Mama U rwagasabo

Nyagatare: Barasaba ko igishanga cy'umuceri gitunganywa

Chadadi Habimana — 2026-03-04T08:12:15Z

Ni abakora ubuhinzi bw'umuceri mu gishanga cya Rwangingo giherereye mu murenge wa Karangazi mu karere ka Nyagatare twasanze bageze mu gihe cy'isarura maze bavuga ko nubwo bejeje ariko ari hamana kubera gutegereza amazi y'imvura kubera ko iki gishanga kitatunganyijwe.

Uwitwa Sekamana Manase ni umuhinzi uhinga muri iki gishanga yagize ati '' Dufite ikibazo cy'iki gishanga kuko ntamazi kigira bitewe n'uko kidatunganyijwe, turagenda tugahinga twamara guhinga umuceri wagera aho ukeneye amazi agahita abura umuceri ugapfa bikadutera igihombo''.

SEKAMANA Manase umwe mu bahinga muri iki gishanga.

Aba baturage bavuga ko iki gishanga kuba cyitaratunganyijwe bitera igihombo bityo ko inzego bireba zabafasha iki gishanga kigatunganywa.
Muhire Alias yagize ati '' Ni igihombo nonese ko ubona utahinga mu gihe ntamvura kubera ukuntu humye, nyine turasaba ko badufasha kikabona amazi''.

Umuyobozi w'agateganyo w'akarere ka Nyagatare Kakooza Henry ku muronko wa terefone yamaze impungenge aba baturage ko vuba aha iki gishanga kiza kuba cyatunganyijwe.

Yagize ati :
''Turimo gukora za Canal barimo kubaka amadamu rero bihangane ndatekereza mu kwezi kwa karindwi bizaba byarangiye''.

Umusaruro w'umuceli uva muri iki gishanga waragabanutse.

Iki gishanga gisanzwe gifite amazi yacyo ibyo bituma ntakindi gihingwa cyahahingwa usibye umuceri wonyine.

HAKIZIMANA Fiston

HUYE: Abaturage ubutaka bwanyujijweho imihanda y'imigenderano bagasigara iheruheru.

Chadadi Habimana — 2026-01-20T09:26:27Z

Bamwe mu baturage bo mu Karere ka Huye, Umurenge wa Tumba, mu tugari twa Cyimana na Cyarwa, baravuga ko bamaze imyaka igera kuri ibiri baratakamba nyuma y'uko imihanda y'imigenderano yanyujijwe mu butaka bwabo, bikabasiga iheruheru batabonye ingurane.

Iyi mihanda yubatswe mu rwego rwo gutunganya site zo guturamo, ariko abaturage bavuga ko hari abambuwe ubutaka bari barambirijeho, by'umwihariko urubyiruko rwari rwarabubonye rugamije kuzaryubakiraho ubuzima.
Umwe muri bo wo mu kagari ka Cyimana, avuga ko ubutaka bwe bwanyujijwemo umuhanda akaba nta ngurane yabonye.
Ati: “Hari ikibanza nari mfite aho natekerezaga kuzubaka, none ubu hanyujijwemo umuhanda igice kimwe cyaragiye ubu ahasigaye ntabwo hajyamo inzu”.

Abaturage baremeza ko bamaze imyaka 2 batarahabwa ingurane z'ibyabo.

Umusore wo mu kigera cy'imyaka 27 wo mu kagari ka Cyarwa, ashimangira ko ibi byagize ingaruka zikomeye ku mibereho yabo.
Ati: “Urubyiruko rurasabwa kwiteza imbere, ariko iyo ubutaka bwacu bwose bufashwe hatabayeho ingurane, twisanga mu bukene bw'ikirenga.”

Umubyeyi w'abana batatu, wo mu kagari ka Cyarwa avuga ko ubutaka bwari inkingi y'ubukungu bw'urugo rwe.
Ati: “Twahingagaho tukabona ibyo kurya n'ayo kugurisha. Ubu umurima waragabanutse none nta n'ingurane baduhaye kandi twaravunitse igihe kinini tugira ngo tubone uwo murima.”

