Yanditswe na Imfurayabo Pierre Romeo
Hakozwe ‘Drone’ izajya ivana imiti ya Covid-19 muri Ghana ikayigeza mu Rwanda mu minota 15 gusa.
Kompanyi y’ikoranabuhanga yo muri Amerika ya Zipline isanzwe ikora indege zitagira abapilote zizwi nka ‘Drones’ yashyize hanze indege ifite ubushobozi bwo kuva mu Rwanda ikajyana imiti yo kwita ku barwayi ba Covid-19 muri Ghana mu gihe cy’iminota 15 yonyine, ikaba ije kunganira uburyo busanzwe bwo gutwara imiti hagati y’ibi bihugu byombi.
Iki kigo gisanzwe gifitanye imikoranire na Guverinoma y’u Rwanda, kuko na mbere y’uko icyorezo cya Covid-19 cyaduka ubwoko bw’izi ndege zari zisanzwe zikoreshwa na Minisiteri y’Ubuzima mu kugeza imiti n’amaraso ku bitaro bitandukanye byo mu Rwanda, ikoreshwa ryazo rikaba ryaratanze umusaruro mwiza mu kugarura ubuzima bw’indembe zitandukanye ziba zikeneye ubufasha.
Kompanyi ya Zipline itangaza ko icyatumye ikora iyi drone ifite umuvuduko wisumbuye ku zo yari isanganwe ari ukugirango ijye ikoreshwa n’ibihugu bitandukanye mu kwita ku barwayi ba Covid-19 harimo u Rwanda na Ghana. Iyi kompanyi itangaza ko drone nshya ishobora kuva muri Ghana ikagera mu Rwanda mu minota 15, ikaba ari ingirakamaro kuko izavanaho ikibazo cy’itinda ry’imiti mugihe hakoreshejwe ubundi buryo bw’ubwikorezi.
Ubwo muri 2016 utudege tutagira umupilote twa Zipline twageraga mu Rwanda, iyi kompanyi yahise itangira gukorana n’ibitaro 21 byo mu Rwanda naho kugeza ubu ikaba itangaza ko ikorana n’ibitaro n’amavuriro bisaga 160 mugihe ifitanye amasezerano n’ibitaro n’ibigo by’ubuvuzi ibisaga 2500 byo mu Rwanda na Ghana.
Business Insider ivuga ko umuyobozi w’iki kigo Bwana Keller Reaudo, aherutse gutangaza ko mu gihe icyorezo cya Coronavirus cyugarije isi, Zipline nayo yiteguye gutanga ubufasha bwihuse aho bukenewe.
Iyi ndege ifite ubushobozi bwo kugenda mu kirere uko cyaba kiri kose kuko itajya itangirwa n’ibicu, umuyaga mwinshi cyangwa imvura ngo bibe byayibuza kugenda Aho ku ikubitiro iyi drone igiye kujya ikoreshwa gukwirakwiza imiti hagati y’u Rwanda n’igihugu cya Ghana kimaze kugira 4700 by’abarwayi ba Covid-19 kugeza ubu.
