Igitero cy’amasasu cyagabwe ku Ishuri ryisumbuye rya Tumbler Ridge mu Ntara muri British Columbia cyahitanye nibura abantu 10, abandi barenga 25 barakomereka, nk’uko abayobozi ba Canada babitangaje ku wa Kabiri. Polisi yatangaje ko abantu umunani, barimo n’uwakekwagaho kuba yarashe, basanzwe bapfuye muri iryo shuri. Abandi bantu babiri bapfuye basanzwe mu rugo ruri hafi aho, bikekwa ko rufitanye isano n’icyo gitero.
Polisi y’Igihugu ya Canada (RCMP) yavuze ko ukekwaho kurasa, bikekwa ko ari umugore, yasanzwe yapfuye afite ibikomere bigaragara ko yiteye. Abashinzwe iperereza bamaze kumenya uwo ari we ariko ntibatangaje amazina ye, kandi icyamuteye gukora ibyo ntikiramenyekana. Abantu babiri bajyanywe mu bitaro n’indege bafite ibikomere bikomeye bishobora kubahitana, abandi bavuwe ibikomere bitandukanye.
Uyu mujyi wa Tumbler Ridge utuwe n’abagera ku 2,400 uherereye mu bilometero birenga 1,000 mu majyaruguru ya Vancouver. Minisitiri w’Intebe Mark Carney yavuze ko yababajwe cyane n’aya makuba. Ibi bitero mu mashuri ni gake biba muri Canada, bikaba ari byo byahitanye abantu benshi kuva mu 2020.
Kamikazi Ghislaine