Nubwo bimeze bityo ariko aba batuarage bavuga ko nubwo ubutaka ari ubwa leta ariko hakwiye gutekereza ko mu gihe uwabuguze ngo agire icyo abwifashisha yaba guturamo cyangwa guhingamo iyo haje hagacishwamo ibi bikorwaremezo bakamusiga iheruheru bituma ubukungu bwe busubira inyuma
Ati: “Nubwo ubutaka ari ubwa Leta, uwabuguze aba haribyo ashaka gukoreramo yaba kubakamo inzu cyangwa guhingamo. Bityo rero hari igikorwa cya leta kinyuzemo nta ngurane umuntu ahawe, ubukungu bwacu busubira inyuma.”

Ikorwa ry'imihanda y'imigenderano yangirije abaturage ibyabo.

Ku ruhande rw'ubuyobozi, Umuyobozi w'Akarere ka Huye Sebutege Ange avuga ko imihanda yanyujijwe muri utu tugari yari igamije kongera agaciro k'ubutaka, bityo bikaba inyungu ku baturage.

Ati "Imihanda y'imigenderano yanyujijwe mu tugari twa Cyimana na Cyarwa yari mu rwego rwo gutunganya site zo guturamo, hagamijwe kongera agaciro k'ubutaka bw'abaturage, ku buryo ibyo bikorwa ari inyungu zabo mu gihe kiri imbere kandi ni ibintu twumvikanyeho n'abaturage.”

Gusa n'ubwo bimeze bityo, abaturage bakomeza kugaragaza ko hakenewe itegeko risobanutse kandi rishyirwa mu bikorwa, rirengera umuturage wangirijwe n'ibikorwa rusange, kuko kutumvikana ku ngurane bikomeje guteza impaka n'amarira mu bice bitandukanye by'igihugu.

Moise Munyaneza

Musanze:Ba mutima w'urugo biyemeje kurushaho gukomeza kurengera ibidukikije

Valens Nzabonimana — 2025-10-18T18:52:00Z

Abagore bagera kuri 300 baturutse hirya no hino mu karere ka Musanze baravuga ko nyuma yo guhabwa amasomo n'umuryango wa AKWOS ufatanyije na CECI bagiye kurushaho kurengera ibidukikije.

Abagore biyemeje kurengera ibidukikije.

Byagarutsweho ubwo bari mu mahugurwa y'umunsi umwe yahuje ba mutuma w'urugo baturuka mu mirenge itandukanye igize akarere ka Musanze mu rwego rwo gukomeza kwizihiza umunsi mpuzamahanga w'umugore wo mu cyaro ku nsanganyamatsiko igira iti”Umugore ni uw'agaciro”.

Mutuyimana Esperance uhagarariye itsinda ry'abateramahoro ba Muhoza yagize ati”Twaricaye nk'abadamu turebe uburyo twakwihangira imirimo muziko Plastic zangiriza ibidukikije ndetse n'indi myanda itabora turayifata tukayivangura, mwabonye ko plastic dukoramo ibintu bitandukanye, indabo, amaherena, udukomo n'uturembezo tw'abana.”

Mu byangiza ibidukikije dukora amavaze.

Mutuyimana akomeza agira ati”Iyo umurima wuzuyemo amasashi, plastic ntabwo umurima wera ikindi iyo amacupa n'ibindi bikoresho bya plastic bigeze mu Mugenzi byangiriza urusobe rw'ibinyabuzima niyo mpamvu natwe twiyemeje gukomeza kugaragaza uruhare rwacu mu kurengera ibidukikije”.

Tugomba kurengera ibidukikije dukora ibikoresho bitandukanye muri plastic.

