri y'Uburezi ifatanyije na Minisiteri y'Uburinganire n'Iterambere ry'Umuryango (MIGEPROF), bugamije kwimakaza isuku mu bigo by'amashuri n'ahandi hose muri rusange.

Jean Claude Ndayambaje

Huye: Abanyeshuri bagiriwe inama yo kugira umuco w'isuku

Valens Nzabonimana — 2026-01-13T09:33:54Z

Umunyamabanga uhoraho muri Ministeri y'Ubuzima Mr. Jean Marie Vianney Ndayizigiye yagaragaje ko intego ya Leta y'u Rwanda yo kwimakaza umuco w'isuku ku baturage izagerwaho bihereye mu bakiri bato.

Mu bigo byo hirya no hino batangijwe gahunda y'isuku, mu rwego rwo kwimakaza umuco w'isuku.

Muri gahunda ya Guverinoma yo kwihutisha iterambere icyiciro cya kabiri NST2 u Rwanda ruteganya ko izarangira rugeze ku nteko 100% mu bikorwa byo kwimakaza isuku n'isukura ariko ngo ntibyagerwaho bidahereye mu bakiri bato nkuko Umunyamabanga uhoraho muri Ministeri y'ubuzima Jean Marie Vianney Ndayizigiye yagaragaje mu karere ka Huye mu bikorwa by'ubukangurambaga bw'isuku mu mashuri bwiswe Fresheri ku ishuri.

Yagize ati“Imwe mu ngamba twafashe ni uguhera ku rubyiruko rero iyo wigishije umwana biba byoroshye no kugera ku bandi bose ndetse no ku babyeyi”.

Yongeyeho ko bifuza ko isuku iba umuco kuri bose atari ku banyeshuri gusa ahubwo n'abaturage muri rusange.

Umuyobozi w'ikigo cya GS Cyarwa Akayezu Donatha ari naho habereye ibi bikorwa mu Ntara y'Amajyepfo mu karere ka Huye yavuze ko iki gikorwa gisigiye ubutumwa abarezi, abana ndetse n'ababyeyi babo yo gukomeza gushyira imbaraga mu kwimakaza isuku n'isukura.

Yagize ati“abana bacu babonye ubutumwa buzabafasha kugira isuku ndetse mwabonye ko hari n'ababyeyi babo nonoho ubwo ababyeyi babyumvise bazadufasha abana kubishyira mu bikorwa.

Niyonkuru Jean Moise ni Umunyeshuri wa GS Cyarwa hamwe na bagenzi be bavuze ko gahunda ya fresheri ku ishuri igiye gutuma bakomeza kongera umuco w'isuku ku ishuri no murugo.

Yagize ati"gahunda ya fresheri ku Ishuri hari akamaro izatugirira haba mu buzima bwa hano ku ishuri ndetse no mu rugo bityo nkatwe nk'abanyeshuri twiyigiyemo byinshi bizadufasha gukomeza kuyinoza ndetse no gushishikariza bagenzi bacu ku gira umuco w'isuku.

Intego nyamukuru z'isuku n'isukura mu Rwanda ni uguteza imbere ubuzima bwiza, kugabanya indwara ziterwa n'umwanda no kuzamura kuzamura imibereho myiza y'abaturage.

Moise Munyaneza.

Nyagatare: Isoko rikora nta bwiherero rigira

Valens Nzabonimana — 2026-01-12T18:02:21Z

Isoko rya Gihengeri riherereye mu murenge wa Mukama mu karere ka Nyagatare aho abacururiza muri iri soko bavuga ko kuba ntabwiherero iri soko rigira ari ikibazo kibakomereye.

Abarema n'abakorera mu isoko rya Gihengeri muri Karere ka Nyagatare barasaba guhabwa ubwiherero.

Mukandayisenga Amina avuga ko bagorwa no kubona aho biherera yagize ati"Usanga nyine abantu bari kujya hirya mu bisambu kubera ko hano nta bwiherero dufite nyine urumva ko ari ikibazo''.

Naho Mukamana Aline nawe usanzwe akorera muri iri soko yagize ati‘'Hano rwose ntabwiherero tugira pe mbese twiyambaza ubwiherero bw'abatuye hano hafi cyangwa tukihangana nyine''.

