By Imfurayabo Pierre Romeo
Kompanyi y’ikoranabuhanga ya Google yo muri Leta Zunze Ubumwe z’Amerika yabujije Huawei ikora telefone zigezweho gukoresha uburyo bushya bwayo bwa Android, ibi bikaba ari ingorane kuri iyi kompanyi y’Abashinwa yabujijwe zimwe muri "applications" za Google.
Ni mu gihe intambara y’ubucuruzi hagati y’Ubushinwa n’Amerika irimbanyije.
Mu cyumweru gishize, ubutegetsi bwa Perezida Donald Trump w’Amerika bwashyize Huawei ku rutonde rwa kompanyi zibujijwe gukoresha ikoranabuhanga ry’Amerika zidahawe uburenganzira n’ubutegetsi bw’iki gihugu.
Google yasohoye itangazo ivuga ko Huawei igomba "gukurikiza amabwiriza". Huawei yo yanze kugira icyo itangaza kugeza ubu.
Ubwo Google izavugurura uburyo bwayo telefone zigezweho zikoresha bwitwa Android, abakoresha telefone za Huawei ntabwo bazabasha kububona.
HARI IZIHE NGARUKA KU BAKILIYA BA HUAWEI?
Mu byo abakoresha Huawei bazabura, harimo YouTube, Gmail ndetse na serivisi z’amakarita (maps).
Ben Wood, umuhanga mu by’ikoranabuhanga wo mu kigo CCS Insight consultancy, yabwiye BBC dukesha iyi nkuru ko iki cyemezo cya Google "gifite ingaruka zikomeye ku bucuruzi bwa Huawei".
Ku wa gatandatu, Ren Zhengfei, umuyobozi mukuru wa Huawei, yabwiye ibitangazamakuru byo mu Buyapani ko bari biteze ibi bikorwa by’Amerika.
Yemeje ko iyi kompanyi yatangiye kwishakira ibisubizo byayo.
Hari ibihugu binyuranye byagaragaje impungenge ko Huawei ikoreshwa na leta y’Ubushinwa mu kuneka abantu, iyi kompanyi ikaba ibihakana yivuye inyuma ikemeza ko itagengwa na leta.
Imibare y’igitangazamakuru Forbes cyibanda ku nkuru z’ubukungu n’imari igaragaza ko mu mwaka ushize Huawei yaciye kuri Apple y’Abanyamerika ijya ku mwanya wa kabiri muri kompanyi zikora zikanacuruza telefone nyinshi ku isi. Samsung, y’Abanyakoreya y’Epfo, ni yo ikiri ku mwanya wa mbere.
Inkuru ya BBC