Undi mutima w'urugo yagize ati”Ibidukikije bya mbere n'umuntu ni ukuvuga ngo iyo ikirere kimeze nabi niho usanga indwara z'ibihaha , iz'ubuhumekero. Umugore agomba kugira uruhare mu kurengera ibidukikije ndetse niwe ukwiye gufata iyambere muri gahunda yo guhangana n'imihindagurikire y'ibihe no kurengera ibidukikije, ya masashi dukuramo umunyu, amacupa tuguriramo amavuta ibyo byose dukwiye gukora uko dushoboye bikajya bishyirwa ahabugenewe dutahanye ingamba zikomeye.”

Ujeneza Germaine ni rwiyemezamirimo wanabonye igihembo ku rwego rw'Igihugu mu kubungabunga ibidukikije yagize ati”Maze kubona ko hari ikibazo cyo kubungabunga ibidukikije ndetse duhangana n'imihindagirikire y'ibihe ,twagiye dufata ibikoresho bya plastic tukabibyazamo umusaruro. Amavaze, amaherena, indabo dukoramo ibintu byinshi , kandi nk'abagore byaduteje imbere ndetse tubungabunga n'ibidukikije.”

Rwemarika Felecite Umuyobozi wa AKWOS.

Rwemarika Felecite ni umuyobozi wa AKWOS umuryango utari uwa Leta ushinzwe guteza imbere umugore binyuze muri Siporo yasabye abagore gukomeza kwimakaza ihame ryo kurengera ibidukikije.

Ati”Mwabonye ko twabahuguye mu bintu bitandukanye bijyanye no kurengera ibidukikije, gucana kuri Rondereza n'uburyo zikoreshwa, muziko hari abagore usanga batsa muziko mu nkwi, imyotsi ikazamuka ikajya kwangiriza ikirere, turifuza ko umugore wo mu cyaro asirimuka ndetse ikindi nuko plastike bazibyaza umusaruro nkuko bagiye babitwereka hano, dukomeza no kubashishikariza kwibumbira mu matsinda bakiteza imbere.”

Olive Zimurinda Umuyobozi was CECI mu Rwanda

Olive Zimurinda ni Umuyobozi wa CECI umuryango mpuzamahanga ukora ku bijyanye n'iterambere rirambye mu kurengera ibidukikije.

Ati”Uyu munsi turi mu gikorwa cyo kwizihiza umunsi mpuzamahanga w'umugore wo mu cyaro, uruhare rw'umugore mu guhangana n'imihindagirikire y'ibihe nuko agomba kubyiga akabimenya, akamenya ko agomba gutera ibiti, tukirinda gukoresha amashi na plastic”.

Olive yakomeje agira ati”Rero umugore afite uruhare rukomeye mu kurengera ibidukikije ndetse bimwe bagakomeza kubibyaza umusaruro, ubutumwa dutanga nuko umugore agomba gukanguka akumva ko afite uruhare mu iterambere .”

Jean Claude Ndayambaje

Nyagatare: Batunganyije umuhanda ugiye koroshya ubuhahirane hagati ya Nyendo na Gasinga

Valens Nzabonimana — 2025-09-17T17:37:22Z

Ubuyobozi bw'akarere ka Nyagatare ku bufatanye n'urubyiruko kuwa Gatandatu w'icyumweru gushize batunganyije umuhanda uhuza akagari ka Nyendo na Gasinga.

Abaturage biyubakiye umuhanda.

Abaturiye umuhanda wa Gasinga-Nyendo barishimira umuhanda wasanywe kuwa Gatandatu, ubwo bari mu muganda wihariye wakozwe n'urubyiruko ku rwego rw'igihugu.

Uwitwa Kagaba Frank agira ati ‘'Uyu muhanda wari ubangamye cyane cyane mu gihe cy'imvura wasangaga huzuye amazi y'ibiziba bityo bigatuma usanga birabuza imigenderanire''.

Bavuga ko kuba uyu muhanda wakozwe bizatuma imihahiranire hagati y'utu duce izoroha.