Umuyobozi w'umurenge wa Mukama Longin Habineza avuga ko ubwiherero buhari ko ahubwo batari bazi ko bwafunzwe bityo ko bagiye gukurikirana icyo kibazo kigakemurwa.

Yagize ati"ntabwo twari tuzi ko ubwiherero bufunze kubera koperative ishinzwe kubucunga yarabwubatse tubona ntampamvu yo kuhafunga gusa ubwo tubimenye reka tubikurikirane''.

Ubwiherero bwakabaye bukoreshwa burafunze nk'uko abaturage babihamya ibituma biyambaza ibisambu.

Isoko rya Gihengeri rihuriweho n'uturere dutatu ari two Nyagatare Gicumbi ndetse na Gatsibo.

Hakizimana Fisto

Musanze: Ba Dasso baremeye umuryango wa Ntibatsekeye wa mugariye ku ruganda

Valens Nzabonimana — 2025-11-25T06:19:55Z

Musanze: Ba Dasso baremeye umuryango wa Ntibatsekeye wa mugariye ku ruganda

Abagize Urwego rwunganira mu gucunga umutekano, DASSO bo mu karere ka Musanze, baremeye Umuryango wa Ntibansekeye Félicien ugizwe n'abantu bamugariye ku rugamba wabaga mu kimeze nk'ikibuti.

Umuturage yubakiwe inzu ifite n'ibikoresho.

Ni umuryango utuye mu Mudugudu wa Mubuga mu Kagari ka Cyanya mu umurenge wa Cyuve w'AKarere ka Musanze.

Mu butumwa yatanze Umuhuzabikorwa wa DASSO wungirije mu Karere ka Musanze, Nshimiyimana Sosthene, yavuze ko ibikorwa byo gufasha abatishoboye babikora bagamije kunganira akarere mu bikorwa byo gufasha abaturage kugira ubuzima bwiza.

Umuryango wa Ntibatsekeye Felecien, wubakiwe inzu n'Abadaso.

Yagize ati “Twamusanze mu nzu imeze nabi cyane bitaga kiramujyanye tubona ko tugomba kuyimukuramo, ubu DASSO si ugucunga umutekano byonyine, harimo no guteza imbere imibereho myiza y'abaturage kuko mu kunganira Akarere harimo no gushyira umuturage ku isonga tukamukorera.”

Nshimiyimana akomeza agira ati”Natwe tuzakomeza kubasura kugira ngo dufatanye mu rugendo bagiyemo rw'iterambere kandi n'inshingano zacu kwita ku baturage bacu.”

Ntibansekeye Félicien n'umuryango we bashimye byimazeyo urwego rwa Dasso ry'unganira akarere mu gucunga umutekano babafashije mu rugendo rwo gutangira ubuzima bushya.

Umufasha wa Ntibansekeye witwa Mukarwego yagize ati “Ndishimye cyane kuko mbere twabaga ahantu habi cyane kuko najyaga guca inshuro nabisigamo nkasanga babyibye nataka bati uriya se agira iki bamwiba? Ubuyobozi buradukodeshereza aho kuba. Ubu ndishimye cyane kuko mbonye inzu y'icyerekezo.”

Ntibansekeye mu marangamutima menshi yagize ati“Ndishimye cyane birenze kandi nshimiye urwego rwa DASSO kuba rwaratuzirikanye. Inzu twabagamo nayitaga kiramujyanye kuko igikoko cyashoboraga kuza kikakujyana, iyi banyubakiye ni igisubizo nzayifata neza Imana ikomeze ibahereze umugisha.”

Visi Meya wa Musanze ushinzwe imibereho myiza y'abaturage, Kayiranga Thèobald, yasabye abafashijwe gufata neza iyi nzu bahawe ndetse bagaharanira kwiteza imbere.

Ubuyobozi bwa DASSO bwubakiye umuturage inzu yo guturamo.

Yagize ati “Aba babafashije barigomwe cyane, ibyo babahaye byakwiye kuba bikora ibindi, bubaka ECD n'ibindi. Icyo tubasaba ni uguharanira kwigira inzu yaba hari aho yahomotse mukayisana ndetse mugakora cyane kuko bano ntabwo bazahora aribo babakemurira ibyo mwaba mushoboye kwikorera.”

Iyi nzu n'ibikoresho byose biyirimo byatwaye amafaranga y'u Rwanda agera kuri 6,750,000Frw.

Jean Claude Ndayambaje