Mama U rwagasabo

Musanze: Abakorera mu isoko rya Gacaca barasaba kubakirwa

Valens Nzabonimana — 2026-01-16T02:31:45Z

Abacururiza mu isoko rihereye mu murenge wa Gacaca w'akarere ka Musanze baravuga ko babangamiwe no kunyagirwa ndetse n'izuba bitewe nuko ritubakiwe.

Aba bacuruzi bavuga ko babangamirwa iyo imvura iguye cyangwa izuba rivuye.

Abaganiye na Mamaurwagasabo.rw bavuze ko kuba iri soko ritubakiwe bibateza igihombo gikomeye.

Umwe muri aba bacuruzi witwa Munyengabe Jean D'amour yagize ati”tubagamiwe no kunyagirwa n'izuba bitewe nuko aha dukorera hatubakiye, utundi dusantere baratwubaka ariko hano turi mu bwigunge dukeneye ko mudukorera ubuvugizi tugakorera ahantu heza.”

Undi mucuruzi witwa Uwineza Divine yagize ati”Iyo imvura iguye inyagira ibicuruzwa byacu, abafite imitaka baratwikira mubyukuri dukwiye gutabarwa muri iri soko rya Gacaca.”

Umuyobozi w'akarere ka Musanze wungirije ushinzwe imibereho myiza y'abaturage Kayiranga Theobald yavuze ko iki kibazo barimo kugitekerezaho.

Ati”nibyo koko ririya soko rya Gacaca rikenewe kubakirwa Kandi mwabonye ko rikikijwe n'amaduka, rizubakwa cyane twatangiye kubona abafatanyabikorwa badufashije kubaka agasoko ko mugataraga bogerezamo karoti, turita kuri iki kibazo nk'akarere turashaka n'abafatanyabikorwa rizubakwe.”

Iri soko rya Gacaca ricururizwamo ibicuruzwa bitandukanye birimo; ibiribwa, imyenda n'ibindi.

Jean Claude Ndayambaje

NYAGATARE: Bimwe ingurane y'ubutaka bwabo ubwo bimurwaga ahari umushinga wa GABIRO Agro- Business Hub

Valens Nzabonimana — 2025-12-03T08:24:53Z

Abaturage batuye mu murenge wa Rwempasha akarere ka Nyagatare barasaba kurenganurwa nyuma y'uko abaturage bimuwe ahakorera umushinga wa Gabiro Agro- business Hub batagaturujwe ndetse n'umwavoka baregeye akabarira amafaranga.

UKWIZAGIRA Cpyrien umwe mu baturage bimwe ingurane

Ni abaturage batujwe mu murenge wa Rwempasha ubwo ubutaka bwabo bwakoreshwaga n'umushinga wa Gabiro Agro- business Hub babizeza ko bazabaha ingurane baranayibereka ariko batungurwa nuko bimuriwe ahandi Kandi nabwo bahabwa amazu gusa amasambu ntibayahererwa ingurane.

Priscilla NIYISHOBORABYOSE yagize ati''Umusinga witwa Gabiro Agro- Business Hub yaraje idutwarira amasambu batwizeza ko tuzahabwa ingurane kandi tukayihabwa hafi aho ubwo baduhitishijemo dusinyira ko tuzatuzwa hafi aho, ariko twatunguwe no gusanga batuzanye hano baduha aya mazu mureba kandi nabwo dusinya ko aya mazu afite agaciro ka million cumi na zirindwi kandi namwe murazibona, ikibazo rero nuko baduhaye aya mazu ntibaduha ingurane ku masambu yacu kandi bari barabitwemereye''.

Aba baturage bavuga ko bahatirijwe gusinya ko bubakiwe nk'abatishoboye barabyanga ahubwo bahitamo gushaka umwavoka witwa Buhigiro Jean Nepo nawe ngo ntiyabashubije Kandi bari baramwishyuye.

