Yanditswe na Ndayambaje Jean Claude
Bamwe mu baturage bo mu karere ka Gicumbi, by’umwihariko abakorera mu isoko ry’umugi baravuga ikimoteri kiri mu marembo y’isoko batinda kukividura kigateza umwanda ukabije bityo bakaba basaba ko bacyimurira ahandi.
Aba baturage babitangarije umunyamakuru wa mamaurwagasabo ubwo yageraga mu isoko rya kijyambere rya Gicumbi, aho ukinjira mu marembo ubona ikimoteri gishyirwamo imyanda nyamara ngo hari igihe batinda kuza kukividura kikanuka ndetse ngo usanga bihesha isura mbi iri soko.
Niragire Jean Pierre twahuriye muri iri soko yagize ati: "Ntabwo kubona ikimoteri hano mu muryango ari byiza rwose, bakijyanye ahandi hatari hano mu muryango w’isoko byaba ari byiza, ibi biragayitse cyane."
Undi muturage wanze ko dutangaza amazina ye mu nkuru ukorera muri iri soko yagize ati: "Iyo batinze kuza kuvidura iki kimoteri kiranuka cyane, ndetse kubona ikimoteri hano mu muryango birabangamye, dore ni hafi y’umuhanda abashyitsi badusura baje mu isoko ni benshi kubona imyanda hano rero si byiza, bazakijyane ahandi hihishe."
Perezida w’isoko rya kijyambere rya Gicumbi, Bwana Iradukunda Dieudonne yavuze bakividura byibuze gatatu mu cyucumweru ndetse ngo babyizeho kugira ngo bazashake ahandi hantu bagishyira bakivane mu muryango w’isoko.
Yagize ati: "Twaganiriye n’ubuyobozi barimo gushaka uburyo bakivana hariya bakacyimura, barimo gushakisha ahantu bagitereka hatari muryango, kubera ko cyegereye umuryango w’isoko, gusa kera nubwo cyanukaga ariko ubu basigaye bakividura gatatu mu cyumweru."
Ni ikimoteri gishyirwamo imyanda yose yakusanyijwe mu isoko iba ivanze yaba ibora n’itabora, aho usanga iri mu gikontineri cyateretswe hafi n’umuryango winjira mu isoko rya kijyambere rya Gicumbi, ndetse hari abakorera hafi yacyo.
