Minisitiri w’Ububanyi n’Amahanga n’Ibikorwa by’Umuryango wa Afurika y’Uburasirazuba, Mushikiwabo Louise, yaje ku mwanya wa gatanu ku rutonde rw’Abanyafurika 50 bavuga rikumvikana.
Uru rutonde ngarukamwaka rukorwa na Jeune Afrique rugaragaraho abayobozi mu myanya itandukanye, ba rwiyemezamirimo, abaharanira uburenganzira bwa muntu, abahanzi n’abakinnyi.
Iki kinyamakuru kivuga ko bitari byoroshye gutoranya abantu 50 mu basaga miliyari imwe batuye mu bihugu 54 bya Afurika, kimwe mu byagendeweho akaba ari uburyo bigaragaraza mu ruhando mpuzamahanga.
Hitawe cyane ku buryo bakurikirwa ku mbuga nkoranyambaga by’umwihariko kuri Twitter ndetse n’uko ibyo bavuze cyangwa bakoze byakirwa n’abantu bari hanze y’igihugu n’umugabane wa Afurika, n’uruhare rwabo mu ifatwa ry’ibyemezo bya politiki.
Mushikiwabo w’imyaka 56 wabaye Minisitiri w’Ububanyi n’Amahanga kuva mu 2009, azwi kuzamura ijwi rye mu gusobanura inzira nshya u Rwanda rwahisemo ndetse no kugaragaza ko Afurika ikwiye kwigira.
Uyu Munyarwandakazi rukumbi ugaragara kuri uru rutonde akurikirwa n’abantu ibihumbi 259 kuri Twitter, aho usanga byinshi mu byo ashyizeho benshi batangira kubitangaho ibitekerezo.
Mu gukora uru rutonde ikinyamakuru cyirinze gushyiramo abakuru b’ibihugu n’abafasha babo ndetse n’Abanyafurika batuye mu mahanga kabone n’ubwo baba bakora ibikorwa biteza imbere ibihugu byabo cyangwa umugabane wa Afurika muri rusange.
Kuri urwo rutonde, ku mwanya wa mbere hariho Aliko Dangote, umuherwe w’umunya-Nigeria, uyu mugabo washinze Ikigo cy’ubucuruzi gikomeye cya Dangote Group cyibanda ku bijyanye na sima n’ubuhinzi, niwe munyafurika ufite amafaranga menshi aho umutungo we ubarirwa muri miliyari 13.5 z’amadolari.
Ku mwanya wa kabiri haza Chimamanda Ngozi Adichie, umusizi n’umwanditsi ukomoka muri Nigeria; yamenyekanye kubera inyandiko yise ‘We Should All Be Feminists’ n’igitabo cyitwa ‘The Americanah’ kigiye gukinwamo film n’abakinnyi bakomeye ku isi barimo Lupita Nyong’o na Danai Gurira. Akurikirwa na Mostafa Terrab umaze imyaka 11 ayobora Ikigo cya Leta ya Maroc gicukura amabuye y’agaciro ya ‘phosphate’.
Ni mu gihe ku mwanya wa kane haza Musenyeri Laurent Monsengwo uyobora Diyosezi ya Kinshasa muri Repubulika Iharanira Demokarasi ya Congo. Yamenyekanye cyane kubera uruhare rwe mu bikorwa byo kwamagana umugambi wa Perezida Joseph Kabila wo kuguma ku butegetsi binyuze mu myigaragambyo yagiye itegurwa n’abalayiki.
