Mutungirehe Samuel
Urwego rw’Igihugu rushinzwe Ubugenzacyaha RIB, rwafunze Hakuzimana Abdou Rashid rumukurikiranyeho ibyaha byo guhakana no gupfobya Jenoside yakorewe Abatutsi mu 1994 n’icyaha cyo gukurura amacakubiri mu banyarwanda.
Hashize iminsi itari mike abatari bake ku mbuga nkoranyambaga cyane Twitter basaba ko Hakuzimana Rachid ahagarikwa akabazwa igituma akomeje kwifashisha umurongo w’Ikoranabuhanga wa Yutube avuga amagambo yuje guhakana no gupfobya Jenoside yakorewe Abatutsi mu 1994 no gushaka gukurura amacakuburi mu banyarwanda ashingiye mu byahoze ari amoko.
Mu minsi ishize Urwego RIB narwo rwaafshe Icyemezo cyo kumugira inama nk’undi muntu wese waba ari kugana mu nzira zitari zo, akora ibigize icyaha, ariko inama yagiriwe zo kwirinda ibyo byaha ntiyazubahiriza.
RIB yavuze ko Hakuzimana afungiye kuri sitasiyo ya RIB ya Kicukiro mu gihe iperereza rikomeje hanatuganywa dosiye kugira ngo ishyikirizwe Ubushinjacyaha nk’uko amategeko abiteganya.
Mbere gato y’uko atabwa muri yombi, Hakuzimana yari yasohoye inyandiko yitiriye umushinga w’amahoro ku Rwanda, ku Banyarwanda no ku Karere k’Ibiyaga Bigari avuga ko nta mahoro gafite kuva FPR ifashe ubutegetsi.
Uyu mugabo aramutse ahamwe n’ibyo byaha ntiyaba ari ubwa mbere afunzwe kuko yigeze gufungwa imyaka 8 kuva mu 2006-2014.