Uwitwa Mukamana Epiphanie yagize ati ‘'uyu muhanda kuba utunganyijwe bigiye kudufasha korosha ingendo kuko mbere byatugoraga, mbese ubu tugiye kujya tugeza umusaruro wacu ku isoko nta nkomyi''.

Umuyobozi w'akarere ka Nyagatare Gasana Stephen, agaruka ku gukorwa ku uyu muhanda yagize ati ‘'uyu muhanda ugiye gufasha abaturage kujya babasha kugeza umusaruro wabo ku isoko biboroheye''.

Uyu muyobozi kandi yaboneyeho gusaba abaturiye uyu muhanda kurushaho kwikorera umuganda mu rwego rwo kuwubungabunga.

Umuhanda wasanwe uhuza utugari tubiri ukaba ukoreshwa cyane n'abaturage batuye mu murenge wa Rwempasha aho bakunze kuwifashisha batwara umusaruro wabo ku isoko.

Fisto Hakizimana

Gisagara: Abaturage bahohoterwa n'abacukura amabuye y'agaciro.

Valens Nzabonimana — 2025-08-28T08:04:27Z

Mu karere ka Gisagara mu murenge wa Ndora mu kagari k'Agasharu, hari abaturage bahangayikishijwe n'abakora ubucukuzi bw'amabuye y'agaciro mu buryo bunyuranyije n'amategeko babangiriza imyaka ndetse bakanaragwa n'ibikorwa by'urugomo.

Ibikorwa byo gucukura amabuye y'agaciro mu buryo butemewe, bikorerwa mu gishanga gihuza akagari ka Ruturo kari mu murenge wa Kibirizi n'akagari ka Gasharu ko mu murenge wa Ndora mu karere ka Gisagara, abaturage twaganiye bavuga ko babangamiwe n'ababyishoramo, kuko babangiriza imyaka ndetse bakaragwa n'ibikorwa by'urugomo.

Umwe ati"Igihe cy'ibigori bajyamo bakarimbagura byaba byeze bagasarura, ukaba utababuza ngo bakwemerere".

Undi nawe ati "Dore ngahariye uko bahagize baragenda bagaca hariya ku mpande bagatibura imigende igatibuka uko itibuka rero abahahinga babona bononerwa".

Undi nawe yongeyeho ati "Amafaranga bakorera hariya niyo atuma bagira urugomo iyo bagiye gukora ntibayabone baraza barenganya abaturage, wajya nka hariya hakurya ugahuriramo nabo bakakwambura ibyo ufite. Ntakintu baba badafite intwaro zose za gakondo baba bazifite ntabwo wahura nabo ufite ikintu ngo ubacike".

Ibi birombe byagiye bigwamo abantu bagiye batandukanye inzego z'ubuyobozi zikabuza abaturage gukomeza kubyishoramo batabifitiye uburenganzira ariko bikaba iby'ubusa, imwe mu mpamvu ituma basaba ko hagira igikorwa ibi birombe bikabyazwa umusaruro ndetse n'abo n'abaturage bikabagirira umumaro aho gukomeza kuba indiri y'amabandi.

Umwe yagize ati "Ugasanga ibikorwa by'abaturage biri gupfa ubusa kandi biba byakagombye kugira abaturage akamaro, keretse nka Leta izanye umuntu akabikora byemewe n'amategeko natwe nk'abaturage tukahabona akazi abaturage bakabona amafaranga bakabaha ingurane natwe tukabonayo akazi bikatugirira akamaro, none ibintu abantu bakora baza kutwambura n'ibyo twari dufite ibyo urumva ntakamaro byatugirira".

Umuyobozi w'akarere ka Gisagara Rutaburingonga Jerome, avuga ko ikirombe cyafunzwe ngo ndetse bakomeje kurinda no kurwanya abo babaca murihumye bakayiba.

Ati "Ikirombe cyari gihari cyarahagaritswe dutegereje ko hazaboneka undi ugicunga hari igihe banyuramo bakayiba tukabarwanya, byumvikana nyine ninko gusiga ibintu abantu bakeneye hafi aho ariko twumvikanye n'ubuyobozi ko tugomba kurinda icyo kirombe kugirango abantu badakomeza kuyiba ayo mabuye".

