Umukinnyi w’icyamamare muri Shampiyona ya Basketball muri Amerika (NBA), LeBron James n’umuraperi Drake bajyanywe mu nkiko baregwa uburiganya ubushingiye kuri filime mbarankuru "Black Ice" bakoze mu 2014 ivuga ku mukino wa Hockey.
Ikirego cyatanzwe na Billy Hunter wahoze ari umuyobozi mukuru muri NBA, arega LeBron James na Drake gukora filime mbarankuru "Black Ice" avuga ko ayifiteho uburenganzira.
Ni filime yakozwe ku bikorwa byabayeho kuva 1895 kugeza 1925 muri shampiyona y’umukino wa Hockey ‘Coloured Hockey League’.
Uyu mugabo asaba igice ku nyungu zinjijwe na filime mbarankuru "Black Ice" ndetse n’indishyi itarenze miliyoni 10 z’amadorali ya Amerika.
George na Darril Fosty na bo bashyirwa mu majwi nk’abagize uruhare muri iki cyaha kuko bishyuwe ibihumbi 265 by’amadolari bagatanga uburenganzira bwo gufata amashuhso y’iyi nkuru kuri kompanyi zashizwe na LeBron na Drake.
Mu kiganiro yagiranye na New York Post, Hunter avuga ko yari afite uburenganzira kuri uwo mutungo ariko George na Darril bagakora amanyanga yo kuyigurisha atabizi.
Amakuru dukesha igihe.com avuga ko Hunter avuga ko yishyuye ibihumbi 250 by’amadorali ya Amerika agura uburenganzira bwihariye ku majwi ya "Black Ice" harimo n’ayakoreshejwe na LeBron James na Drake.
Kompanyi z’imyidagaduro za LeBron, The Springhill Company na Uninterrupted Canada na kompanyi ya Drake Dreamcrew Entertianment na Fostys’ Stryker Indigo ya George Fosty ziregwa muri uru rubanza nk’izacuruje iki gihangano zitabifitiye uburenganzira busesuye.
Iyi filime "Black Ice" ishingiye ku gitabo cyitwa "Black Ice:The Lost History of the Colored Hockey League of the Maritimes 1895 to 1925" cyanditswe na George Fosty afatanyije na Darril Fosty.
