By Imfurayabo Pierre
Umuryango Mpuzamahanga wita ku Buzima (OMS) watangaje ko mu masaha 24 ashize umubare w’abantu banduye Coronavirus wiyongereye, kuko handuye abantu 183 020.
Umubare munini w’abantu bashya banduye ni abo muri Amerika y’Amajyepfo n’iy’Amajyaruguru kuko ho handuye abantu 116 000 nk’uko Aljazeera yabitangaje.
Mu gihugu cya Brésil umubare w’abantu bamaze guhitanwa na Coronavirus warenze ibihumbi 50 bagera ku 50 617, mu gihe abamaze kwandura muri rusange ari 1085038.
Ku rwego rw’Isi, abamaze kwandura Coronavirus bageze kuri miliyoni 8.9 barimo miliyoni 4.4 bamaze gukira n’abasaga 467000 bamaze gupfa.
Mu masaha 24 ashize kandi, u Buhinde bwagize umubare munini w’abanduye Coronavirus kuko bageze 425282, bakaba biyongereyeho 14821.
Leta Zunze Ubumwe za Amerika nizo ziri imbere mu kugira ubwandu bwinshi bwa Coronavirus kuko bangana na 2356715 barimo 122248 bapfuye, Brésil ni iya kabiri, ku mwanya wa gatatu hari u Burusiya bufite abanduye 584,680 barimo 8,111 bapfuye.
Muri Afurika, abamaze kwandura Coronavirus ni 309,301 barimo 148 babonetse mu masaha 24 ashize. Afurika y’Epfo ni iya mbere mu kugira abanduye benshi kuko ari 97302 barimo 1930 bapfuye, Misiri hamaze kwandura abantu 55233 barimo 2193 bapfuye naho Nigeria abanduye ni 20244 na 518 bapfuye.
Muri Afurika y’Iburasirazuba, Kenya ifite abantu 4738 banduye barimo 123 bapfuye, Uganda abantu 770 nibo bamaze kwandura, u Rwanda rufite abanduye 728 harimo babiri bapfuye, Tanzania handuye 509 barimo 21 bapfuye (iki gihugu ntigiheruka gutangaza imibare ), mu Burundi handuye 144 hamaze gupfa umwe naho muri Sudani y’Epfo handuye 1892 hamaze gupfa 34.
