Nyuma yuko u Rwanda rubonye izindi nkingo za Astra Zeneca zo gukingira abahawe udoze ya mbere, kuri uyu wa Gatandatu tariki ya 29 Gicurasi 2021 Abanyarwanda ba mbere batangiye guhabwa doze ya kabiri y’urwo rukingo.
Ku wa Gatanu ni bwo indege za Gisirikare z’u Rwanda zagejeje ku bitaro bikuru mu ntara hose doze ya kabiri y’urukingo rwa Astra Zeneca, ibitaro nabyo bizigeza ku bigo nderabuzima byose aho abaturage batangiye kurufatira.
Minisiteri y’Ubuzima yatangaje ko ibigo nderabuzima 500 byatangiye gutanga doze ya kabiri y’urukingo.
Kuri iyi nshuro, inkingo 247 000 ziri gutangwa u Rwanda rwazihawe muri gahunda ya COVAX hamwe n’izingana na 117 600 zazanywe na Perezida Macron w’Ubufaransa ubwo aheruka gusura u Rwanda mu ruzinduko rw’iminsi ibiri yasoje ku wa Gatanu.
Minisiteri y’Ubuzima yasobanuye ko abari guhabwa doze ya kabiri y’urukingo rwa COVID19 mu Rwanda hose barimo abashobora kuzahazwa nayo, ni ukuvuga abarengeje imyaka 60 hamwe n’abafite indwara zitandura bari barahawe doze ya mbere.
Abo ku bigo nderabuzima byo mu karere ka Gasabo ni bamwe mu batangiriweho gufata doze ya kabiri ya Astra Zeneca.
