Yanditswe na: Imfurayabo Pierre Romeo
Urubyiruko rw’abakobwa bahuguwe n’umuryango utegamiye kuri Leta Save Generations Organization bahawe impamyabumyenyi nyuma y’amahugurwa y’amezi 12 bahawe y’ubumenyingiro arimo ayamezi 6 mu kudoda.
Ifoto y’urwibutso y’abahawe impamyabumenyi
Uyu muhango ukaba warabaye ku wa 20 Gashyantare mu kigo cy’urubyiruko cya Kabuga, witabirwa n’abakozi mu nzego za Leta barimo abahagarariye Ministeri y’urubyiruko, umurenge wa Rusororo ndetse n’abanandi bafatanyabikorwa batandukanye ba Save Generations Organization.
Bimwe mubyo badoda byiganjemo ibikapu n’imyenda y’ingeri zose
Uru rubyiruko rw’abakobwa rwahawe impamyabumenyi, bakaba baraje biyongera kuri bakuru babo babanjirije guhera mu mwaka wa 2015, aho buri mwaka hahugurwaga 25. Gusa muri rusange abamaze guhugurwa na Save Generations Organization bakaba barenga 120.
Umuhango wabanjirijwe no gusura bimwe mu bikorwa n’abafashijwe na Save Generations kuva muri 2015 kugeza ubu
15 bahawe impamyabumenyi uyu mwaka, bakaba barahawe amahugurwa atandukanye y’ubumenyingiro, nko kwizigama no kwihangira imirimo ibyara inyungu, gukoresha mudasobwa mu rwego kuzajya babasha kuyikoresha bajya kuri murandasi (Internet) kurebaho modeli zitandukanye bashobora kudoda. Kandi banahawe amahugurwa ku buzima byumwihariko ku buzima bw’imyororokere no kwirinda inda zitateguwe cyane ko bamwe muribo bari baracikirije amashuri cyangwa barabyariye iwabo. Nyuma yayo mahugurwa baje gusoreza ku mwuga w’ubudozi aho ubu bibumbiye mu makoperative atandukanye babasha kwidodera imyenda, ibikapu n’ibindi bakabigurisha.
Nkuko bitangazwa na Yvette NYINAWUMUNTU uhagarariye uyu muryango Save Generations Organization, ngo nkuko na Leta y’ubumwe ishyigikira iterambere ry’urubyiruko, ni muri urwo rwego nk’umuryango SGO nabo bafashe iyambere muri gahunda yabo ya buri munsi hakaba higanjemo gushyigikira Leta mu guteza imbere umwana w’umukobwa ndetse n’umugore by’umwihariko bamwe baba bataragize amahirwe yo kwiga cyangwa kugira ubundi bumenyi bwabateza imbere.
Yvette NYINAWUMUNTU Umuyobozi wa SAVE GENERATIONS ORGANIZATION
Ku bufatanye na A bridge for girls Fund, Save Generations Organization, ikaba yarahuguye aba bakobwa, gusa benshi muribo ari abari baracikirije amashuri bamwe muribo bakaba nta n’icyizere cy’imibereho yejo haza bari bifitiye ariko bakaba kuri ubu babona imbere heza nkuko bitangazwa na UWITONZE Immaculee umwe mubahuguwe bakanahabwa impamyabumenyi na Save Generations kuri ubu ubarizwa muri Koperative y’abadozi DUTERIMBERE.
UWITONZE yari yaracikirije amashuli ubu ni umudozi wigurira icyo acyeneye
Aganira na mamaurwagasabo yagize ati”Njyewe ku giti cyanjye nari nacikirije amashuri kuko nagarukiye muwa 3 w’amashuli yisumbuye kandi suko ntarinzi ubwenjye ahubwo nubushobozi buke nagize bwo kwishyura ngo nkomeze ishuli gusa nyuma yuko menye Save Generations, narayiyobotse impa amahugurwa ubu narimenye ndanisobanukirwa ku buryo ubu mbasha no guhagarara imbere y’abantu ntabwoba mfite” Yakomeje ati” Ubu duhereye kuri iyi kanzu nambaye ninjye wayidodeye, ndoda imyenda cyangwa ibikapu nkagurisha bityo nkabona amafaranga nkaba nakikenura ntarinze gutega amaboko ababyeyi.
UWITONZE Agaragaza amafaranga bamaze kwizigama agera kuri 238,050 frw
Nyuma yo guhurwa kudoda baradufashije twibumbira mu makoperative ndetse tunakorana n’ibigo by’imari ubu dufite konti muri Sacco Rusororo ndetse tumaze kwizigama amafaranga y’Urwanda asaga Ibihumbi 238,050 “
Mu buhamya bwatanzwe na bamwe mubatangiranye nuyu mushinga, bavuga ko utabahuguye gusa ahubwo wanabafashije cyane mu bijyanye no gushaka amasoko y’ibikorwa byabo ndetse no kwitabira amamurika gurisha atandukanye.
MIGAMBI Jacheline yatangiranye na Save Generations muri 2015, ubu ni umuyobozi wa koperative y’abadozi yitwa FATA VUBA, tuganira yagize ati: ”Mu by’ukuri Save Generation yatubereye urumuri nkuko Leta y’ubumwe yatubereye akabando, Save Generations yadukoreye ubuvugizi ku buryo twatewe inkunga n’umujyi wa Kigali n’Akarere ka Gasabo ku buryo ubu dukora tugakirigita ifaranga, twaguze n’ikibanza duteganya kubakamo inzo tukava mu bukode twe nka koperative”
MIGAMBI Jacheline watangiranye na Save Generations Organization muri 2015
Kandi banahawe imashini zidoda, mu rwego rwo kubafasha mu mwuga wabo
Umuyobozi wa Save Generation akaba avuga ko uru rutari urugendo rworoshye ariko bikaba byumwihariko bigaragaza imikoranire myiza y’imiryango itegamiye kuri Leta ndetse n’inzego za Leta aho yashimiye cyane ikigo cy’urubyiruko cya KABUGA aho uyu muhango wabereye ndetse na Minisiteri y’urubyiruko bagiye babafasha muri uru rugendo N’inzego z’ibanze nk’umurenge wa Rusororo bakoreramo.
Umuhango wasojwe hafatwa ifoto y’urwibutso
Yvette umuyobozi wa Save Generations akaba avuga ko bafite n’umushinga w’ubukangurambaga mu bigo by’amashuri ku bijyanye n’ubuzima bw’imyororokere cyane ko ngo byagaragaye ko bamwe mu bakobwa baterwa inda biga ahanini baba bazitewe n’abanyeshuri bigana. Akaba ari muri urwo rwego ubu ibikorwa byabo bigiye kwibanda mu bigo by’amashuri kuri ubu bakaba baratangiriye mu turere 2 aka Gasabo na Kamonyi bikaba ari ibigo 2 muri buri Karere kandi ibi bigo bikaba byaratorwaga ku bufatanye n’uturere hagendewe ku bigo babona bikeneye ubwo bukangurambaga kurusha ibindi. Muribyo hakaba harimo GS KABUGA na GS NDERA muri GASABO, GS NGAMBA na GS RUGOBA muri KAMONYI.
Nyinawumuntu Yvette umuyobozi wa SGO asobanura ubufasha baha abana b’abakobwa
VIDEO
https://www.youtube.com/watch?v=rHIWhHlWjtA&feature=youtu.be