UKWIZAGIRA Cyprien yagize ati''Ubushije habanje kuza umuyobozi w'akarere ngo ushinzwe imibereho mwiza atubwira ko dusinyira ko twatujwe nk'abatishoboye nge ubwange ndahaguruka ndamubaza nti se gute twe twasinyira ko twubakiwe kandi twari dufite amasambu yacu mukayatwara arambwira ngo ndi indispline ngo nsabe imbabazi, nyuma twaje gutanga ikirengo dushaka umwunganizi muby'amategeko gusa nawe asa nuwaturiye kuko ntiyigeze adufasha''.

Uyu mwunganizi avuga ko iki kibazo yasanze agomba kubanza kucyitondera akaba akiri gukusanya ibimenyetso ngo atange ikirego. Yagize ati''nasanze ikirego kitoroshye kubera abaturage barimo kurega akarere bityo nahisemo kubanza kwitegura neza kandi namaze gusa imyanzuro yo narayibashikirije''.

Twagerageje kuvugisha ubuyobozi bw'akarere ndetse na Gabiro Agro- business Hub gusa ntibyadushobokeye nihagira igitangazwa tuzabibagezaho ubutaha.

Aba baturage bimuwe mu murenge wa Karangazi bakaba bavuga ko Kandi batunguwe no gusinya ko inzu bahawe zari zigite agaciro ka muriyoni 17 kuri buri nzu imwe gusa.
Abenshi muri aba baturage bakaba bari batunzwe no gukora ubuhinzi gusa, uyu munsi imwe mu miryango yatujwe aha yatangiye gusuhuka kubera ko ntamibereho bari kubona.

Fisto HAKIZIMANA

Gakenke:Abakora isuku bamaze amezi arenga 3 badahembwa

Valens Nzabonimana — 2025-10-10T11:38:12Z

Hari abaturage bakora amasukura mu mujyi wa Gakenke bavuga ko bagiye kumara amezi asaga ane badahembwa, kuri ubu barasaba gutabarwa.

Kuva mu kwezi kwa Gatandatu ntibarahembwa amafaranga bakoreye.

Aba baturage babitangarije umunyamakuru wa Mamaurwagasabo TV ubwo yarageze muri aka karere ka Gakenke aho basaba ko bakwishyurwa amafaranga bakoreye.

Umwe muri aba baturage Yagize ati”Tumaze amezi ane tudahembwa twarumiwe mudukorere ubuvugizi tubaza abadukuriye bakatubwira ngo bizakorwa ariko twarategereje amaso ahera mu kirere tumerewe nabi.”

Undi yagize ati”Duheruka guhembwa mu kwezi kwa Gatandatu none tugeze mu kwezi kwa Cumi Ubu se muduha agaciro koko, murabizi imibereho yo muri iki gihe ntabwo yoroshye twakabaye turi kugura agafumbire nk'abandi, ariko turashonje nawe urabibona.”

Umuyobozi w'Akarere ka Gakenke Mukandayisenga Vestine yavuze ko bitarenga tariki ya 9/10/2025 batishyuwe.
Ati”Ntabwo bizarenga ejo batishyuwe.”

Nanone kandi aba baturage barasaba ko bakongezwa umushahara ngo kuko bahembwa amafaranga y'intica nikize , uyu bahembwa ibihumbi 10000rwf ku kwezi byibuze arifuza ko bajya bahembwa ibihumbi 15000rwf.

Jean Claude Ndayambaje

Rubavu: Babwiwe ko nta n'iripfumuye bazahabwa ku myaka yabo ikomeje kwangizwa mu gukora imihanda

Valens Nzabonimana — 2025-10-08T17:24:01Z

Nubwo bafite imyaka yabo myinshi yangijwe mu bikorwa bikomeje byo gukora imihanda itandukanye mu Kagari ka Rubona, mu murenge wa Nyamyumba, mu Karere ka Rubavu, aba baturage bavuga ko babwiwe ko nta n'iripfumuye ry'ingurane bazahabwa kuri iyi mitungo yabo.

