Inkuru y’akababaro yageze ku Banyarwanda ni urupfu rwa Ambasaderi Habineza Joseph, wamenyekanye nka Joe yitabye Imana kuri uyu wa Gatanu.
Amb. Joseph yari amaze iminsi anyujije kuri Twitter amakuru atandukanye y’isabukuru ye n’umufasha we bamaranye y’imyaka 33, mbere gato yaho nabwo yari yagaragaje agapapuro ka kera kazwi nka Invitation y’Ubutumire bw’ubukwe bwe yibutsa abanyarwanda amateka y’urugo rwe n’uko yashatse.
Byatangajwe ko Ambasaderi Joseph Habineza apfuye azize uburwayi. Yabanje kujya kwivuriza muri Nigeria ahava akomereza i Nairobi muri Kenya ari naho yaguye.
Amwe mu mateka ye ni uko Habineza Joseph yabaye Minisitiri w’Umuco na Siporo kuva mu 2008 kugeza 2011akundwa cyane n’abaturage. Yongeye kugaruka muri iyi Minisiteri mu 2014 ageza mu 2015.
Nyuma yaho aza no guhagararira u Rwanda muri Nigeria na Ghana.
Amb. Joseph yavukiye mu karere ka Kamonyi mu ntara y’Amajyepfo tariki 3 Ukwakira 1964. Nubwo yamenyekanye muri Politiki, mbere yahoo yabanje gukora mu bigo bitandukanye byigenga.
Joseph Habineza yakoreye uruganda rwa Heineken i Kinshasa, mu 1994-1998, ndetse aza no kuba Umuyobozi ushinzwe ikoranabuhanga muri Heineken muri Nigeria, mu 1998-2000.
