Yanditswe na Ndayambaje Jean Claude
Abantu bagera ku 8 biravugwa ko baguye mu muvundo abandi barakomereka nyuma yaho ikipe y’Igihugu ya Cameroun isezereye ibirwa bya Comores mu mukino wa 1/8 mu gikombe cya Afurika kuri stade Olembe i younde muri Cameroon mu mikino wabaye mu ijoro ryashyize.
Nkuko tubikesha namwe mu mashusho yafashwe agaragaza uburyo abafana babyiganaga bashaka kwinjira muri stade ya Olembe , bikomeje kuvugwa ko hari abahasize ubuzima abandi barakomereka cyane .
Muri raporo yatanzwe na Minisiteri y’Ubuzima muri Cameroun yabonywe n’Ibiro Ntaramakuru by’Abafaransa (AFP) igaragaza ko hari umwana umwe uri mu bapfuye.
Ni mu gihe hari indi raporo ivuga ko umubare munini w’abafana bashobora kuba bataye ubwenge nyuma yo kwisanga muri uwo mubyigano Kuko benshi bagiye basiga n’ibikoresho byabo birimo , telefone , inkweto n’imyenda.
Ubusanzwe Stade Olembe yakira abafana bagera Ku bihumbi 60, yemerewe kwakira 80% igihe Cameroun yakinnye n’andi makipe.
Leocadia Bongben ni Umunyamakuru wari kuri stade yabereyeho uyu mukino yabwiye BBC ko abafana benshi binjiraga mu muvundo ukomeye bashaka kwinjira.
Yagize ati "Hari abafana batangiye gusakuza cyane , umunota umwe nyuma yaho haje imodoka y’imbangukiragutarabara muri stade, ariko polisi ntiyatwemereye kwegera ahaberaga umuvundo."
Gusa uyu munyamakuru yavuze ko yabonye urutonde rw’abantu bagera ku munani bahasize ubuzima .
Impuzamashyirahamwe y’Umupira w’Amaguru muri Afurika (CAF), yavuze ko iri gukora iperereza ku byabaye nkuko yabishyize mu itangazo yasohoye .
Muri uyu mukino wa 1/8 Cameroun yatsinze Ibirwa bya Comores ku bitego 2-1 , harimo n’igitego cya Aboubakar Vincent Kapiteni wayo, umukino Kandi wagaragayemo ikarita itukura Ku ruhande rwa Comoros.
Cameroun muri 1/4 izisobanura n’ikipe n’igihugu ya Gambia yasezereye Guinea Ku gitego 1-0.