Abaturage bangirijwe imyaka ariko ntamafaranga bahawe.

Aba baturage basa nkababuze ayo bacira nayo bamira, nyuma yaho imirima yabo itangiye gutegangurwa n'imishani mu gukora imihandi itandukanye iri kunyuzwa muri kano gace, mu Kagari ka Rubona mu Murenge wa Nyamyumba, mu Karere ka Rubavu.

Nyirahavugima Suzana, agaragaza ko yangirijwe imyaka mu buryo bukomeye

Umwe yagize ati" Ko baje bakangiza imyaka, kandi n'insina bagatemagura n'amavoka ntibagira ikintu baduhereza, ahandi muri Kiyaga barabahaye amafaranga, none twebwe baze bahingagure gusa nta
n'ikintu baduhaye?"

Nikobahoze Violette, nawe n'undi muturage ugaragaza igihombo yatewe no kwagirizwa imyaka biturutse mu ikorwa ryiyi mihanda.

Yagize ati"mu mbuto njyewe zanjye, simbizi, batubwiye yuko ntacyo bazatumarira, batazaduha ikintu ku mbuto zacu, ariko njyewe ni ibiti 27 by'amavoka, guturuka iriya hirya (yereka umunyamakuru), noneho reba, umurima wibisheke wose kandi umurima mu mezi ane, nkuranguza ibihumbi 670,000".

Bagaragaza ko batanze amajyambere ko rwose n'iyi mihanda bari bayikeneye, ariko nanone kubakorera imihanda bakabasiga mu bukene, bagaragaza ko hatarimo gushyira mu gaciro, niba badashobora gusaba ingurane ngo bazihabwe kuri iyi mitungo yabo. Bityo iki gikorwa ubwacyo bagaragaza ko bagishyigikiye, ariko bakanenga uburyo kiri gukorwamo.

Nkuko bigarukwaho kandi na Nyirahavugimana Suzana, akaba nawe ari umwe muri bano baturage.

Ati" Natwe ntabwo tumenya impamvu bataduhaye ingurane, banyangirije ikawa, insina, naho nahingaga imyumbati n'ibishyimbo".

Aba baturage biganjemo abakora ubuhinzi, bavuga ko iyi myaka yabo yangijwe muri buno buryo byabateje ubukene.

Ibi bigarukwaho kandi na Nsabimana Jean Claude, nawe akaba agaragaza ko yangirijwe.

Ati" Harimo ibisheke, harimo amavoka, n'abandi bagenzi bange benshi twadikanyije, batubwira ko ntangurane bazaduha, bakatubwira ko ari imihanda y'amajyambere y'u Rwanda ariko nta ngurane ngo bazaduha. Bari kudusigira ubukene buhambaye".

Mu gihe hirya ni hino hatandukanye, hanyuzwa ibikorwaremezo imihanda nk'iyi, hanyuma ibyangijjwe kubera iyi mirimo bigahabwa ingurane, aba baturage nabo babona badakwiye kwirengagizwa bityo bagahabwa ingurane kuri iyi mitungo yabo.

Nyirahavugimana yakomeje agira ati"Ubwo rero ntabwo twanga ibikorwaremezo bya Leta, ko bigombo kuza kuko ari iterambere batuzanira, ahubwo dushaka byibuze kugira ngo imyaka yacu bangije, bagire icyo batugenera".

Déogratias Nzabonimpa, Umuyobozi w'Akarere ka Rubavu w'Ungirije Ushinzwe Iterambere ry'Ubukungu.

Umuyobozi w'Akarere ka Rubavu wungirije Ushinzwe Iterambere ry'Ubukungu, Déogratias Nzabonimpa, agaragaza ko kino kibazo akizi, icyakora akemera ko uburyo bwo gukora iyi mihanda bukwiye gukorwa neza abaturage badahutajwe, ndetse abakwiye guhabwa ingurane ku mitungo yabo yangijwe bakazihabwa".

