Umugiraneza Alice
Mu karere ka Gakenke, mu murenge wa Nemba, akagali ka Mucaca hari abaturage bijujutiranabayobozi babo ko batabaha amabati agenewe abahuye n’ibiza, ngo ahubwo ari guhabwa abatarahuye n’ibiza.
Bamwe mu baturage bahuye nibiza bavuga ko umwaka washize wa 2020 bahuye n’ibiza ntibahwabwe inkunga ibagenewe, igahabwa abatarahuye ni biza kubera icyo bita indonke n’inda nini ya bamwe mu bayobozi.
Umwe mu baganiriye na Mamaurwagasabo utashatse ko amazina ye atangazwa ku mpamvu z’umutekano we, yagize ati" Njyewe nahuye n’ibiza umwaka kashize wa 2020 mu kwezi 5, badushyira ku rutonde rw’abazahabwa amabati, turategereza turaheba, kandi hari abantu dutuye mu gace kamwe batahuye n’ibiza bo bahawe isakaro".
Akomeza avuga ko kuba atarabonye isakaro kandi arigenewe ahubwo rigahabwa abadafite ikibazo bari mu nzu yabo hari ikibyihishe inyuma.
Ati" Baturemesheje inama y’abahuye n’ibiza baratubwira ngo tugende twubake ahantu heza hatari mu manegeka, umuntu avuga aho agejeje kugira ngo bamuhe isakaro. Naragiye ndubaka banyima isakaro ahubwo Gitifu w’akagali na sosiyare bahimba umudugudu w’ingo 5 baziha amabati bawita Rugari kandi muri nemba nta Rugari ibamo.
Ahantu hatagera igikorwa remezo nta muhanda nta mazi kuko ari inyuma y’umusozi."
Undi twahaye izina Kakuze ku bw’umutekano we yagize ati "Nahuye n’ibiza inzu yanjye irasenyuka njya gucumbika, aho naricumbitse nyir’inzu aransohora ndagenda mbwira Gitifu w’akagali nti se ko banyirukanye mu nzu abandi mukaba muri kubaha amabati njyewe mwampaye.
Yaransubije ngo ningende ko aho najya hose ntayo bampe ngo ni ngurishe isambu nguremo amabati kandi ntasambu ngira n’ibyo kurya mbibona mvuye guca inshuro."
Aba bombi n’abandi bahuje ikibazo bavuga ko bakimara guhura n’ibiza bahawe ibishyimbo, ifu ya kawunga barangije babashyira ku rutonde rw’abazahabwa amabati y’isakaro nubwo bavuga ko ubuyobozi bwahereye ku batarahuye n’ibiza bitwaza ngo umuterankunga world vission yatanze inkunga y’isakaro ku bafite abana baba muri yo. Gusa bakibaza impamvu ufite umwana uba muri uwo mushinga agahura n’ibiza ntayahabwe kandi utarahuye n’ibiza akayahabwa, kabone nubwo yaba afite umwana ubamo.
Bashyira mu majwi ushinzwe imibereho myiza mu murenge, bita Sosiyale, ko ari we watangaga uburenganzira bwo guhabwa amabati kuko nawe yari abiziho.
Ubuyobozi bw’umurenge wa Nemba ntibwemeranwa n’aba baturage ku byo bavuga, kuko bakoze ibyo bagombaga gukora.
Bayisenge Sammuel ni umuyobozi ushinzwe imibereho myiza y’abaturage mu murenge wa Nemba, avuga ko nk’ubuyobozi bw’umurenge nta muturage wahawe ibyo atari agenewe.
Ati "Umuturage uhabwa isakaro agomba kuba afite ibyo yujuje, twabona abyujuje tugakora raporo tukayohereza ku karere kuko ni ho bafatira isakaro.
N’umutera nkunga bari bafite, world vission, uwo bahaye amabati hari ibyo bamusabaga kuba yujuje nko kuba afite inzu igeze igihe cyo gusakara, kuba afite abana mu mushinga, kuba yarahuye n’ibiza."
Umurenge wa Nemba ufite imiryango 91 yahuye n’ibiza, ugizwe n’utugali 4 imidugudu 32 ukaba utuwe n’abaturage 17 360.