Ni kenshi hirya no hino mu gihugu hagenda hagaragara imibare y'abahitanwe n'ibikorwa by'ubucukuzi bw'amabuye y'agaciro mu buryo bunyuranyije n'amategeko ariko Polisi y'URwanda ifatanije n'urwego rw'igihugu rw'ubugenzacyaha (RIB) bakunze kugira inama abaturage bababwira ko umuntu wese ukora ubucukuzi bw'amabuye y'agaciro nta ruhushya abifitiye ko ari icyaha gihanwa n'amategeko bakabashishikariza kubivamo kuko bishyira ubuzima bwabo mu Kaga.

Moise Munyaneza

Andi mafoto agaragaza uburyo aba baturage bangirizwa

Kayonza: Yagwiriwe n'ikirombe ahita apfa

Valens Nzabonimana — 2025-08-20T16:19:26Z

Mu karere ka kayonza mu murenge wa Rukara mu kagari ka Kawangire ikirombe cyishe umwana w'umusore warugiye gucukura amabuye y'agaciro.

Ikirombe cyagwiriye umuturage warugiye kwiba amabuye y'agaciro.

Ibi byabaye kuri wa Mbere ubwo umwana witwa Loni wigaga mu mwaka wa gatanu w'amashuri yisumbuye yajyaga mu kirombe gucukura amabuye ahazwi nka matini.

Bivugwa ko uyu mwana yaragiyemo muri iki kirombe ku nshuro ya mbere maze aza kugwirwa n'ibuye ryamanutse rimwikubita mu gituza ahita apfa. Abo bakoranaga mu kirombe bahise bahunze ari bwo byaje ku menyekana.

Iki kirombe mu busanzwe cyari cyarahatswe n'inzego za Leta ariko aba baturage bakaba bajyagayo mu buryo bwo kwiba aya mabuye. Mu busanzwe si ubwa mbere ibi bibaye, dore ko no mu minsi yashize nabwo iki kirombe cyivuganye abandi bantu babiri nabo bari baje kuhashaka aya mabuye.

Umuvugizi wa Polisi mu ntara y'Iburasirazuba nawe yemeza aya makuru ko ari impamo ndetse akaba yaboneyeho gusaba abaturage kwitwararika no kubahiriza amategeko yanibukije aba baturage ko usibye kuba gucukura amabuye mu buryo butemewe bihanirwa ko binashyira ubuzima bwabo muu kaga.

HAKIZIMANA Fisto

Burera: Ubukarabiro bwahindutse ikimoteri

2025-01-16T10:53:15Z

Bamwe mu baturage bo mu Karere ka Burera, Mu Murenge wa Rugarama barasaba ubuyobozi kwita ku bukarabiro bwo kunoza isuku bwahindutse ikimoteri.

Aba baturage babitangarije umunyamakuru wa Mamaurwagasabo TV ubwo yageraga ku isoko rya Rugarama ahubatse ubu bukarabiro asanga busigaye bujugunywaho imyanda.

Umwe mu baturage witwa Niyomwungeri yagize ati: "Ubu bukarabiro bwahindutse nk'ingarani, basigaye babwihagarika impande, twasaba ubuyobozi ko bwashyiramo imbaraga bakabwitaho bukagira isuku"

Ku bukarabiro usangaho ibikongorwa by'ibisheke

Undi muturage yagize ati: "Nabonye icyorezo cya Covid-19 gicogoye ntibongera kwita ku bukarabiro, baterera iyo; abantu basigaye bajya kwihagarika hariya inyuma y'ubukarabiro ugasanga ari ikibazo gikomeye, isuku yari ikwiye kuba umuco uranga abantu igihe cyose."