Yagize ati" Ntabwo haba harateganyijwe ingurane ikwiye, kuko ni abaturage baba bishyize hamwe bakagaragaza ko bakeneye ko aho hantu haturwa, hatera imbere, hagezwa ibikorwaremezo, nyuma yaho leta ikora igenamigambi ririmo kuhageza amazi meza n'amashanyarazi, ndetse n'ibikorwaremezo biteza imbere itumanaho aho ngaho.

Uyu muyobozi yakomeje agira ati" Ikijyanye rero n'imyaka hari igihe bahasanga imyaka iyo ngiyo gicyemurwa na komite ifatanyije na rwiyemezamirimo, twarabimenye, twarabegereye turi kubafasha".

Iyi mihanda ikaba iri gucibwa mu mimpa y'imisozi yitegeye ikiyaga cya Kivu, yitezweho kandi kongera ibikorwaremezo muri bino bice, ndetse no kuhongera agaciro k'ubutaka buzaba buri ku nkekero
y'iyi mihanda.

Eulade Mahirwe

Rusizi: Bagiye kumara imyaka ibiri bategereje amafaranga y'ibyangijwe ubwo hubakagwa umuyoboro w'amashanyarazi

Valens Nzabonimana — 2025-10-02T07:39:38Z

Bamwe mu baturage bo mu kagari ka Kigenge mumurenge wa Giheke mu karere ka Rusizi bavuga ko imyaka igiye kuba ibiri bategereje amafaranga y'ibyangijwe ubwo hubakagwa umuyoboro w'amashanyarazi,ariko na nubu barahebye.

Aba bashimangira ko ubwo babwirwaga ko iki gikorwa cyo kugeza umuriro w'amashanyarazi mu bice bitandukanye by'umurenge wabo babyakiriye neza kuko bakunda ibikorwa by'iterambere. Bemeza ko babariwe neza ariko imyaka ikaba igiye kuba ibiri batarahabwa ingurane y'ibyabo byangijwe.

Umwe muri bo yagize ati"Twabyakiriye neza kuko iki gikorwa ni iterambere kuri twe, urumva rero byari ibyishimo kuri twe. Baratubariye ndetse twemeranywa nabo gusa umwaka urarenze tutarabona ibyo bangije."

Aba baturage bemeza ko kuba batarishyurwa byabashyize mu gihombo gikomeye kuko ibyangijwe hari icyo byabafashaga mu mibereho yabo ya buri munsi.

Nzeyimana Neston ati"Urubingo, kawa ndetse n'ibiti bya voka barabyangije ubwo bashingaga amapoto, ibyo bikorwa byamfashaga kubona amafaranga nkaguramo mituelle de sante, urabona ndetse tugeze mu gihe cy'ihinga nabwo byagombaga kumfasha kwishyura abahinzi."

Ikibabaza cyane nuko hari bamwe muri bagenzi babo bishyuwe kandi bahuje ikibazo, bagasaba ko bakwishyurwa nkuko nabo bishyuwe.

Jacque Nzayinambaho Tuyizere uhagarariye ikigo cya REG Ishami rya Rusizi ubwo twamubazaga kuri iki kibazo yadusabye ibyangomwa by'aba baturage maze ngo aze kudusubiza nyuma gusa siyongeye kwitaba.

Aba baturage bavuga ko basaga 25 kuko abandi bagiye bishyurwa mbere, akaba ari nayo mpamvu bafite impungenge ko batazishyurwa kuko abishyuwe bari bahuje ikibazo.

Sitio Ndoli

Rusizi: Bamaze imyaka ine batarahabwa ibyangombwa by'ubutaka baguraniwe ngo hubakwe ishuri

Valens Nzabonimana — 2025-10-01T08:07:23Z

Abaturage baguraniwe ubutaka bukubakwaho ishuri rya G.S Pera mu murenge wa Bugarama mu karere ka Rusizi, bavuga ko hashize imyaka ine batarahabwa ibyangombwa by'ubutaka bwaho baguraniwe, bagasaba ubuyobozi ko bwacyemura iki kibazo.

