Guhera kuri uyu wa Gatanu Minisiteri y’Ubuzima yatangiye gutanga urukingo rwa Kabiri rwa COVID-19 ku bantu bari bahawe urukingo rwa Mbere rwa Pfizer mu rwevo rwo gushimangira ubudahangarwa bw’urukingo.
Ni mu rwego rwo gukomeza gahunda yo gukingira icyorezo cya COVID-19 hakoreshejwe izo nkingo ebyiri nk’uko zemejwe n’Ishami ry’Umuryango w’Abibumbye ryita ku Buzima (OMS), yatangiye guhera tariki ya 5 Werurwe 2021.
Ni inkingo zisabwa ko uzikingije ahabwa doze ebyiri kugira ngo zibashe gutanga umusaruro wo kurinda no kongera ubudahangarwa bw’umubiri zitezweho ku buryo bwuzuye. Abahawe doze ya mbere ya Pfizer bahereweho mu gihe ari rwo rusabwa ko nyuma yo guhabwa doze ya mbere uwayihawe aba agomba gutegereza iminsi iri hagati ya 21 na 28.
Ku wa kane ejo hashize ni bwo abagiye guhabwa urukingo rwa kabiri bahawe ubutumwa kuri telephone ngendanwa ko bakwiye kwitabira gufata urwa Kabiri ariko si ko bose bari buruhererwe umunsi umwe.
Umunyamabanga wa Leta muri Minisiteri y’Ubuzima Dr. Mpunga Tharcisse yavuze ko hari ababonye ubutumwa bw’uko bagomba gukingirwa n’aho bazakingirirwa ariki bikaba byahindutse kugira ngo bibanze binozwe, bityo bizakorwe neza kuko nk’abarimu, abayobozi mu nzego z’ibanze ndetse n’abakozi bo mu mavuriro bisabwa ko bafatira urukingo ku bigo nderabuzima bibegereye.
Icyiciro cy’abahawe urw’Astra Zeneca bo byitezwe ko bagomba gutegereza hagati y’ibyumweru 8 na 12 nyuma yo guhabwa urukingo rwa mbere nk’uko byateganyijwe n’impuguke zakoze izo nkingo.