Umunyamabanga nshingwabikorwa w'umurenge was Rugarama, Bwana Egide Ndayisaba yavuze ko barimo kuganira n'abikorera bibimbiye muri PSF kugira ngo bazafatanye mu gusana ubu bukarabiro.

Ati: "Kubera ko amazi atahagera byatumye ubu bukarabiro bwangirika ariko turimo kuganira n'abikorera (PSF) kugira ngo turebe ko twabusana bukomgera gukora, kandi turashishikariza abaturage bacu kugira umuco wo kwita ku isuku ahantu hose."

Inyuma y'ubukarabiro bahagize ubwiherero

Ubu bukarabiro bwa Rugarama bwashyizweho na Minisiteri y'ubuzima (RBC) ubwo mu Rwanda no Ku Isi hose hari hadutse icyorezo cya Covid-19 hashyirwaho amabwiriza yo gukaraba intoki mu rwego rwo kwirinda kwanduzanya, gusa icyorezo kimaze gucisha make hirya no hino ubukarabiro bwinshi ntibwongeye kwitabwaho usanga bwaragiye bwangirika.

Yanditswe na Jean Claude Ndayambaje

Kicukiro batangije ibikorwa bizasiga isuku ibaye umuco mu baturage

2024-09-10T11:20:10Z

Akarere ka Kicukiro katangije ubukangurambaga buzafasha abaturage kwimakaza isuku n'umutekano bugasiga isuku ibaye umuco mu baturage hagamijwe imibereho myiza.

Ni ubukangurambaga bwatangirijwe mu murenge wa Kigarama kuri uyu wa bwibanda ku mazi, isuku n'isukura, bukazamara amezi ane ari imbere.

Ubukangurambaga bwaranzwe n'ibikorwa by'isuku n'isukura byahuriwemo n'ubuyobozi bw'akarere ka Kicukiro n'abafatanyabikorwa bako "waterforpeople" hamwe n'abaturage; batoraguye imyanda ndetse bashyiraho ikusanyirizo ry'imyanda “Puberi” ku mihanda.

Nyuma y'ibikorwa by'isuku, abaturage bakanguriwe kurushaho kugira isuku yo ku mubiri.

Umuyobozi Nshingwabikorwa w'akarere ka Kicukiro wungirije Huss Monique yabwiye abaturage ko isuku igomba kugira isuku y'aho batuye, aho bakorera no mu nzira ndetse bakarwanya abamena imyanda ahatarabugenewe.

Ubu bukangurambaga buzakomereza mu Mirenge yose igize Akarere ka Kicukiro hashyirwa za “Puberi” ku mihanda mu rwego rwo kwirinda ko hagira ujugunya imyanda aho itagenewe.

Muri aya mezi ane kandi hazanashyirwaho ibindi bikorwa remezo bibungabunga isuku nka “Kandagirukarabe”. Abaturage kandi bazakomeza kwigishwa ibyiza by'isuku n'ingaruka mbi z'umwanda.

Yanditswe na Samuel Mutungirehe

Menya amoko 13 y'ibisabantu na 85 y'inyamabere zibarizwa muri Pariki ya Nyungwe

2024-07-26T09:16:23Z

Pariki y'igihugu ya Nyungwe ni ishyamba cyimeza ribarizwa mu burengerazuba bw'amajyepfo y'u Rwanda, rikaba rifite umwihariko udasanzwe mu gukurura ba mukerarugendo cyane ko ubu iyi Pariki yamaze gushyirwa mu murage w'Isi (UNESCO).

Mu Ishyamba rya Nyungwe harimo amoko 13 y'ibisabantu (primates), (inyamanswa zifite imisusire ijya gusa n'iya muntu, harimo amoko arenga 85 y'inyamabere, habarizwamo kandi amoko 1250 y'ibimera bitandukanye, harimo amoko 50 y'ibishihe, amoko 133 ya ‘Orchidées' (indabo z'agahebuzo zikunzwe cyane), harimo amoko 24 ya gakondo. Ni pariki iri ku buso bwa hegitari 101.900.

