Kubera izamuka ry’imibare y’abaturage bandura icyorezo cya COVID-19, Ubuyobozi bw’Intara y’Amajyepfo bufatanyije n’Ikigo cy’Ubuzima RBC batangiye gahunda yo gupima nibura abantu 50 muri buri kagari.
Ni gahunda ifashwe nyuma yuko isesengura ry’inzobere mu buzima hamwe n’ibiro bya Minisitiri w’Intebe baherutse gushyira ku isaha ya saa moya uturere 6 mu 8 tugize iyi ntara bitewe n’ubwiyongere bw’abafatwa na Coronavirusi.
Ikigo k’igihugu cy’Ubuzima RBC cyatangaje ko muri iyi ntara hari kuboneka abarwaye corinavirusi benshi ahanini kubera ibipimo byinshi byatangiye gufatwayo.
Imibare yaraye itangajwe na Minisiteri y’Ubuzima, mu ijoro ryo ku wa Gatanu tariki ya 2 Mata 2021, yerekanye ko habonetse abarenga 200 banduye COVID-19 mu gihugu hose ariko abenshi biganje mu ntara y’Amajyepfo.
Akarere ka Huye konyine kabonetsemo abantu 60, Umuyobozi wako Ange Sebutege akavuga ko biteye impungenge kuko hari nk’itsinda rimwe basanze ririmo abantu 40 barwaye COVID-19 batabizi.
Yagize ati "Biba bisobanuye ko abantu batubahiriza amabwiriza iyo bari hamwe, bikaba bisaba rero ko abantu barushaho gukaza ingamba."
Usibye muri Huye no muri Ruhango ku munsi w’ejo hagaragaye abantu 27, muri Nyanza hagaragara 23, Nyaruguru hagaragara 24, Gisagara haboneka 18.
