Umuyobozi Mukuru wa Sosiyete y’Ubwishingizi ya Sonarwa General Insurance, Rees Kinyangi Lulu
ari mu maboko y’Urwego rw’Ubugenzacyaha RIB, akekwaho kunyereza amafaranga asaga miliyoni 117.
Kinyangi Lulu yatawe muri yombi tariki 2 Ukwakira 2024. Amafaranga ashinjwa kunyereza akaba afitanye isano na Hotel Nobilis isanzwe ari iya Sonarwa.
Rees Kinyangi yatawe muri yombi hamwe na Aisha Uwamahoro wari usanzwe ari umucungamutungo w’iyi hoteli.
Itabwa muri yombi ry’aba babiri ryemejwe n’Umuvugizi w’Urwego rw’Igihugu rw’Ubugenzacyaha (RIB), Dr. Murangira B. Thierry, wabwiye IGIHE ko “Ni ukuri. Bakurikiranyweho kunyereza umutungo no gukoresha nabi umutungo ufitiye rubanda akamaro”.
Kugeza ubu dosiye yamaze gushyikirizwa Ubushinjacyaha nubwo iperereza rikomeje.
