Yanditswe na Imfurayabo Pierre Romeo
Ishami ry’umuryango w’abibumbye rishinzwe ubuzima ku isi OMS/WHO rivuga ko coronavirus "ishobora kutazagira aho ijya ikigumira mu bantu nkuko ibindi byorezo nka SIDA, iseru n’ibindi bmeze kugeza nubu".
Mu kiganiro n’abanyamakuru ejo kuwa gatatu, Dr Mike Ryan ukuriye ibikorwa by’ubutabazi muri OMS, yaburiye abantu kwirinda guteganya igihe iyi virus izaba yaracitse.
Yavuze ko nubwo urukingo rwayo rwaboneka, gukomeza kuyirwanya bizasaba imbaraga nyinshi.
Ubu ku isi abantu hafi 300,000 bamaze kwicwa n’iki cyorezo, naho abarenga miliyoni 4,3 barayanduye.
Hagati aho umuryango w’abibumbye (UN) uvuga ko iki cyorezo kiri guteza indwara zo mu mutwe mu bihugu bitandukanye, cyane cyane ibidafite uburyo buhagije bwo kuvura izi ndwara.
UN isaba za leta z’ibihugu gushyira kuvura indwara zo mu mutwe muri gahunda z’ibikorwa byo kurwanya iki cyorezo.
Dr Ryan yabwiye abanyamakuru mu kiganiro ku ikoranabuhanga ry’iyakure ko "ari ingenzi gutekereza ko; iyi virus ishobora kuba indi virus ihora mu bantu, ishobora guhoraho".
Ati: "HIV ntaho yagiye - ariko twabashije kubana nayo".
Dr Ryan avuga ko atemera ko "hari umuntu wavuga igihe abona iyi ndwara izacika"
Ubu hari inkingo zigera ku 100 ziri gukorwa zishobora kurwanya iyi virus, ariko Dr Ryan avuga ko hari izindi ndwara nk’iseru n’ubu zitacitse nubwo hari inkingo zazo.
Dr Tedros Adhanom Ghebreyesus ukuriye OMS yavuze ko bigishoboka kurwanya Covid-19 mu gihe abantu bashyizeho umuhate.
Ati: "Ni urugamba rwa buri wese, twese tugomba gutanga umusanzu wacu mu guhagarika iki cyorezo".
Maria van Kerkhove inzobere mu ndwara z’ibyorezo ikorera OMS yabwiye abanyamakuru ko "dukeneye gushyira mu ntekerezo zacu ko guhashya iki cyorezo bizafata igihe kinini".
Bavuze ibi nyuma y’uko ibihugu byinshi byatangiye koroshya ingamba zikakaye zari zarafashwe mu kwirinda iki cyorezo aho abategetsi bari kureba uburyo n’igihe cyo kongera gufungura ibikorwa biteza imbere ubukungu.
Dr Tedros yaburiye ko batizeye neza niba gufungura ibikorwa byose bitazatera inkubiri ya kabiri y’ubwandu bw’iki cyorezo.
Ati: "Ibihugu byinshi birashaka kuva ku ngamba byafashe, ariko inama yacu ni uko buri gihugu gikomeza kwitegura mu buryo bukomeye bushoboka."
Dr Ryan yongeyeho ati: "Hari ibitekerezo biriho ko gufunga ibikorwa byose bitanga umusaruro, n’ibindi ko gufungura ibikorwa bizagenda neza. Byombi ni ibintu bikomeye birimo n’akaga."
Inkuru dukesha BBC
