Rwanda rwakiriye doze 857,000 z’urukingo rwa COVID-19 zo mu bwoko bwa Astra Zeneca zitanzwe n’Ubutaliyani, zije kongerera imbaraga gahunda yo gukingira imaze kugera ku baturarwanda barenga 12%.
Zakiriwe ku mugaragaro kuri uyu wa mbere tariki ya 4 Ukwakira 2021 na Hassan Sibomana wari uhagarariye Minisitiri w’Ubuzima akaba asanzwe anakuriye gahunda yo gukimgira mu gihugu, na Amb. Guillaume Kavaruganda Umuyobozi Mukuru ushinzwe Uburayi, Amerika n’imiryango mpuzamahanga muri Minisiteri y’Ububanyi n’Amahanga n’Ubutwererane (MINAFFET).
Leta y’u Rwanda yashimiye iy’u Butaliyani kuri iti nkunga ije ikenewe mu gihe u Rwanda rukomeje gukingira abaturage ndetse bikaba birimo gutanga umusaruro utangaje mu kugabanya ubwandu bwa COVID-19 mu Gihugu.
Izi nkingo zije ziyongera ku zindi ibihugu bitandukanye by’i Burayi na Leta Zunze Ubumwe z’Amerika byageneye u Rwanda muri gahunda ya Covax igamije guha inkingo ibihugu bikennye n’ibikiri mu nzira y’Amajyambere kugira ngo bitazasigara inyuma mu rugamba rwo kurandura burundu COVID-19.
Kugeza ubu, hafi 22% muri miliyoni 7.8 ziteganyijwe gukingirwa mu Rwanda (ni ukuvuga 60% by’Abanyarwanda) ni bo bamaze guhabwa urukingo rwa COVID-19 ku buryo bwuzuye. Ni ukuvuga ko hamaze gukingirwa 12.6% muri miliyoni 13 z’abaturage bose nk’uko byatangajwe na Minisiteri y’Ubuzima mu mibare yagaragajwe mu cyumweru gishize.
Abagera kuri 2,131,766 ni bo bamaze guhabwa nibura doze ya mbere ya 2 y’urukingo rwa COVID-19 mu Rwanda, mu gihe abamaze gukingirwa byuzuye babarirwa muri miliyoni 1 na 680,361.
Minisitiri w’Ubuzima Dr. Daniel Ngamije aragaragaza ko hari intambwe ishimishije imaze guterwa mu gikorwa cyo gukingira abaturage COVID-19: “Kuba tumaze gukingira abantu barenga miliyoni ebyiri ni intambwe ikomeye tumaze gutera ariko urugendo rurakomeje.”
U Rwanda rumaze kwakira inkingo za COVID-19 zigera kuri 3.658.310 zabonetse muri gahunda yo gusaranganya inkingo ya COVAX na gahunda ya AVAT (gahunda yashyizweho na AU ngo hashakwe inkingo za COVID-19 zo kunganira izindi gahunda muri uru rwego).
