Mutungirehe Samuel
Umuyobozi Mukuru w’Ikigo cy’Igihugu cy’Ubuzima RBC Dr Nsanzimana Sabin yavuze ko umuvuduko ibikorwa byo gukingira biriho mu gihugu watumye abagera hafi kuri 50% by’abatuye Umujyi wa Kigali bamaze gukingirwa Covid19.
Yabitangaje kuri uyu wa Mbere asobanura uko gahunda yo gukingira abaturage Covid19 ihagaze n’umusaruro yitezwwho mu ntangiriro z’umwaka utaha wa 2022.
Yagize ati"Turasatira hafi kimwe cya kabiri cy’abatuye umugi bamaze kubona urukingo, mu gihugu hose ho turacyari hafi 10% y’abo twifuzaga gukingira kandi ibi byose bibaye navuga mu kwezi kumwe, rero uko mbibona ndabona mu mezi, sinatanga igihe runaka ariko nkurikije umuvuduko biriho, nkurikije inkingo ziri kwinjira, nkurikije ko mu Mujyi wa Kigali tugeze ku bantu barengeje imyaka 40 hafi ya bose bamaze kubona urukingo.
Ejobundi nitubona nyinshi no mu ntara turabigira dutyo, naho barabakingira tumanuke tujye kuri 30, 20, mu gihe cy’amezi, mbona tuzatangira umwaka wa 2022 abantu benshi bakingiye."
Dr. Nsanzimana yakomoje avuga ko niba hakiri bake bafite ingingimira mu gihe igihugu kizaba gifite benshi bakingiye vitazabuza ubuzima gufunguka.
Umukozi w’Ishami ry’Umuryango w’Abibumbye ryita ku Bizima mu Rwanda, ukora muri gahunda yo gukingira Dr. Rosette Nahimana, yabwiye Radio Rwanda ko kwibanda mu Mujyi wa Kigali bigatiye runini ubuzima bw’igihugu cyane ko ari mu izingiro ry’ibikorwa by’iterambere kubera urujya n’uruza ruhabera.
Yakomeje agira ati "Ikindi murabizi ko nk’abantu bava hanze, bava mu bihugu byo hanze akenshi bashyikira mu migi kandi ahongaho naho byagiye bigaragara ko abantu bagiye bava hanze bakaza banduye bagahita banduza. Rero gukingira hitawe ku migi ni ikintu kiza cyane gikomeye."
Yongeyeho ko abantu bagomba kandi kuzirikana ko mu rwego rw’ikingira haba hifuzwa ko abantu bagira ubwirinzi buhagije na business zabo zikongera zigatangira cyane ko inyinshi zibera mu migi.
