Umuyobozi w’Ihuriro ry’Abagore bari mu Nteko Ishinga amategeko (FFRP), Depite Mutesi Anita, yanenze abakunze kwibaza ku musaruro w’abagore biganje mu mu Nteko Ishinga Amategeko y’u Rwanda.
Abagore bari mu Nteko Ishinga Amategeko bangana na 64 % bahora babazwa umusaruro wabo nk’uko Depite Mutesi yabigarutseho mu nama nyunguranabitekerezo ku ruhare rw’imitwe ya politiki mu kwimakaza ihame ry’uburinganire mu matora, ku wa 1 Kamena 2018.
Yagize ati “Buri gihe abaza kudusura baba batubaza ngo ko muri abagore 64 % mwakoze iki ? Ni byo bintu twirirwa dusobanura hariya, mbega ni yo ndirimbo ariko nta wigeze abaza cya gihe abagabo bari benshi ngo bakoze iki ?”
Yakomeje agaragza ko abagore bashoboye nk’abagabo ariko hakaba hakenewe ko bitabwaho bihagije mu kubafasha kuzamura ubumenyi.
Ati “Hakwiye kubakwa ubushobozi bw’abagore, aho kugira ngo ugaye umuntu banza utekereze ngo namuhaye iki, niba ugiye gushyira umuntu mu mwanya banza utekereze no gukomeza kumwongerera ubumenyi […] Kwiga ni uguhozaho.”
Depite Mutesi yavuze ko ntawe ukwiye kwibaza ku musaruro w’uruhande rumwe, hagati y’umugore n’umugabo.
Perezida w’Impuzamiryango Pro –Femmes Twese hamwe, Kanakuze Jeanne d’Arc, yavuze ko nabo bajya babazwa ku musaruro w’abagore bari mu Nteko.
Ati “Twebwe nka Sosiyete sivile icyo kibazo bakunda kukitubaza ngo bariya bagore barimo baramara iki ? Kuki batibaza ngo abagabo bo barimo baramara iki? […] Ko tuzi ko mu nzego zifata ibyemezo z’u Rwanda abagabo bazimazemo igihe kirekire ko ntawibazaga ngo abagabo bazikozemo iki ? Ni ibiki byiza cyane baba barakoze abantu babashimira, ni ibiki bibi cyane baba barakoze abantu babagayira?”
Perezida w’Impuzamiryango Pro –Femmes Twese hamwe, Kanakuze Jeanne d’Arc, yavuze ko bajya bahura n’abibaza ku musaruro w’abagore biganje mu Nteko Ishinga Amategeko y’u Rwanda
Kuba Inteko Ishinga Amategeko y’u Rwanda igizwe n’umubare munini w’abagore (64 %) bigaragazwa ko ari ishema kuko ku Isi yose nta handi bigeze bagera kuri iryo janisha.
Uretse mu Nteko Ishinga Amategeko, no mu zindi nzego abagore bashimwa umusaruro batanga, cyane cyane mu aho bayobora, imicungire myiza n’indangagaciro z’Umunyarwandakazi bagaragaza.
