Abayobozi b’imidugudu bibukijwe ko ari bo bazagira uruhare runini mu gutuma amatora y’abadepite ateganyijwe ku matari 2,3,4 Nzeri 2018 agenda neza kurusha abandi bantu bose.
Babyibukijwe kuri uyu wa 18 Nyakanga 2018 mu nama yahuje Komisiyo y’Igihugu y’Amatora, Akarere ka Gasabo n’ubuyobozi bw’inzego zibanze muri aka Karere.
Perezida wa Komisiyo y’Igihugu y’Amatora Prof. Kalisa MBANDA, yatanze ikiganiro gisaba abaturage kwitegura neza amatora ari imbere; yabanje kubwira abayobozi b’inzego zibanze mu Karere ka Gasabo basaga 2000, kwiyumvisha akamaro k’amatora akozwe neza kandi mu mucyo, abasaba kuyitegura hakiri kare.
Yabibukije ko hagomba gutorwa abazagirira abaturage akamaro, kuko umuntu utabasha kwiyobora ubwe atabasha kuyobora abandi.
Nka Komisiyo y’Igihugu y’Amatora ngo bahereye muri Mutarama bitegura aya matora , ubu bakaba bageze ku kigero cya 85% cy’imyiteguro nkenerwa , Prof Mbanda yise aya amatora ubukwe, maze yibutsa akamaro b’abayobozi b’imidugudu mu gutuma amatora agenda neza,
Yagize ati” Abayobozi b’imidugudu ni Abantu bakomeye, ni abayobozi babana n’abaturage umunsi ku munsi, ubushobozi bwabo nibwo butuma izindi nzego zubakika; zaba izumutekano, iz’isuku, n’ibindi, bityo rero nibo dushingiyeho mu kudufasha gukangurira Abanyarwanda baba mu midugudu bayobora kuzagira uruhare mu matora y’abadepite, nibo bazatumenyera imbogamizi abaturage bahura nazo tubashe kuzikemura, ni nabo kandi abakorerabushake ba Komisiyo y’Igihugu y’Amatora bashingiraho mu gushyira mu bikorwa inshingano baba bahawe, ni abantu bakomeye mu matora nk’uko bakomeye mu buyobozi bw’igihugu”
Prof. Kalisa Mbanda yasabye ba Mudugudu kumva neza imigendekere y’amatora, bakigirira Icyizere mu kazi bakora, ndetse abasaba ubufatanye buhanitse kugira ngo abanyarwanda benshi bazagire uruhare mu matora y’abadepite.
Muzehe RWAMANZI Barthelemy, ni umuyobozi w’umudugudu wa Kamahwa, mu Kagali ka Nyarutarama, Umurenge wa Remera, yashimangiye ko ibisobanuro bahawe ku matora akozwe neza bagiye kubigeza kubo bayobora hagamijwe imigendekere myiza y’amatora y’abadepute, bityo bakaba bijeje Komisiyo y’Igihugu y’Amatora ubufatanye basabwa ” Ubwacu tugiye kubanza kugira aya matora ayacu, tuyumve tubashe kwigisha abaturage twemye.
Tugiye gushishikariza abaturage Kwikosoza kuri Lisiti y’itora, tugiye kandi kubashishikariza kuzitabira amatora ari benshi, amaraso mashya dusabwe muri iyi nama niko natwe tugiye kuyasaba abo tuyobora”
Ubuyobozi bw’Akarere ka Gasabo bwari buhagarariwe n’umuyobozi w’akarere w’ungirije ushinzwe Ubukungu bwana Raymond Chrestien MBERABAHIZI bwasabye abakandida baziyamamaza kuzahiga ibyo bazabasha guhigurira ababatoye , ubwo bazaba bageze mu nteko ishinga amategeko nyuma y’amatora.
Ku itariki 06/08/2018 nibwo hazatangazwa urutonde rwa burundu rw’abakandida bemejwe. Ibikorwa byo kwiyamamaza bizatangirana n’itariki 13/08 /2018 bisozwe ku ya 2/09/2018, umunsi amatora azaba yatangiriyeho ku banyarwanda baba mu mahanga, kuko Komisiyo y’Igihugu y’Amatora yasanze ntacyo byahungabanyaho amatora.
Bivuzeko ku itariki 2/09/2018, Abanyarwanda baba mu mahanga bazatora abadepite 53, kuya 3/09/2018 habe amatora rusange abanyarwanda baba imbere mu gihugu batora abadepite 53, naho kuya 4/09/2018 hatorwe abadepite 24 bagize 30% nk’umubare ushobora no kwiyongera w’abagore bagize Inteko Ishinga amategeko y’u Rwanda, hazatorwa kandi abadepite 2 bahagarariye urubyiruko (Umuhungu n’Umukobwe) , n’umwe uhagarariye abantu bafite ubumuga.
Abashaka kwireba kuri Lisiti y’itora no kumenya aho bazatorera basabwe gukurikiza aya mabwiriza:
1. Kujya ahandikwa ubutumwa bugufi
2. Kwandika ijambo NEC usiga akanya ugakurikizaho nomero y’indangamuntu y’ubikoze, ugasiga akanya ukandika
itariki y’amavuko(imibare gusa)
Urugero: NEC 198070005522023 09081980
3. Ukohereza kuri “7505”
4. Kubona ubutumwa bugufi bwanditseho umwirondoro w’ubikoze.