Umwe muri bo yagize ati"Baratubwira ngo uko bazahereza abandi basigaranye imirima hafi y'amashuri nibyo natwe bazaduha. Abasigaranye imirima baza kubahereza ibyangombwa by'ubutaka, kuva bamara kubibona twatangiye twirukanka imyaka igiye kuba hafi ine ibyo byangombwa tutarabibona twagiye kubaza ku murenge baratubwira ngo ni mutegereze kugeza na n'ubu".

Mugenzi we yunzemo ati"ntabwo duhinga ngo tweze kuri ubu butaka batuguraniye ariko baduhaye ibyangombwa by'ubutaka umuntu byamufasha kubona uko yagera ku mafaranga".

Aba baturage ubwo bavaga mu masambu yabo hari hagiye kubakwa iri shuri babyakiriye neza ndetse bemera gutanga ubwo butaka ndetse barabaguranira babaha ubutaka ahazwi nko ku musozi wa kibangira gusa ngo hashize imyaka ine batarahabwa ibyangombwa by'ubutaka.

Umuyobozi w'akarere wungirije ushinzwe iterambere ry'ubukungu, Habimana Alfred, avuga ko ikibazo cyabo kiri hafi yo gucyemuka.

Ati "Abaturage batanze ubutakaLeta irabaguranira ahubatswe G.S Pera ikibazo kiri hafi yo gucyemuka, ikiri gukorwa ni inzira yo kugirango ubutaka buve kuri Leta bubandikweho."
Kugeza ubu abagera kuri 11 nibo bavuga ko bamaze imyaka ine basiragira ku byangombwa by'ubutaka bahawe ubwo baguraniraga ahubatswe urwunge rw'amashuri rwa Pera.

Sitio Ndoli

Nyamagabe: Amapoto yaheze hasi, baracyategereje umuriro ariko barahebye

Valens Nzabonimana — 2025-10-01T07:41:11Z

Mu karere ka Nyamagabe umurenge wa Kitabi akagari ka Mujuga umudugudu wa Nyakanyeri abaturage bavuga ko babangamiwe no kuba mu icuraburindi nyamara hari amapoto amaze igihe arambitse aha mudugudu ariko bakaba barategereje umuriro bagaheba.

Mu karere ka Nyamagabe umurenge wa Kitabi akagari ka Mujuga umudugudu wa Nyakanyeri hari abaturage twasuye batubwira ko babangamiwe no kuba mu icuraburindi ryo kutagira umuriro nyamara hari amapoto amaze igihe arambitse muri uyu mudugudu ariko kubona umuriro byo bikaba byarabaye umugani.

Umwe yagize ati“bazanye amapoto batura hariya gusa ntibaza ngo bapime cyangwango bacukure n'imyobo ubu hashize amezi agera kuri atanu”.

Undi nawe ati“Nyine nta kundi twariyakiriye none se ko bayihaye iyindi midugudu naho mu mudugudu wa Nyakanyeri rikarangira twebwe ntawo baduhaye ariko icyakora twabonye amafoto bayarunze hariya mu muhanda twarategereje ko bayashinga turaheba”.

Aba baturage bavuga ko kubona servise z'ikeneye ikoranabuhanga bibagora ndetse na Serivise ku Kagari zikagenda gake bitewe n'iki kibazo cy'umuriro bakaboneraho gusaba ko imirimo yo kubagezaho amashanyarazi yakwihutishwa kuko byatuma nabo babasha kuwubyaza umusaruro bakihangira imirimo.
Ati “Nkubu hano iyo tugiye ku kagari imashine ya sosiyali ikazima ubwo twese turataha”.

Undi nawe ati ”Hari nk'abize imyuga itandukanye hano tubonye amashanyarazi twabasha kuwubyaza umusaruro natwe tukiteza imbere”.

