Yanditswe na Ndayambaje Jean Claude
Muri Gereza Nkuru ya Kalehe mu Ntara ya Kivu y’Amajyepfo humvikanye urusaku rw’amasasu, abapolisi barasana na mugenzi wabo.
Nkuko bitangazwa n’ubuyobozi bwa Polisi, uku kurasana kwabaye tariki ya 4 Ukwakira 2022 ubwo abapolisi bari ku izamu barashwe na mugenzi wabo wari wasinze. Uko kurasana kwasize Innocent Kashali ahaburiye ubuzima.
Sosiyete Sivile yo muri Kalehe yavuze ko umupolisi witwa Leya Muziki yishe arashe mugenzi we nyuma y’uko yari yasinze inzoga ziciriritse.
Yagize iti “Ubu bwicanyi bwaturutse ku businzi bw’inzoga ziciriritse zanyowe n’uwakoze amahano, nyamara gukora, kugurisha no kunywa ibinyobwa bisindisha birabujijwe mu karere kose.”
Amakuru avuga ko Urukiko rwa Gisirikare rwashyikirijwe dosiye y’uyu mupolisi kugira ngo akanirwe urumukwiye mu ruhame.
Si ubwa mbere muri uyu mwaka abashinzwe umutekano barasanye muri Repubulika ya Demokarasi ya Congo biturutse ku businzi bukabije.
Bamwe mu badepite muri RD Congo baherutse kumvikana bamagana inzoga ziciriritse kuko zikomeje kuyogoza ubuzima bw’abaturage by’umwihariko zikaba zarangije ku kigero cyo hejuru abapolisi n’abasirikare kuko arizo babasha kwigondera.
