Impuzamashyirahamwe y’umupira w’amaguru muri Brazil yemeje ko guhera mu mpera z’ukwezi kwa Gicurasi, umutaliyani Carlo Ancelotti azatangira kuba umutoza w’ikipe y’igihugu ya Brazil izwi nka Celecao.
Carlo Ancelotti w’imyaka 65 y’amavuko azatangira inshingano ze nk’umutoza mukuru wa Brazil tariki 26 Gicurasi nyuma y’isozwa rya shampiyona y’icyiciro cya mbere muri Espagne izwi nka La Liga.
Ancelotti avuye mw’ikipe ya Real Madrid afatwa nk’umwe mu batoza bakoze amateka muri iyo kipe yambara umweru ibarizwa mu murwa mukuru w’ubwami bwa Espagne.
Ancelotti yegukanye ibikombe 15 mu bihe bibiri bitandukanye, ndetse yafashije ikipe ya Real Madrid kwegukana igikombe cya Uefa Champions League ndetse anegukana igikombe cya Shampiyona.
Nyuma yo gutsindwa umukino bahuyemo na Barcelone ku cyumweru ndetse bakaba baraviriyemo muri 1/4 mu marushanwa yo ku mugabane w’uburayi, byatumye uyu mwaka ikipe ya Real madrid nta gikombe icyo aricyo cyose izatwara muri uyu mwaka w’imikino bikaba bibaye bwa mbere mu myaka ine.
Carlo Ancelotti azibukwa cyane muri Real Madrid nk’uwayifashije kongera kwegukana igikombe cya Champions League ya 2014, kikaba cyari igikombe cya cumi Real yari itwaye mu mateka yayo nyuma yo kumara imyaka 12 itagikozaho imitwe y’intoki.
Muri Brazil azasimbura Dorivar Junior watangiye gutoza iyo kipe muri Mutarama 2024 akaba yarasezerewe mu kwezi kwa gatatu kubera umusaruro muke mu gushaka itike yo gukina igikombe cy’isi cya 2026.
Ancelotti yatangiye akazi k’ubutoza mu mwaka w’1992 yungiirije mw’ikipe y’igihugu mu gihe cy’imyaka itatu, yatoje amakipe nka Parma, Juventus,Naples na Milan Ac zo mu butariyani, Chelsea na Everton zo mu bwongereza, Bayern Munchen yo mu budage, PSG yo mu mubafaransa na Real Madrid yo muri Espagne.