Kuri iki kibazo umuyobozi w'umurenge wa Kitabi Gasore Jean Claude ahumuriza aba baturage ababwira ko bakwihangana kuko imirimo yo kubagezaho umuriro irimbanyije mu gihe kitarambiranye ko nabo baza kuva mu icuraburindi.

Ati “Amashanyarazi na n'ubu biracyakomeje kuko ni umushinga wa REG n'ubu baracyakora kandi umurenge wacu wose amashanyarazi azageramo muri iyo poroject, nuko umuturage ashobora kubona bashinze amapoto mu wundi mudugudu iwabo batarahashinga akumva ko bitari buhagere kubera ko ari umushinga uri gukorera mu mirenge icyenda nibagegereze bihanganye nabyo biraza gukemuka”.

Kuri ubu mu mibare iheruka gutangazwa na Minisiteri y'Ibikorwa Remezo (MININFRA) igaragaza ko akarere ka Nyamagabe kari ku kigero cya 72% mu kugeza amasharazi ku baturage, arimo akomoka ku muyoboro mugari ndetse n'izindi ngufu. Gusa ariko iyi minisiteri ikaba yari yarihaye intego yo kugeza umuriro w'amashanyarazi ku baturage bose mu gihugu 100% bitarenze mu mwaka utaha wa 2026.

Moise Munyaneza

Nyagatare: Babwiwe kwimurwa none imyaka ibaye cumi n'ibiri batemerewe kugira icyo bakora ku mitungo yabo

Valens Nzabonimana — 2025-09-30T08:04:32Z

Abaturage batuye mu kagari ka Rutaraka mu murenge wa Nyagatare mu karere ka Nyagatare, barataka ko bamaze imyaka irenga itandatu baremerewe kwimurwa ahagiye icyanya cy'inganda nanubu bakaba bagitegereje kandi barabujijwe kuvugurura inzu zabo.

Abaturage babujijwe kugira icyo bakora ku butaka bwabo.

Ni bamwe mu batuye mu mudugudu wa Nkonji ahahariwe ibikorwa by'inganda, nubwo abahatuye bigaragara ko bishimiye iterambere ry'inganda ryaje iwabo gusa bagaragaza ko bemerewe kwimurwa aha hantu ariko bakaba bagitegereje kuhava ariko byaranze.

Ahashyizwe icyanya cy'inganda abaturage ntangurane bahawe.

Uwitwa Grace Nyiramariza yagize ati"Ubu tumaze imyaka isaga cumi n'ibiri tubwiwe ko tuzimurwa aha hantu ntanakimwe twemererwa gukora haba kubaka cyangwa kuvugurura" n'aho Migambi Eliasi yongeyeho ati "Aha ikibazo dufite ni ukutemerwa kubaka cyangwa ngo twimurwe bigire inzira usanga niyo waba ufite ubushobozi kubaka utabyererwa cyangwa kuvugurura"

Icyanya cyahariwe inganda muri Nyagatare.

Aba baturage bavuga ko bagirwaho ingaruka no kuba batarimuwe aha hantu bityo bakifuza ko bahabwa ingurane cyangwa bakabareka bagakoresha ubutaka bwabo. Yagize ati"twe icyo twifuza nuko Koko batwimura aha tugasanga iterambere nk'abandi"

Ku muronko wa terefone umuyobozi w'akarere ka Nyagatare Gasana Stephen avuga ko aha hagenewe icyanya cy'inganda ko bityo bitemewe kiretse kubifuza kuhakorera ibindi bikorwa.

Mu magambo ye yagize ati "Hariya ni mu cyanya cyahariwe ibikorwa by'inganda kuhubaka ntibyemewe cyakora ushaka kuhakorera indi mirimo arayikora nk'ubuhinzi cyangwa ubworozi abahatuye bazahimurwa igihe nikigera"

Uyu mudugudu wa Nkonji uherereye aha hariwe ibikorwa by'inganda zibarizwa mu Karere ka Nyagatare. Bikaba byaratumye batemererwa kuhubaka.