Ubwo abanyamakuru bakora inkuru zijyanye n'ibidukikije mu Rwanda bibumbiye muri ishyirahamwe "Rwanda Environmental Journalists, (REJ) basuraga pariki ya Nyungwe, basobanuriwe imiterere y'iyi pariki ibiyirimo, ibiyigize basabwe no gukomeza gushishikariza abantu bingeri zitandukanye kujya baza gusura iyi pariki imaze kuba ikimenya bose.

Mu nyamaswa ziri muri Nyungwe zirimo amoko menshi; inyamabere ubwoko burenga 85 harimo ubwoko burenga 13 bw'ibisabantu (primates), ubwoko burenga 38 bw'ibikururanda (reptiles) ndetse n'ubwoko burenga 32 bw'intubutubu (amphibians).

Zimwe mu nyamaswa umunyamakuru wa mamaurwagasabo yagerageje kwibonera ziba mu ishyamba rya Nyungwe harimo inkende, inkoto, igitera, inyarubabi, inkotwa (aya ni andi mazina y'igitera) icyondi, inkomo, inyenzi, igishabaga, umukunga, inkima, inkurashaje, imfumbetwa, ifumberi, igisaho, insyisyi, impongo, ingurube y'ishyamba, impereryi (Rushokanankomati), inzibyi;
Imondo ( igira uruhu bambika umwami kera), imbaka, mujeri, igihimbi gito/impimbi, igihimbi, urutoni, isiha, inzoka z'amoko anyuranye, inyoni z'amoko anyuranye( bamukerarugendo zirabazindura birds Watching) twagerageje kuvuga zimwe muri zo nyamaswa.

Mu kiganiro yagiranye n'abanyamakuru Umuyobozi wa Pariki y'Igihugu ya Nyungwe, Niyigaba Protais yavuze ko iyi pariki icumbikiye urusobe rw'ibinyabuzima ndetse asaba abantu kujya baza kuyisura bakirebera ibyiza biyirimo.

Yagize ati:"Ishyamba rya Nyungwe ribarizwamo urusobe ry'ibinyabuzima bidasanzwe , muri nyungwe harimo amoko 13 , bingana na 12 % by'amoko yurwo rusobe aboneka muri Africa, ndetse dufitemo inyamabere zirenga 85."

Yakomeje agira ati:"Hari uburyo Nyungwe yihariye ku bijyanye nurusobe rwibinyabuzima, ibisabantu(Maguge) iri shyamba rifite agaciro gakomeye , iyo harimo Madagascar habonekamo 6% ,ntayindi pariki mu gihugu ibarizwamo amoko yibisabant, Muri nyungwe niho honyine haboneka (Kobasi monkeys) zibona ibyo kurya bihagije."

Mu bindi wamenya muri Nyungwe harimo ikiraro cyo mu kirere (Canopy walking way) ikunda gusurwa cyane n'aba mukerarugendo, nanone kandi muri iyi pariki harimo amasumo atandukanye aho twavuga Isumo rya Ndambarare na Kamiranzovu (Waterfalls) mu minsi iri mbere hazongerwamo na (Zipline mountain).

Abifuza gusura ibisabantu ( primates tracking fee) umunyarwanda yishyura ibihumbi 5000rwf, umunyamahanga (foreign non _residents) yishyura amadorali 60, umunyamahanga wo mu karere (foreign residents) yishyura amadorali 40, abanyeshuri b'Abanyarwanda bishyura 1500 Rwf, umunyarwanda wifuza kugendera ku kiraro cyo mu kirere (canopy) yishyura ibihumbi 5000rwf gusa.

Muri uru rugendo shuri rw'abanyamakuru bibumbiye muri ( Rwanda Environmental Journalists) bakoreye muri pariki ya Nyungwe biyemeje kuba umusemburo w'impinduka nziza mu kubungabunga urusobe ry'ibinyabuzima no kurengera ibidukikije.

