Abanyeshuri 23,395 biga mu mashuri y’imyuga n’ubumenyingiro mu bigo 210 birimo ibya leta n’iby’abikorera batangiye ibizamini bya Leta bisoza amashuri yisumbuye nyuma yo kumara umwana w’impfabusa kubera COVID-19.
Ku rwego rw’Igihugu ibizamini byatangirijwe ku Ishuri rikuru ry’imyuga rya Don Bosco Gatenga riherereye mu karere ka Kicukiro ahahuriye abasoje amasomo mu gukora amazi, plumbing n’abo mu bwubatsi, masonry.
Imibare y’Ikigo cy’Igihugu gishinzwe Ibizamini n’Ubugenzuzi, NESA, igaragaza ko abakoze kuri uyu wa 14 Kamena 2021, biyongereyeho 15.3% ugereranyije n’umwaka wa 2019.
Umunyamabanga wa Leta muri Minisiteri y’Uburezi Ushinzwe Ikoranabuhanga, Imyuga n’Ubumenyingiro, Irere Claudine kuri uyu wa mbere tariki ya 14 Kamena 2021, yavuze ko nubwo icyorezo cya Covid-19 cyahungabanyije urwego rw’uburezi muri rusange ariko abagiye gukora ibizamini babonye umwanya uhagije wo kwitegura.
Ati “Ikibazo cya Covid-19 cyaduciye intege ndetse twanamaze igihe kinini abanyeshuri batari mu ishuri ariko aho basubiriyeyo hakozwe ibishoboka byose kugira ngo bongere basubire ku murongo, abenshi usanga kwimenyereza imyuga aho bajyaga mu nganda cyangwa mu bindi bigo by’abikorera ubu bitarabayeho ahubwo byakorewe ku mashuri.”
Yakomeje agira ati “Twabikoreye ku mashuri kugira ngo turinde abanyeshuri kugenda bakaba bagirirayo ibibazo byo kwandura Covid-19, ndetse twanamenye ko amashuri yabyishimiye kuko yahawe ubushobozi bwo gufasha abanyeshuri. Nubwo iki kibazo cyabaye rero abanyeshuri n’abarimu bagaragaje ubwitange, navuga ko ibishoboka byose kugira ngo abanyeshuri bitegure byarakozwe.”
Umuyobozi Mukuru w’Ikigo k’igihigu gishinzwe ibizamini n’ubugenzuzi, Dr. Bahati Bernard, yavuze ko abanyeshuri bo muri TVET bakoze ibizamini bya leta mu 2019, bari 21,446 barimo abahungu 11,567 n’abakobwa 8,295. Ni mu gihe muri uyu mwaka wa 2021 abakoze bose ari 23,395 barimo abahungu 12,994 n’abakobwa 9,916.
Abarangije amashuri abanza bazatangira ibizami ku wa 12 Nyakanga barangize ku wa 14 Nyakanga 2021.
Abarangije icyiciro rusange ndetse n’abiga muri za TVET bazaba bakora ibizamini byo kwandika [Theory Exams] bazatangira ibizamini ku wa 20 Nyakanga babirangize ku wa 27 Nyakanga 2021.
Abarangiza amashuri yisumbuye biga muri siyansi bakaba bazakora ibizamini ngiro bazabitangira ku wa 28 Nyakanga babirangize ku wa 30 Nyakanga 2021.