Hakizimana Fisto

Nyagatare: Abakora imyuga barishimira inyubako nshya y'Agakiriro ka Karama.

Valens Nzabonimana — 2025-09-26T20:05:21Z

Abakora imyuga itandukanye bakorera mu gakiri ka Karama, kari mu Murenge wa Karama mu Karere ka Nyagatare, bavuga ko bishimiye kuba Leta yarabubakiye inyubako igezweho ibafasha gukora neza, bakaboneraho gushimira ubuyobozi bw'igihugu cyabatekerejeho.

Ubu rwose turadoda ntakibazo.

Musengimana Chantal, umudozi, yagize ati:
“Mbere twakoraga ahantu hatari heza, rimwe na rimwe imvura ikagwa tukabura aho dukorera neza. Ubu dufite inyubako isukuye, abakiriya bacu baratwizera cyane kuko tubakorera ahantu hameze neza. Turashimira ubuyobozi bwatekereje kutugenera iyi nyubako.”

Ubu abasudira ntibakibura uko bakora imiriro yabo.

Nizeyimana Emmanuel, usanzwe asudira, na we yagize ati:“Kuba dukorera hamwe mu buryo bugezweho bitwongereye amahirwe. Twahawe aho kubika ibikoresho byacu, kandi abaguzi badusanga hafi. Ubuyobozi bwacu burakoze cyane, ubu twumva turi mu nzira nziza y'iterambere.”

Umuyobozi w'Agakiriro ka Karama, Habimana Felecien, yavuze ko aka gakiriro ari igisubizo gikomeye ku rubyiruko n'abafite ubumenyi mu myuga: “Aha ni ahantu ho guhuriza hamwe imbaraga, gusangira ibitekerezo no kwigira ku bandi. Kuba twahawe inyubako igezweho bitwongerera icyizere cyo gukora neza no kubyaza umusaruro amahirwe twahawe.”

Matsiko Gonzague, Umuyobozi w'Akarere ka Nyagatare wungirije ushinzwe ubukungu, yashimangiye ko kubaka aka gakiriro ari inzira yo gufasha abaturage kwiteza imbere:“Karama izwi nk'umurenge wiganjemo abanyamwuga, ni yo mpamvu twahisemo kubaka agakiriro kugira ngo ducire aho akajagari, abaturage bagire aho bakorera heza kandi bibafashe mu iterambere. Ubu turabona ko bigiye gutanga umusaruro.”

Aka gakiriro gakoreramo abantu 64, bafite ubumenyi mu myuga itandukanye irimo ubudozi, ububaji n'ubusuderi. Abahakorera bavuga ko kubona aho gukorera hakwiye byatumye imirimo yabo itera imbere bikanabafasha gukorera mu buryo bwiza kurusha mbere.

Fisto Hakizimana

Gatsibo: Basabwe gutanga igihumbi ngo bahabwe umuriro w'amashanyarazi none imyaka ibaye icyenda bategereje

Valens Nzabonimana — 2025-09-26T07:31:32Z

Mu karere ka Gatsibo, umurenge wa Rugarama akagari ka Matare abaturage barasaba kurenganurwa ngo kuko batswe amafaranga igihumbi kuri buri muryango bizezwa guhabwa amashanyarazi ariko imyaka ikaba ibaye icyenda ntamashanyarazi bahawe.

Abaturage barasaba guhabwa umuriro w'amashanyarazi.

Ni bamwe mu baturage batuye mu mudugudu wa Gitsimba ya 2 mu kagari ka Matare umurenge wa Rugarama baganiriye n'umunyamakuru wa Mama Urwagasabo TV aho bavuga ko mu mwaka wa 2016 uwari mudugudu yatse abaturage amafaranga avuga ko bazahabwa amashanyarazi ariko kugeza uyu munsi bakaba ntamashanyarazi bafite.