Minisitiri w’Ububanyi n’Amahanga n’Ibikorwa by’Umuryango wa Afurika y’Uburasirazuba, Mushikiwabo Louise
Uko bakurikirana uko ari 50
1. Aliko Dangote (Rwiyemezamirimo, Nigeria)
2. Chimamanda Ngozi Adichie (Umwanditsi w’Ibitabo wo muri Nigeria)
3. Mostafa Terrab (Umuyobozi w’Ikigo gicukura Phosphate muri Maroc)
4. Mgr Laurent Monsengwo Pasinya (Musenyeri wa Diyosezi ya Kinshasa, RDC)
5. Louise Mushikiwabo (Minisitiri w’Ububanyi n’Amahanga w’u Rwanda)
6. Naguib Sawiris (Umuyobozi wa Endeavour Mining, Misiri)
7. Wizkid (Umuhanzi, Nigeria)
8. Moussa Faki Mahamat (Perezida wa Komisiyo ya AU, Tchad)
9. Akinwumi Adesina (Perezida wa Banki Nyafurika Itsura Amajyambere (AfDB), Nigeria)
10. Achille Mbembe (Umunyamateka, Cameroun)
11. Muhoho Kenyatta (Umuyobozi wa Brookside Dairy, Kenya)
12. Olusegun Obasanjo (Yigeze kuba Perezida wa Nigeria)
13. Moulay Hafid Elalamy (Minisitiri w’Ubucuruzi n’Inganda, Maroc)
14. Davido (Umuhanzi, Nigeria)
15. Ahmad Ahmad (Perezida w’Impuzamashyirahamwe y’Umupira w’Amaguru muri Afurika (CAF), Madagascar)
16. Vera Songwe (Umuyobozi wa Komisiyo ishinzwe Ubukungu muri Afurika, Cameroon)
17. Hicham Naciri (Umunyamategeko, Maroc).
18. Desmond Tutu (Musenyeri mu Itorero ry’Abangilikani muri Afurika y’Epfo)
19. Issad Rebrab (Umuyobozi Mukuru wa Sosiyete Cevital, Maroc)
20. Patrice Motsepe (Rwiyemezamirimo wo muri Afurika y’Epfo)
21. Abdellatif Hammouchi (Umuyobozi w’Ishami rishinzwe kurwanya Iterabwoba muri Maroc)
22. Othman Benjelloun (Umuyobozi Mukuru wa Finance Com, Maroc)
23. Tony Elumelu (Rwiyemezamirimo, Nigeria)
24. Leila Zerrougui (Intumwa idasanzwe ya Monusco, Algérie)
25. Iyad Ag Ghaly (Umuyobozi w’Itsinda riha ubufasha Abayisilamu, Mali)
26. Tiken Jah Fakoly (Umuririmbyi, Côte d’Ivoire)
27. Abdelmoumen Ould Kaddour (Umuyobozi wa Sonatrach, Algérie)
28. Serigne Mountakha Mbacké (Umuyobozi w’Abayisilamu b’aba-Mourides, Sénégal)
29. Yabebal Fantaye (Umuhanga mu bugenge, Ethiopie)
30. Ramtane Lamamra (Umwe mu bagize Akanama ka Loni gashinzwe ubuhuza, Algérie)
31. Simon Njami (Umwanditsi, Cameroun)
32. Aziz Akhannouch (Minisitiri w’Ubuhinzi n’Uburobyi, Maroc)
33. Rebecca Enonchong (Umuyobozi wa AppsTech, Cameroun)
34. Mahmoud Dicko (Umuyobozi w’Inama Nkuru ya Islam, Mali)
35. Acha Leke (Umuyobozi muri McKinsey, Cameroun)
36. Fatma Samoura (Umunyamabanga Mukuru w’Ishyirahamwe ry’Umupira w’Amaguru ku Isi (Fifa), Sénégal)
37. Smockey (Umuvugizi w’Ikigo Balai Citoyen, Burkina Faso)
38. Bassem Loukil (Umuyobozi mukuru w’Ikigo Loukil, Tunisie)
39. Salim Saleh (Umujyanama wa Perezida, Uganda)
40. Yérim Sow (Perezida w’Ikigo Teyliom, Sénégal)
41. Baba Danpullo (Rwiyemezamirimo, Cameroun)
42. A’Salfo (Umuririmbyi, Côte d’Ivoire)
43. Rafael Marques de Morais (Umunyamakuru, Angola)
44. Amrote Abdella (Umuyobozi wa Microsoft muri Afurika, Ethiopie)
45. Fally Ipupa (Umuririmbyi, RDC)
46. Maria Borges (Umunyamideli, Angola)
47. Constantino Chiwenga (Visi perezida, Zimbabwe)
48. Touria El Glaoui (Yashinze inzu ya 1-54 Contemporary African Art Fair, Maroc)
49. Salimata Diop (Umuyobozi w’Inzu imurikirwamo amafoto ya Saint Louis, Sénégal)
50. Murielle Ahouré (Umukinnyi usiganwa ku maguru, Côte d’Ivoire)
