Yanditswe na Mutesi Yvette
Urukiko rwa rubanda i Buruseri mu Bubiligi rugiye gutangira kuburanisha urubanza ruregwamo Seraphin Twahirwa na Pierre Basabose bacyekwaho gukora Genocide yakorewe abatutsi mu 1994 mu cyahoze ari perefegitura ya Ruhengeri.
Uru rubanza ruzatangira tariki ya 09 Ukwakira 2023 rusoze mu ntangiriro z’Ukuboza.
Mu itangazo rigenewe abanyamakuru ryasohowe na Ambasade y’Ububirigi mu Rwanda hagaragajwe ko muri uru rubanza abantu bagera kuri 40 aribo bazatanga ubuhamya.
Pierre Basabose yavutse mu 1947, avukira mu cyahoze ari perefegitura ya Ruhengeri. Yabaye umwe mu basirikare barindaga Perezida Juvenal Habyarimana kandi akaba inshuti ye ya hafi.
Pierre Basabose nubwo yari umusirikare yabaye n’umushoramari mu bucuruzi bwo kuvunja amafaranga mu mujyi wa Kigali.
Uyu kandi yanabaye umuterankunga ku rwego rwa kabiri wa radiyo RTLM, yageze mu Bubiligi avuye mu bihugu nka RDC, Kenya, Kazakistan n’Ubudage.
Naho uwitwa Seraphin Twahirwa aliyasi "Kihebe" yavutse mu 1958 avukira mu cyari komine Giciye perefegitura ya Gisenyi.
Avugwaho ko yari umuyobozi w’interahamwe i Gikondo mu mujyi wa Kigali,akaba mu byara w’umugore w’uwahoze ari perezida Juvenale Habyarimana ariwe Agatha Kanziga, wafatiwe mu Bubiligi avuye mu gihugu cya Uganda.
Bombi bakurikiranyweho ibyaha bya genocide, gutanga imyitozo ku nterahamwe zakoze genocide, gutoranya Abatutsi bagombaga kwicwa kuri za bariyeri, ibyaha by’intambara n’ibindi.