Uwitwa Bigirimana Leonard asanzwe atuye muri aka gace yagize ati''Twatanze amafaranga igihumbi, kuri buri muryango twizezwa ko bazaduha umuriro ariko baraza bakawuha abandi twe tugasigaramo hagati''.

Batwatse amafaranga ariko ntitwabona umuriro.

Uwitwa Nyiramariza Judith nawe avuga ko aya mafaranga koko bayatswe mu magambo ye agira ati''Twatangaga igihumbi tukayaha uwari mudugudu icyo gihe ni nka za bibiri na cumi na gatandatu ariko turacyategereje ko twabona umuriro turabaza bakatubwira ko dutegereza''.

Bavuga ko kuba badafite amashanyarazi biri kubagiraho ingaruka bityo ko bafashwa bakabona amashanyarazi nabo. Leonard agira ati''Twe icyo twifuza ni umuriro natwe tugacana naho amafaranga yo ubu simpamya ko twakongera kuyabona wasanga ahubwo batwatse andi''.

Umunyamabanga nshingwabikorwa w'umurenge wa Rugarama Gisagara Edith avuga ko batari bazi iby'icyo kibazo ko bityo bagiye gukurikirana bagafasha aba baturage kurenganurwa.
Yagize ati ''icyo kibazo ntacyo twari tuzi gusa ubwo tukimenye tugiye gukurikirana tumenye ibyacyo kandi abariye amafaranga y'abaturage babiryozwe''.

Uyu muyobozi kandi yaboneyeho kwibutsa abaturage kujya basaba inyemezabwishyu igihe cyose basabwe amafaranga.

Kugeza ubu, Akarere ka Gatsibo kari ku ijanisha rya 70.2% mu gukwirakwiza umuriro w'amashanyarazi mu baturage, aho agera kuri 37.5% ari umuriro w'amashanyarazi usanzwe na 32.7% ukaba ukomoka ku mirasire y'izuba.

Mama U rwagasabo

Musanze: Abakorera mu isoko rya Gacaca barasaba kubakirwa

Jean Claude Ndayambaje

NYAGATARE: Bimwe ingurane y'ubutaka bwabo ubwo bimurwaga ahari umushinga wa GABIRO Agro- Business Hub

Fisto HAKIZIMANA

Gakenke:Abakora isuku bamaze amezi arenga 3 badahembwa

Jean Claude Ndayambaje

Rubavu: Babwiwe ko nta n'iripfumuye bazahabwa ku myaka yabo ikomeje kwangizwa mu gukora imihanda

Abaturage bangirijwe imyaka ariko ntamafaranga bahawe.

Nyirahavugima Suzana, agaragaza ko yangirijwe imyaka mu buryo bukomeye

Déogratias Nzabonimpa, Umuyobozi w'Akarere ka Rubavu w'Ungirije Ushinzwe Iterambere ry'Ubukungu.

Eulade Mahirwe

Rusizi: Bagiye kumara imyaka ibiri bategereje amafaranga y'ibyangijwe ubwo hubakagwa umuyoboro w'amashanyarazi

Sitio Ndoli

Rusizi: Bamaze imyaka ine batarahabwa ibyangombwa by'ubutaka baguraniwe ngo hubakwe ishuri

Sitio Ndoli

Nyamagabe: Amapoto yaheze hasi, baracyategereje umuriro ariko barahebye

Moise Munyaneza

Nyagatare: Babwiwe kwimurwa none imyaka ibaye cumi n'ibiri batemerewe kugira icyo bakora ku mitungo yabo

Hakizimana Fisto

Nyagatare: Abakora imyuga barishimira inyubako nshya y'Agakiriro ka Karama.

Fisto Hakizimana

Gatsibo: Basabwe gutanga igihumbi ngo bahabwe umuriro w'amashanyarazi none imyaka ibaye icyenda bategereje

HAKIZIMANA Fisto