Perezida Félix Anthoine Tshisekedi wa DRCongo, yageze Entebbe muri Uganda aho yagiye guhura na mugenzi we Museveni, mu ruzinduko rw’akazi mu masaha make.
Biteganyijwe ko abakuru b’ibihugu bombi baza kuganira ku bijyanye n’umutekano mu Burasirazuba bwa Congo.
Uruzinduko rwa Tshisekedi ruteganyijwe kumara amasaha atageze ku munsi i Kampala muri Uganda
Amafoto ya Perezidanse ya DRCONGO yaherekeje ubutumwa bwayo, agaragaza abakuru b’ibihugu byombi baganira mu biro bya Museveni, nyuma yo kumwakira.
Baraganira kandi ku bijyanye n’ubufatanye basanzwe bafitanye mu ngabo zabo, FARDC na UPDF mu guhangana n’iterabwoba rya ADF mu Majyaruguru, muri ADF mu ntara ya Ituri.
Iyo bigeze ku cyazana amahoro n’umutekano mu Burasirazuba bwa Congo, Perezida Museveni yeruye ko nta yindi nama yagira mugenzi we Tshisekedi atari ukwemera akaganira n’umutwe wa M23 bahanganye, cyane ko yemera ko ariyo nzira yatuma hagerwaho amahoro arambye muri Congo.
Ubwo Museveni yasubizaga ku buryo abona ikibazo cya DRCongo na M23 cyatangira amahoro akagaruka mu Burasirazuba
Museveni ubwo aheruka kubibazwaho, mu kiganiri cyarimo n’Umungamabanga Mukuru w’Afuriak yunze Ubumwe, Faki Mahmat, yabivuze muri aya magambo: "Ariko M23 mu by’ukuri ni ikibazo cya politiki cyakemurwa n’ibiganiro, kubera yuko ntabwo mbona ikibazo kinini hariya kugeza ubu kuko iyi M23 sintekereza ko basaba ibintu binini, gusangira ubutegetsi cyangwa ibindi, oya; bari hariya bavuga,..ndibuka nigeze kubasaba kunyoherereza bicye mubyo basaba. Mbabaza ngo murasaba ibiki, ni ugusubira mu byaro byabo aho baje baturuka, gushyirwa mu gisirikare, ni iki mu by’ukuri cyaba ikibazo kinini aho? Turimo kubwira rero Tshisekedi, tuti nyamuneka, aba ni abantu boroheje, mwaganira n’aba bantu hanyuma niba badashaka kuganira noneho twabafata nk’imbaraga zirwanya hanyuma tugahangana nabo."
Museveni akomeza agira ati: "Kuki ubundi mutamuha gahunda y’umwanzuro bakemeranyaho hanyuma nibanga kuyubahiriza tukazabimenya, none ubu murambwira ngo mubanze muze hanyuma tuzabiganiraho nyuma, kubera iki? kuki mushaka ko umuntu yagira, ... kuko byabaye na mbere. Muribuka ko bigeze no gufata Goma mu myaka yashize, njye nabisabiye kurekura Goma bakayivamo hanyuma baterwa n’izi ngabo za SADC. Baratatswe, ikibazo cyabo nticyabonerwa umuti, ndatekereza rero ko ikibazo cyabo kiroroshye, si ikintu kiremereye."
Ibi kandi kuri Museveni ngo bigomba kujyana no gukubita no kwambura intwaro umutwe Amerika yemeje ko ari uw’Iterabwoba wa FDLR ugizwe n’abasize bakoze Jenoside yakorewe Abatutsi muri Mata 1994 mu Rwanda.