Yanditswe na Jean Claude Ndayambaje

ABAHINZI BIJEJWE UBUVUGIZI KU MBOGAMIZI ZIKIGARAGARA MU KUHIRA

2024-06-24T04:04:47Z

Abakora ubuhinzi bijejwe gukorerwa ubuvuguzi hagakemurwa ibibazo byugarije gahunda yo kuhira imyaka, birimo igiciro cy'umuriro gihanitse kigenda ku mashini zizamura amazi.

Mu nama Nyungurabitekerezo yabaye ku wa 21 Kamena 2024, yateguwe n'Ihuriro ry'imiryango nyarwanda itegamiye kuri Leta ishyigikiye ibikorwa by'amajyambere y'ibanze CCOAIB(Conseil de Concertation des Organisations d'Appui aux Initiatives de Base) ku bufatanye na Never Again Rwanda ku nkunga y'Ikigo Nterankunga cy'Ubusuwisi, Swiss Agency for Development and Cooperation.

Abafite aho bahuriye n'ubuhinzi bagaragaje ko gahunda yo kuhira imyaka igenda itera imbere, ikazana n'impinduka nziza mu buhinzi, gusa ko hakirimo inzitizi.
Uwitwa Joel ukorera ubuhinzi mu gishanga cya Rurambi mu Karere ka Bugesera yavuze ko bitewe n'izuba ryinshi risigaye ririho, bakenera imashini zibafasha kuhira ko ariko bagorwa n'igiciro cy'umuriro bishyura kugira ngo imashini zake, kuko ngo bashobora no kwishyura Miliyoni 30 ku gihembwe kimwe cy'ihinga.

Ati ” Turasaba ubuvuguzi muri Leta, bakatugabanyiriza ku giciro cy'umuriro kuko nko ku mashanyarazi twishyura amafaranga ari hejuru cyane ku buryo dushobora kwishyura na Miliyoni 30 kuri ‘season', ku mashini ebyiri dukoresha”.

Senyabatera Jean Bosco, Ushinzwe Igenanigambi muri CCOAIB, yavuze ko uburemera bw'ikibazo cy'iyangirika ry'ibikorwaremezo byifashishwa mu kuhira imyaka kiremereye, kubera imihandagurikire y'ibihe muri iyi minsi ko bityo byaba bibaje abanyarwanda batabasha kuhira kandi bafite imigezi.

Ati ”Ibikorwaremezo byo kuhira impamvu byangirika akenshi usanga bihenze, bisaba amafaranga menshi ariko ntekereza ko amafaranga atariyo yakabuze, ahubwo ni ukubishyira mu byibanze.”

Mporana Jules Ushinzwe Imiryango y'Abakoresha Amazi mu Rwanda mu kigo gishinzwe Iterambere ry'Ubuhinzi n'Ubworozi (RAB), yavuze ko nk'Urwego rwa Leta bishimiye ko abafatanyabikorwa bababwiye ibibazo biri mu micungire y'Ibikorwaremezo ko kandi babizi.
Ati ”Icyo turimo gukora turi gukora ubuvuguzi, ku buryo dushobora kuzagabanya igiciro kigenda ku mashanyarazi yenda bakaba babikora nk'uko bikorwa ku nganda kuko zirasonerwa.”

Isuzumwa ry'Akozwe na Banki y'Isi mu 2021 ku buryo ubwuhizi mu buhinzi buhagaze, bwagaragaje ko ibice byinshi byo mu Rwanda bituhirwa bitewe n'uko uburyo bwo kuhirwa bwangiritse bitewe no kutitabwaho cyangwa ngo busanwe.

CCOAIB yo ubushashatsi yakoze mu 2023, ikabukorera mu Karere ka Kirehe na Kamonyi, bwagaragaje icyuho gikomeye mu kuhira imyaka.

Mu Rwanda hari imashini ziri ahantu hatandukanye zikoreshwa n'imiryango y'Abakoresha Amazi irenga 180, mu kuhira ku buso bwa Hegitari ibihumbi 64.