Yanditswe na NIMUGIRE Fidelia
Abasivile 12, abapolisi babiri n’umusirikare umwe wa MONUSCO ni bo bamaze gupfira mu mvururu zirimo imyigaragambyo n’ubusahuzi byo kwamagana izi ngabo za UN muri Congo, nk’uko abayobozi babivuga, gusa ngo nubwo bimeze gutyo MONESCO irahakana kwica abo bigaragambya.
Ubutumwa bw’umuryango w’abibumbye buri kubungabunga amahoro muri Congo, MONUSCO, buvuga ko umusirikare umwe n’abapolisi babiri babo biciwe mu gitero bagabweho n’abitwaje intwaro, naho undi arakomereka bikomeye.
MONUSCO ivuga ko icyo gitero cyo ku wa kabiri cyabereye mu kigo cyayo cyo mu mujyi wa Butembo muri Kivu ya Ruguru, mu burasirazuba bw’iki gihugu.
Abateye bashikuje imbunda abapolisi ba Congo, bakarasa begereye ababungabunga amahoro ba MONUSCO.
Abigaragambya ku wa kabiri bagaragaje uburakari batewe n’iyicwa rya bagenzi babo bapfuye kuva ibi bikorwa byatangira ku wa mbere.
Umukuru w’agateganyo wa MONUSCO, Khassim Diagne, yahakanye ibivugwa mu bitangazamakuru by’uko abasirikare bayo barashe abasivile.
Mu kiganiro kuri televiziyo y’igihugu, RTNC, yavuze ko abateye ibigo bya MONUSCO bari mu "matsinda yiteguye neza, gusa barushije ingufu ibigo byacu, banarashe indege za kajugujugu zacu".
Ariko yashimangiye ko UN nta bigaragambya na bamwe yarasheho, nubwo abigaragambya bo bemeza ko MONESCO yabarashe bamwe bahagwa.
Kandi nubwo bakomeza kubihakana, umunyamakuru wa Reuters we yivugiye ko yiboneye abasirikare ba MONUSCO bishe barashe abigaragambyaga babiri i Goma.
Diagne yavuze ko abateye ku wa kabiri ari abagizi ba nabi, biyoberanyije nk’abigaragambya, bavuze ko bashakaga gutanga inyandiko y’ibyo basaba UN ,ubundi bararasa ubwo bari begereye ikigo UN.
Guverineri w’intara ya Kivu ya ruguru, Lieutenant Général Constant Ndima, ku wa kabiri nijoro yatanze ubutumwa bwo guhagarika imyigaragambyo yose muri iyo ntara.
Hashize igihe hari abaturage binubira abasirikare ba MONUSCO bagasaba ko bava mu gihugu, bavuga ko bananiwe kugarura umutekano nyuma y’imyaka irenga 20.
Hashize kandi amezi hongeye kwaduka imirwano hagati y’ingabo za leta ya Congo n’umutwe w’inyeshyamba wa M23, nyuma y’imyaka hafi 10 yari ishize nta gitero gikomeye kiba cy’uyu mutwe.
Mu kiganiro n’abanyamakuru hamwe n’umuvugizi wa leta ya Congo kuri televiziyo y’igihugu, Diagne yongeye gusaba kwigengesera kw’abigaragambya, avuga ko "imyigaragambyo nta kintu na kimwe icyemura".
Mu butumwa bwo kuri Twitter, MONUSCO yasubiyemo amagambo ya Diagne yo muri icyo kiganiro avuga ko kuva mu kwezi kwa cyenda mu 2021, MONUSCO yatangiye gahunda y’inzibacyuho yo kuhakura abasirikare.
Avuga ko iyo gahunda yahereye mu ntara ya Tanganyika, kandi ko kuva ku wa 30 Kamena 22, MONUSCO itakihafite abasirikare.
Yavuze ko hasigaye intara eshatu za Kivu y’Epfo, Ituri na Kivu ya Ruguru "zigoye kuko imitwe yitwaje intwaro imaze imyaka ihayogoza kandi ibintu ni urusobe".
Ati: "Uru rusobe rutuma habaho kutihangana no kubihirwa kw’abaturage. Ariko nabizeza ko ku rwego rwo hejuru muri iki gihugu no ku rwego rudukuriye i New York, dukora ibishoboka byose kugira ngo ibintu bihinduke".
