Mu karere ka Kamonyi mu murenge wa Kayenzi mu kagari ka Kayonza haravugwa urupfu rw’umugore witwa Uwimana Florence (38), bivugwa ko yishwe atemeshejwe isuka mu mutwe n’umugabo we Ntigurirwa Daniel (42).
Urupfu rw’uyu mubyeyi rwamenyekanye mu ijoro ryo kuri uyu wa 3 rishyira ku wa 4 i saa munani z’ijoro nyuma y’uko umukobwa wabo w’imyaka 17 yari yumvise nyina ajya gukingurira se atashye muri iryo joro, akumva ikintu kituye hasi yajya kureba agasanga ni se wishe nyina nawe amwirukankana yenda kumwicisha iyo rasoro nk’uko umusigire w’Umunyamabanga Nshingwabikorwa w’umusigire w’uwo murenge yabitangarije Mamaurwagasabo.
Mu kiganiro n’uwo musigire w’umurenge, Uwayezu Cerville, yadutangarije ko uwo muryango utuye mu mudugudu wa Nyarubare, ari naho urwo rupfu twabereye.
Yagize ati "Bakimara kubimbwira kubera ko hari nijoro nahamagaye polisi na RIB tujyayo, tugezeyo koko dusanga umugabo yishe uwo mugore we, yamukubise isuka bakunze kwita rasoro.
Umugabo ntabwo yari yahagorobereje; umugore ni we wari wiriwe mu rugo noneho bigeze saa munani z’ijoro umugano bumva arakomanze ngo yinjire, umugore arabyuka aramukingurira."
Yakomeje agira ati "Mu kumukingurira ubwo yari akigera ku muryango ni bwo yahise amukubita iyo suka mu mutwe noneho yikubita hasi imbere y’umuryango; twamusanze ari ho yapfiriye.
Noneho ubwo akimara kwikubita hasi uwo mwana w’umukobwa w’imyaka 17, ariko bagira nundi w’umuhungu ukurikira uwo mukobwa, uwo muhungu ntiyari yaharaye, umukobwa ni we wari waharaye."
Gitifu w’umusigire yakomeje avuga ko uwo mwana w’umukobwa yumvise ikintu kikubise hasi no gutaka birimo yahise asohoka asanga ni nyina se amaze kwica ahita avuze induru, se aramwirukankana nawe ashaka kumukubita icyo gisuka ahungira kwa nyirakuru ubwo ni bo bahise batabaza ubuyobozi bw’umudugudu, mudugudu nawe ahita amenyesha gitifu Uwayezu.
Ati "Umugabo tujyayo twamubuze, twasanze yamaze gutoroka ariko twashishikarije abaturage ko bakomeza gushakisha aho bakeka yaba yarengeye."
Uyu muyobozi asobanura ko urwo rugo amakimbirane bari bafite atavuga ko yari amaze igihe cyangwa ngo abe akomeye cyane.
Ati "Ikintu twe twari tuzi ni uko ubwo baheruka uwo mugabo yari yarahawe inka ya Girinka, noneho aza gucunga umugore adahari arayigurisha; umugorenaje asanga umugabo ntawuhari n’inka ntayihari, abajije abaturanyi bamubwira ko inka yayigurishije bayijyanye, umugore rero atanga amakuru ko umugabo yayigurishije kandi atazi n’aho yayigurishije n’uwayiguze.
Umugabo yaje gukurikiranwa aranafungwa, yafunguwe ejobundi mu kwa kane 2020 amazemo umwaka. Ubwo rero n’ubu ntituramenya aho ari, turi gushakisha, umurambo w’umugore wohwrejwe mu bitaro bya Rukoma ngo ukorerwe isuzuma."
Turi kugerageza kuvugana n’Urwego Ngenzacyaha RIB ngo tumenye amakuru arambuye kuri urwo rupfu n’uwo rukekwaho, mu gihe twayabona ni mwe ba mbere bo kuyamenyesha.
